މާޅޮހު ބަނދަރު ތަރައްގީކުރުމުގައި ގޮންޖެހުންތަކެއް އެބަ ހުރި: އާޒިމް
17 އޯގަސްޓު 2021 | އަންގާރަ 09:10ރަށް ކައިރީގައި އޮތް އާނުގަނޑުގެ ސަބަބުން ޕްލޭނަށް ބަދަލުގެންނަން ޖެހުނު
އއ. މާޅޮހު ބަނދަރުމަތި
އއ. މާޅޮހު ބަނދަރު ތަރައްގީކުރުމުގެ މަސައްކަތަށް ދިމާވާ އެންމެ ބޮޑު ދައްޗަކީ ރަށާ ކައިރީގައި އާނުގަނޑުތަކެއް އޮތުން ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އއ. މާޅޮހު ބަނދަރު ތަރައްގީކުރުމުގެ މަސައްކަތަކީ މިދިޔަ 2020 ވަނަ އަހަރުގެ ނޮވެމްބަރު 10 ވަނަ ދުވަހު އެމްޓީސީސީއާ ހަވާލުކޮށްގެން ކުރިއަށްގެންދާ މަޝްރޫއެކެވެ. އެމްޓީސީސީން އއ. އަދި އދ. އަތޮޅުގެ ބައެއް ރަށްތަކަށް ކުރާ ދަތުރުގައި ސީއީއޯ އާދަމް އާޒިމް ވަނީ މާޅޮހު ބަނދަރުގެ މަސައްކަތް ކުރިއަށްދާގޮތް ބައްލަވައިލައްވާފައެވެ.
މި މަސައްކަތް ނިންމަވައިލެއްވުމަށްފަހު މީޑިއާތަކަށް މައުލޫމާތު ހިއްސާކުރައްވައި އާޒިމް ވިދާޅުވީ މާޅޮހު ބަނދަރު ތަރައްގީކުރުމުގެ މަސައްކަތަށް ދިމާވާ އެންމެ ބޮޑު ގޮންޖެހުމަކީ ބަނދަރު ސަރަހައްދުގައި އާނުގަނޑެއް އޮތުން ކަމަށެވެ. އެހެންކަމުން މި މަސައްކަތް ފެށިފަހުން ޕްރޮޖެކްޓުގެ ކޮންސެޕްޓް ތިން ފަހަރެއްގެ މަތިން ބަދަލުކުރަން ޖެހުނު ކަމަށް އާޒިމް ވިދާޅުވިއެވެ.
މީގެ އިތުރުން ކޮވިޑް-19ގެ ހާލަތާއެކު މަސައްކަތް ކުރިއަށްގެންދިއުމަށް ބޭނުންވާ ބައެއް ސާމާނު ގެންދިއުމަށް ދަތިވި ކަމަށް އާޒިމް ވިދާޅުވިއެވެ. މިއާއެކު މަސައްކަތް ވަރަށް ބޮޑަށް މަޑުޖެހިލި ކަމަށާއި، އެހެންނަމަވެސް ދެން މި މަސައްކަތް ވަރަށް ބާރު ސްޕީޑެއްގައި ކުރިއަށްދާނެ ކަމަށް އާޒިމް ވިދާޅުވިއެވެ. އަދި އަންނަ އަހަރުގެ ޖޫން ހިސާބުގައި މި މަސައްކަތް އެއްކޮށް ނިންމާލެވޭނެ ކަމަށް އާޒިމް ވަނީ ވިދާޅުވެފައެވެ.
މީގެ އިތުރުން މާޅޮހު ކައުންސިލްގެ ނާއިބުރައީސް ފަޒީލް އަހުމަދު ވިދާޅުވީ މިހާރު އޮތް ބަނދަރު ކުޑަކަމުން ގިނަ ދަތިތަކެއް ދިމާވާ ކަމަށެވެ. ރަށަށް މުދާ ބޭލުމުގައި ދިމާވާ ދަތިތަކާއި، އެ ރަށަކީ ފުދޭވަރަކަށް ކަންނެލީގެ މަސްވެރިކަން ކުރާ މީހުން ގިނަ ރަށަކަށް ވުމުން ކަންނެލި ދޯނިތަކަށް ބަނދަރާ ކައިރިކުރުމަށް ދަތިވާ ކަމަށް ކައުންސިލްގެ ނާއިބުރައީސް ވިދާޅުވިއެވެ. ބަނދަރުގެ މަސައްކަތް ނިމުމުން މި ކަންކަމަށް ހައްލު ލިބިގެންދާނެކަމަށް ނާއިބުރައީސް ފަޒީލް ވިދާޅުވިއެވެ.
މާޅޮހު ބަނދަރު ތަރައްގީކުރުމުގެ މަޝްރޫއުގެ ދަށުން 24،335 ކިއުބިކް މީޓަރުގެ ސަރަހައްދުގެ ބަނދަރު ފުންކުރުމާއި، 407 މީޓަރުގެ ސަރަހައްދެއްގެ ބޭރުތޮށި ލުމާއި، 100 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 394 މީޓަރުގެ ސަރަހައްދެއްގައި އެއްގަމު ތޮށި ލުމާއި، 56 މީޓަރުގެ ސަރަހައްދެއްގައި ގްރޮއިންސް ޖެހުމާއި، 1970 އަކަމީޓަރުގެ ސަރަހައްދެއްގައި ޕޭވްމެންޓް ހެދުމާއި، ރޭމްޕް ހެދުމާއި، ނެރު ބައްތި އަދި މަގު ބައްތި ހަރުކުރުމުގެ މަސައްކަތް އެމްޓީސީސީން ކުރާނެއެވެ.
މި މަސައްކަތް އެމްޓީސީސީއާ ހަވާލުކޮށްފައިވަނީ 56.97 މިލިއަން ރުފިޔާއަށެވެ
