މަންދޫ ބަނދަރު ތަރައްގީކުރުމުގެ މަސައްކަތް ސެޕްޓެމްބަރު މަހު ފެށޭނެ: އާޒިމް
17 އޯގަސްޓު 2021 | އަންގާރަ 08:00މި މަސައްކަތް އެމްޓީސީސީއާ ހަވާލުކުރީ 2019 ވަނަ އަހަރު
އެމްޓީސީސީން މަންދޫ ކައުންސިލާއެކު ބޭއްވި ބައްދަލުވުން
އދ. މަންދޫ ބަނދަރު ތަރައްގީކުރުމުގެ މަސައްކަތް ސެޕްޓެމްބަރު މަހު ފަށައި، އެއް އަހަރުގެ ތެރޭގައި ބަނދަރުގެ މަސައްކަތް އެއްކޮށް ނިންމާލެވޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
487 މީހުންގެ އާބާދީއެއް އޮންނަ މަންދޫގައި ބަނދަރެއް ތަރައްގީކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ 29 ޑިސެމްބަރު 2019 ގައެވެ.
މި މަސައްކަތް ހަވާލުކުރިތާ ދެ އަހަރު ވާން ގާތްވެފައިވާއިރު، މަންދޫގައި ބަނދަރު ތަރައްގީކުރަން ނިންމާފައިވާ ސަރަހައްދު އެމްޓީސީސީގެ ޓީމުން ވަނީ ބައްލަވައިލައްވާފައެވެ.
މި ސައިޓް ބައްލަވައިލެއްވުމަށްފަހު މީޑިއާތަކަށް މައުލޫމާތު ދެއްވަމުން އެމްޓީސީސީގެ ސީއީއޯ އާޒިމް ވިދާޅުވީ މަންދޫ ބަނދަރު ތަރައްގީކުރުމުގެ މަސައްކަތް ނުފެށި ދިގުލައިގެންގޮސްފައި ވަނީ ބަނދަރު ތަރައްގީކުރާނެ ސަރަހައްދެއް ކަނޑަނޭޅިގެން ކަމަށެވެ. މިހާރު ނިންމާފައިވަނީ ރަށުގެ ހުޅަނގު ފަރާތުގައި ބަނދަރު ތަރައްގީކުރަން ކަމަށް އާޒިމް ވިދާޅުވިއެވެ.
މި މަސައްކަތް ސެޕްޓެމްބަރު މަހު ފެށޭން ކަމަށާއި، މަސައްކަތް ފަށާތާ އެއް އަހަރުގެ ތެރޭގައި މަސައްކަތް ނިންމާލެވޭނެ ކަމަށް އާޒިމް ވިދާޅުވިއެވެ.
މީގެ އިތުރުން މަންދޫ ކައުންސިލްގެ ރައީސް މުހައްމަދު ސައީދު ވިދާޅުވީ ބަނދަރެއް ނެތުމުން އެ ރަށުގެ ރައްޔިތުންނަށް ވަރަށް ގިނަ ދަތިތަކާ ކުރިމަތިލާންޖެހިފައިވާ ކަމަށެވެ. މިވަގުތު ބޭނުންކުރަން އޮތީ ޖެޓީއަކަށް ވާއިރު ޖެޓީން ބަރު އެއްޗެހި ނުއުފުލޭ ކަމަށް ސައީދު ވިދާޅުވިއެވެ. މުދާ އުފުލުމުގައި ދިމާވާ ދަތިތަކަށް ހައްލު ލިބުމުގެ އިތުރުން ރަށަށް އުމްރާނީ އެހެނިހެން ތަރައްގީ އައުމަށް ވެސް މަގުފަހި ވެގެންދާނެ ކަމަށް ސައީދު ވިދާޅުވިއެވެ. ވަކިން ޚާއްސަކޮށް ލޯކަލް ޓޫރިޒަމް އިތުރަށް ފުޅާވެގެން ދާނެ ކަމަށް އޭނާ ވިދާޅުވިއެވެ.
މީގެ އިތުރުން ސައީދު ވިދާޅުވީ އެމްޓީސީސީއާއެކު ކުރެވުނު މަޝްވަރާތަކަށްފަހު އެމްޓީސީސީގެ ފަރާތުން އެ ރަށުގައި ޖެޓީއެއް އަޅާނެ ކަމަށް ސީއީއޯ އާޒިމް ވިދާޅުވި ކަމަށެވެ. މިއީ ސަރުކާރުން އެމްޓީސީސީއާ ހަވާލުކޮށްފައިވާ މަޝްރޫއެއް ނޫން ކަމަށް ސައީދު ވިދާޅުވިއެވެ.
އދ. މަންދޫ ބަނދަރު ތަރައްގީކުރުމުގެ މަސައްކަތުގެ ތެރެއިން 19،630 ކިއުބިކް މީޓަރުގެ ސަރަހައްދެއްގެ ބަނދަރު ފުން ކުރުމާއި، 136 މީޓަރުގެ ސަރަހައްދެއްގައި އެއްގަމު ތޮށިލުމާއި، 31 މީޓަރުގެ ސަރަހައްދެއްގައި ބޭރުތޮށި ލުމާއި، 138.73 މީޓަރުގެ ޖެޓީއެއް ހެދުމާއި،580 އަކަމީޓަރުގެ ސަރަހައްދެއްގައި ޕޭވްމެންޓް ހެދުމާއި، މަގުބައްތި ހަރުކުރުމުގެ މަސައްކަތް ވަނީ އެމްޓީސީސީއާ ހަވާލުކޮށްފައެވެ.
މި މަސައްކަތް އެމްޓީސީސީއާ ހަވާލުކޮށްފައިވަނީ 32.28 މިލިއަން ރުފިޔާއަށެވެ
