އީސީގެ މެންބަރު ކަމަށް ބޭފުޅަކު އައްޔަން ކުރެއްވުމަށް ފޮނުއްވި 5 ނަން ދިރާސާކުރުމަށް ކޮމިޓީއަށް
16 އޯގަސްޓު 2021 | ހޯމަ 07:07އިލެކްޝަންސް ކޮމިޝަންގެ ރައީސްގެ މަޤާމު ހުސްވާތާ 60 ދުވަހުގެ ތެރޭގައި އެ މަޤާމަށް މީހަކު އައްޔަން ކުރަން ޖެހޭ
އީސީގެ ކުރީގެ ރައީސް އަހްމަދު ޝަރީފް މަޤާމުން އިސްތިއުފާ ދެއްވީ ޖުލައި މަހުގެ 15 ވަނަ ދުވަހު
ހުސްވެފައިވާ އިލެކްޝަންސް ކޮމިޝަން (އީސީ)ގެ މެންބަރުކަމަށް އައްޔަންކުރެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ރައްޔިތުންގެ މަޖިލީހަށް ފޮނުއްވާފައިވާ 5 ނަން ދިރާސާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.
ހޯމަ ދުވަހު ބޭއްވި ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާގައި ރައީސް ފޮނުއްވި ސިޓީފުޅު މަޖިލީހަށް އިއްވާފައިވަނީ އަމީންއާންމެވެ. ރައީސް ފޮނުއްވާފައިވާ ފަސް ބޭފުޅުންނަކީ:
1. މުހައްމަދު އާސިފް، ހ. އިރުވައި
2. ޝަހުލާ އިސްމާއިލް، ފިނިއުނިމާގެ، ޅ. ހިންނަވަރު
3. އަޒްލީމާ އަހުމަދު، ދަފްތަރު ނަންބަރު ރސ 94-341
4. އަހުމަދު މަންސޫރު، ވ. ރިވެތި
5. މަރިޔަމް ހަނީފާ ހާލިދު، އަނބުގަސްދޮށުގެ، ހއ. ކެލާ
ހުސްވެފައިވާ, އީސީގެ ރައީސްގެ މަޤާމަށް މީހަކު އައްޔަން ކުރެވޭނީ އިތުރު މެމްބަރަކު ލިބިގެންނެވެ. އީސީގެ ކުރީގެ ރައީސް އަހްމަދު ޝަރީފް މަޤާމުން އިސްތިއުފާ ދެއްވީ ޖުލައި މަހުގެ 15 ވަނަ ދުވަހުއެވެ. އިސްތިއުފާ ދެއްވަމުން ޝަރީފް ވިދާޅުވީ ވޭތުވެދިޔަ ތިން އިންތިޚާބުގައި ވެސް އިޚްލާސްތެރިކަމާއެކު މަސައްކަތް ކޮށްދެއްވުނު ކަމުގެ ހިތްހަމަ ޖެހުން ލިބިވަޑައިގަތް ކަމަށެވެ. އަދި ކުރިއަށް އޮތްތަނުގައި ވެސް ރައްޔިތުންނަށް ޚިދުމަތް ކޮށްދެއްވުމުގައި ދެމި ހުންނަވާނެ ކަމަށެވެ.
އިސްތިއުފާއާ ގުޅޭގޮތުން ރާއްޖެއެމްވީއަށް ޝަރީފް ވިދާޅުވީ، 3 އިންތިޚާބުގައި މަސައްކަތް ކުރެއްވުމުން އެއީ އިންތިޚާބުގެ ސައިކަލްއެއް ހަމަވީ ކަމަށެވެ. ކުރިން ވެސް ނިންމަވައިގެން ހުރީ ލޯކަލް ކައުސިން އިންތިޚާބަށް ފަހު އިސްތިއުފާ ދެއްވަން ކަމުގައި ޝަރީފް ވިދާޅުވިއެވެ. ދެން ބޭނުންވަނީ އިންތިޚާބުގެ ކަންކަން ރަނގަޅަށް ކުރާނެ އެހެން މީހަކަށް އެ ފުރުސަތު ދެއްވުމަށް ކަމަށް ޝަރީފް ވިދާޅުވިއެވެ. އެހެންނަމަވެސް އަދިވެސް ރައްޔިތުންނަށް ޚިދުމަތް ކުރުމަށް އެހެން ދާއިރާއަކުން ފުރުސަތު ލިބިއްޖެނަމަ އެ ފުރުސަތުގެ ބޭނުން ހިފާނެ ކަމަށް ވިދާޅުވިއެވެ.
ޤާނޫނު ބުނާ ގޮތުން އިލެކްޝަންސް ކޮމިޝަންގެ ރައީސްގެ މަޤާމު ހުސްވާތާ (ރަސްމީ ބަންދު ދުވަސް ނުހިމަނައި) 60 ދުވަހުގެ ތެރޭގައި އެ މަޤާމަށް މީހަކު އައްޔަން ކުރަން ޖެހެއެވެ. އެހެންނަމަވެސް މިނިވަން ދުވަހާއި ޢީދު ބަންދާ ދިމާކޮށް، ވަރަށް ގިނަ ދުވަސްތަކަކަށް ސަރުކާރު ބަންދުވެގެން ދިޔައެވެ. އެހެންކަމުން މި 60 ދުވަސް ވަނީ 90 ދުވަހަށް ދިގުލައިގެން ގޮސްފައެވެ.
