ލިވަޕޫލުގެ އެއްބަސްވުން ވެން ޑައިކް އާކޮށްފި

ލިވަޕޫލާއެކު ހަދާފައި އޮތް އެއްބަސްވުން ނެދަލެންޑްސްގެ އިތުބާރު ޑިފެންޑަރު ވާޖިލް ވެން ޑައިކް އާކޮށްފިއެވެ.

އުމުރުން 30 އަހަރުގެ ޑިފެންޑަރު ލިވަޕޫލާ ގުޅުނީ 2018 ވަނަ އަހަރުގެ ޖެނުއަރީ މަހު ސައުތެމްޓަން ދޫކޮށް 75 މިލިޔަން ޕައުންޑަށެވެ. އެ ފަހަރު ލިވަޕޫލާއެކު ވެން ޑައިކް ހެދި އެއްބަސްވުން ހަމަވަން އޮތީ 2023 ވަނަ އަހަރެވެ. އެކަމަކު ހުކުރު ދުވަހުގެ ވަގުތެއްގައި ލިވަޕޫލުން ވަނީ ވެން ޑައިކުގެ އެ ކުލަބުގެ އެއްބަސްވުން އާކުރިކަން އިއުލާން ކޮށްފައެވެ. ލިވަޕޫލާއެކު ވެން ޑައިކް ހެދި އައު އެއްބަސްވުމުގެ ދަށުން 2025 ވަނަ އަހަރުގެ ހޫނު މޫސުމުގެ ނިޔަލަށް އޭނާ އެ ޓީމުގައި މަޑުކުރާނެއެވެ.

އެއްބަސްވުން އާކުރުމަށްފަހު ލިވަޕޫލުގެ ރަސްމީ ވެބްސައިޓަށް ދިން އިންޓަވިއުއެއްގައި ވެން ޑައިކް ބުނީ އެ ޓީމާއެކު އައު އެއްބަސްވުމެއްގައި ސޮއިކުރުމުގެ ފުރުސަތު ލިބުމުން އުފާވާ ކަމަށެވެ. އަދި ކެރިއަރު މިހާރު އޭނާ ހުރި ހިސާބަށް ވާސިލުވުމަށް ލިވަޕޫލުން މުހިންމު ދައުރެއް އަދާކޮށްފައިވާ ކަމަށްވެސް ބުންޏެވެ.

ލިވަޕޫލުގައި ވެން ޑައިކް ތަފާތު މޮޅު ކުޅުމެއް ދައްކާފައިވާއިރު، މި ފަހުން ލިވަޕޫލުން ހޯދި ކާމިޔާބީތަކުގައި އޭނާ މުހިންމު ދައުރެއް އަދާކުރިއެވެ. އެކަމަކު ކަކުލަށް ލިބުނު އަނިޔާއެއް ސަބަބުން މިދިޔަ ސީޒަނުގެ ބޮޑުބައި ވެން ޑައިކަށް ގެއްލުމާއެކު، މިދިޔަ ސީޒަނުގައި ލިވަޕޫލުގެ ނަތީޖާތައް ވަރަށް ބޮޑަށް ދަށްވިއެވެ. ނަމަވެސް އެ އަނިޔާއިން ރަނގަޅުވެ ވެން ޑައިކް މިހާރު އަންނަނީ ލިވަޕޫލުގެ ފަރިތަކުރުންތަކުގައި ބައިވެރިވަމުންނެވެ.

ޔުއެފާއިން 2019 ވަނަ އަހަރު ހޮވި ޔޫރަޕުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައިވާ ވެން ޑައިކް ވަނީ މިހާތަނަށް ލިވަޕޫލަށް 130 މެޗު ކުޅެދީ 13 ލަނޑު ޖަހާފައެވެ. އަދި ވަނީ ލިވަޕޫލާއެކު އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.

ލިވަޕޫލުގެ އެއްބަސްވުން ވެން ޑައިކް އާކުރިއިރު، އެ ޓީމަށް ކުޅެމުން އަންނަ އިންގްލެންޑުގެ ޒުވާން ތަރި ޓްރެންޓް އަލެކްސަންޑަ-އާނޯލްޑާއި، ބްރެޒިލުގެ މިޑްފީލްޑަރު ފަބީނިއޯ އަދި ބްރެޒިލުގެ ތަޖުރިބާކާރު ގޯލްކީޕަރު އެލިސަން ބެކާވެސް ވަނީ ދާދި ފަހުން އެއްބަސްވުން ދިގު މުއްދަތަކަށް އާކޮށްފައެވެ.