ނިއުމަތުގެ ބޭނުން ހިފަން ދިވެހިންނަށް ނޭނގުނީބާ؟

މުޅި ދުނިޔެ ކުޑަކަކޫ މައްޗަށް ގެނުވި ކޮވިޑް-19 ގެ ވަބާގައި ދިވެހީން ހޭދަކުރި ދުވަސްތައް ނިމުމަކަށް އަންނަން އޮތީ ވެކްސިންގެ ބޭނުން ހިފައިގެންނެވެ.

ސައިންޓިސްޓުން އެތައް ތަހުލީލުތަކެއްކޮށް ވަގުތުތަކެއް މި ވެކްސިން އުފެއްދުމަށް ހޭދަކޮށްފައިވެއެވެ. އަދި މިއީ މިވަގުތަށް ބަލާއިރު ކޮވިޑްގެ ވަބާއިން އަރައިގަތުމަށް އޮތް ހަމައެކަނި ވަސީލަތެވެ.

ދުނިޔޭގެ އެހެން ގައުމުތަކާއި ޚިލާފަށް ދިވެހި ސަރުކާރުން ވަނީ ރާއްޖޭގައި ދިރިއުޅޭ އެންމެންއަށް ވެކްސިން ކަށަވަރުކޮށްދީފައެވެ. ރާއްޖެއަށްވުރެ އެތައް ގޮތަކުން ކުރިއަރާފައިވާ ގައުމުތައް ފަހަތަށް ޖައްސާލުމަށްފަހު ދިވެހި ސަރުކާރުން ރައްޔިތުންނަށް ވެކްސިން ކަށަވަރުކޮށްދިނުމުން އެކަމަށް ދެކޮޅުހަދާ ބަޔަކު ދިރިއުޅޭކަން ވެސް ގަބޫލުކުރަން ޖެހެއެވެ.

ރާއްޖެއަށް އެންމެ ފުރަތަމަ ލިބުނު ކޮވިޑް ވެކްސިނަކީ އިންޑިއާގެ ސެރުމް އިންސްޓިޓިއުޓްގެ ކޮވެޝީލްޑް ވެކްސިނެވެ. މި ވެކްސިން ރާއްޖެ ގެނައުމާއިއެކު ބައެއް މީހުން ވެކްސިން ނުޖަހާން ދެކޮޅު ހެދީ މިއީ އިންޑިއާގެ ވެކްސިނެކޭ ބުނެފައެވެ. އޭރު އެ މީހުން ވެކްސިން ޖަހާން ދެކޮޅު ހެދީ ވެކްސިންގެ ކޮލިޓީއާ މެދު ސުވާލު އުފައްދާފައެވެ. އެކަމަކު އެ ވެކްސިނަކީ ދުނިޔޭގެ ސިއްހަތާ ބެހޭ މައި ޖަމިއްޔާއިން އެޕްރޫވަލް ދިން ވެކްސިނެކެވެ.

އެ ވެކްސިނަށްފަހު ޗައިނާގެ ސިނޮފަރމް ވެކްސިން ރާއްޖެއަށް ގެނައެވެ. އެ ވެކްސިންގެ ކޮލިޓީއާމެދު ވެސް ބައެއް މީހުން ވަނީ ސުވާލު އުފައްދައިފައެވެ. އެކަމަކު އެ ވެކްސިނަކީވެސް ދުނިޔޭގެ ކުރިއަރާފައިވާ ބައެއް ގައުމުތަކުން ބޭނުން ކުރަމުން އައި ވެކްސިނެކެވެ.

އެންމެ ފަހުން ރާއްޖެއަށް ލިބުނު ވެކްސިނަކީ އެމެރިކާގެ ފައިޒާ ވެކްސިނެވެ. މި ވެކްސިންގެ ކޮލިޓީއާ މެދު ހަމަޔަގީނުންވެސް ސުވާލު އުފައްދާނެ ޖާގައެއް ނެތެވެ. އެހެންކަމުން މިހާރު އިވޭ އަޑަކީ ދީނުގައި ވެކްސިން ޖެހުން އެއީ އޮންނަ ކަމެއް ނޫން ކަމަށް ދެކެވޭ ވާހަކަތަކުގެ އަޑެވެ.

އިސްލާމް ދީނުގައި ވެކްސިން ޖެހުން އެއީ އޮންނަ ކަމެއް ނޫން ކަމަކަށް އެނގޭނެ އެއްވެސް ހެއްކެއް ނެތެވެ. އޭގެ ބަދަލުގައި އިސްލާމް ދީނުގައި ތިމާގެ ސިއްހަތާއި މެދު ރައްކާތެރިވުމަށް އަންގަވާފައިވެއެވެ.

ބައެއް މީހުން ވެކްސިން ނުޖަހަނީ ޖެހެން ހުރި ބައްޔެއް ޖެހޭނެ ކަމަށް ބުނެއެވެ. އެއީ ވެސް ގޯސް ވިސްނުމެކެވެ. ތިމާގެ ގަޔަށް ކޮވިޑްގެ ވައިރެސް އެރުމާއިއެކު ތިމާގެ އާއިލާ މީހުންނާއި، އެކުވެރިންވެސް އެ ބަލީގެ ނުރައްކަލަށް އެބަ ހުށަހެޅެއެވެ.

ވެކްސިންގެ ބޭނުން ހިފަން މިލިބުނު ވަގުތުގައި ވެކްސިންގެ ބޭނުން ހިފައިގެން ނޫން ގޮތަކަށް ދިވެހީންނަށް ކުރިން ދިރިއުޅެމުން އައި ދިރިއުޅުމަށް ބަދަލުވެވޭކަށް ނެތެވެ. އޭގެ ބަދަލުގައި ލިބިފައި މިވާ ނިއުމަތަށް ފުރަގަސްދޭންވީ ހެއްޔެވެ. ނޫނެކެވެ. ލިބުނު ނިއުމަތަށް ޝުކުރުކޮށް އޭގެ ބޭނުން ހިފާށެވެ.