ދިވެހި ޕްރިމިއާ ލީގުގެ ލޯގޯ ފަރުމާކޮށްގެން އެއްލައްކަ ރުފިޔާ

ދިވެހި ޕްރިމިއާ ލީގުގެ ލޯގޯ ފަރުމާކޮށްގެން އެއްލައްކަ ރުފިޔާގެ ފައިސާގެ އިނާމެއް ހޯދުމުގެ ފުރުސަތު ހުޅުވާލައިފިއެވެ.

ފުޓްބޯލް އެސޯސިއޭޝަން އިފް މޯލްޑިވްސް (އެފްއޭއެމް) އިން ބުދަ ދުވަހު ވަނީ ދިވެހި ޕްރިމިއާ ލީގުގެ ލޯގޯ ފަރުމާކުރަން ޝައުގުވެރިވާ މީހުންނަށް އެ ފުރުސަތު ހުޅުވާލާފައެވެ. އެފްއޭއެމުން މައުލޫމާތުދޭ ގޮތުން ލޯގޯ ފަރުމާކުރުމުގެ މުބާރާތް ކުރިއަށްދާނީ އަންނަ ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށެވެ.

މިއީ ރާއްޖޭގެ އެންމެ ބޮޑު ލީގުގެ ލޯގޯ ފަރުމާކުރުން މުބާރާތެއް މެދުވެރިކޮށް އާންމުންނަށް ފުރުސަތު ހުޅުވާލި ފުރަތަމަ ފަހަރެވެ. ބުދަ ދުވަހުގެރޭ އެފްއޭއެމުގެ ރައީސް ބައްސާމް އަދީލް ޖަލީލް ކުރެއްވި ޓްވީޓެއްގައި ވަނީ މިއީ ރާއްޖޭގައި ހަރަކާތްތެރިވާ އާޓް އާއި ޑިޒައިނަށް ޝައުގުވެރިވާ މީހުންނަށް އޮތް ރަނގަޅު ފުރުސަތެއް ކަމަށް ވިދާޅުވެފައެވެ.

ލޯގޯ ފަރުމާކޮށްގެން އެއްވަނައަށްދާ މީހަކަށް އެއްލައްކަ ރުފިޔާގެ ފައިސާގެ އިނާމެއް ލިބޭއިރު، އެ މީހަކާއެކު ހާއްސަ އެއްބަސްވުމެއް ހަދާނެ ކަމަށް އެފްއޭއެމުން މައުލޫމާތުދެއެވެ. އަދި އެ އެއްބަސްވުމުގެ ދަށުން ލޯގޯގެ ކޮޕީރައިޓްސް އެފްއޭއެމަށް ލިބޭ ގޮތަށް ސޮއިކުރާނެއެވެ.

ދިވެހި ޕްރިމިއާ ލީގުގެ ލޯގޯ ފަރުމާކުރުމުގެ ފުރުސަތު ހުޅުވާލިއިރު، ފުރަތަމަ ޑިވިޝަނުގެ ނަން ދިވެހި ޕްރިމިއާ ލީގުގެ ނަަމަށް ރީބްރޭންޑް ކޮށް، މިހާރު ބޭނުންކުރަމުން އަންނަ ލޯގޯ ދައްކާލީ 2015 ވަނަ އަހަރުއެވެ. ފުރަތަމަ ދެ އަހަރު އުރީދޫން ލީގު ސްޕޮންސާކުރުމާއެކު ބޭނުންކުރި ނަމަކީ އުރީދޫ ދިވެހި ޕްރިމިއާ ލީގެވެ. އެކަމަކު 2018 ވަނަ އަހަރު ދިރާގުން ލީގުގެ ސްޕޮންސާ ނެގުމާއެކު، މިހާތަނަށް ބޭނުންކުރަމުން އަންނަ ނަމަކީ ދިރާގު ދިވެހި ޕްރިމިއާ ލީގެވެ.

ދިވެހި ޕްރިމިއާ ލީގަށް އައު ލޯގޯއެއް ހަދާއިރު، ދާދި ފަހުން އެފްއޭއެމުން ވަނީ މުޅި ރާއްޖެއިން ޕްރިމިއާ ލީގުގައި ވާދަކުރެވޭނެ ފޯމެޓް ދައްކާލާފައެވެ. އެފްއޭއެމުން އިއުލާންކުރި އައު ފޯމެޓުގައިވާ ގޮތުން ދިވެހި ޕްރިމިއާ ލީގު 2023-2024 ވަނަ އަހަރުގެ ސީޒަން ފަށާނީ މިހާރުވެސް ލީގުގައި ހިމެނޭ އަށް ޓީމާއެކުއެވެ. އޭގެ އިތުރުން ދެން ހިމެނޭނީ ހަތަރު ޒޯނުގެ ޗެމްޕިއަނުންނެވެ. އެހެންކަމުން އައު ފޯމެޓާއެކު ދިވެހި ޕްރިމިއާ ލީގުގައި 12 ޓީމު ފެނިގެންދާނެއެވެ.