ލިވަޕޫލް ސަޕޯޓަރުންގެ ފެންޓަސީ ޕްރިމިއާ ލީގަށް އެއްލައްކަ ރުފިޔާ

ދިވެހި ލިވަޕޫލް ސަޕޯޓަރުންގެ ޖަމުއިއްޔާ ކަމަށްވާ "އޯއެލްއެސްސީ މޯލްޑިވްސް" އިން ރާއްޖޭގައި މިހާތަނަށް ބާއްވާ އެންމެ އަގުބޮޑު ފެންޓަސީ ޕްރިމިއާ ލީގުގައި ބައިވެރިވާން ހުޅުވާލައިފިއެވެ.

އެހެން އަގުބޮޑު ލީގުތަކާ ޚިލާފަށް މިއީ ބައިވެރިވުމަށް އެއްވެސް ފީއެއް ދައްކަން ނުޖެހޭ ގޮތަށް، ހުރިހާ ދިވެހީންނަށް ހުޅުވާލެވިގެން ކުރިއަށް ދާ ލީގެއް ކަމަށް އޯއެލްއެސްސީ މޯލްޑިވްސްއިން މައުލޫމާތުދެއެވެ.

މި ފަހަރުގެ ފެންޓަސީ ލީގަށް އޯއެލްއެސްސީ މޯލްޑިވްސްއިން އަގުބޮޑު އިނާމުތަކެއް ކަނޑައަޅާފައިވާއިރު، މުޅި މުބާރާތުން އެއްވަނައަށްދާ މީހަކަށް 50،000 (ފަންސާސް ހާސް) ރުފިޔާ ވަނީ ހުށަހަޅާފައެވެ. އަދި ދެވަނައަށްދާ މީހަކަށް 25،000 (ފަންސަވީސް ހާސް) ރުފިޔާގެ ފައިސާގެ އިނާމެއް ހުށަހަޅާފައިވާއިރު، ތިންވަނައަށްދާ މީހަކަށް ވަނީ 12،500 (ބާރަހާސް ފައްސަތޭކަ) ރުފިޔާގެ ފައިސާގެ އިނާމެއް ހުށަހަޅާފައެވެ. މީގެ އިތުރުން ކޮންމެ މަހަކުވެސް، އެ މަހެއްގެ އެއްވަނައަށް އަންނަ މީހަކަށް 1،250 (އެއްހާސް ދުއިސައްތަ ފަންސާސް) ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.

މި މުބާރާތަކީ އޯއެލްއެސްސީ އާއި ކޭބަލް ޝޮޕް ގުޅިގެން މުޅި ރާއްޖެއަށް ހުޅުވާލައިގެން ބާއްވާ މުބާރާތެކެވެ. މި މުބާރާތުގެ ގަވާއިދާއި އިތުރު މައުލޫމާތު އޯއެލްއެސްސީގެ ޕޭޖުން ލިބެން ހުންނާނެ ކަމަށް އެ ޖަމުއިއްޔާއިން މައުލޫމާތުދެއެވެ.

މީގެ އިތުރުން މިދިޔަ ސީޒަނެކޭ އެއްގޮތަށް މި ފަހަރުވެސް އޯއެލްއެސްސީ މެންބަރުންނަށް ހާއްސަކޮށްގެން ނަތީޖާ ދިމާކުރުމުގެ މުބާރަތެއްވެސް ކުރިއަށްގެންދާނެ ކަމަށާއި، އަދި މުބާރާތް ކުރިއަށްގެންދާނީ ރާއްޖޭގެ ޑިވެލޮޕަރުންތަކެއް އުފައްދާފައިވާ "ގޯލްއާ އެޕް" އާ ގުޅިގެން ކަމަށްވެސް އޯއެލްއެސްސީ މޯލްޑިވްސްއިން މައުލޫމާތުދެއެވެ. އެގޮތުން ކޮންމެ މެޗެއްގެވެސް ރަނގަޅު ނަތީޖާ ދިމާކޮށްގެން ހޮވޭ ނަސީބުވެރިއަކަށް ޕިއްޒާ ބޯނާއިން ޕިއްޒާއެއް ލިބޭނެ ކަމަށްވެސް އޯއެލްއެސްސީ މޯލްޑިވްސްއިން މައުލޫމާތުދެއެވެ. އަދި މުޅި ސީޒަނުގައި އެންމެ ގިނަ ޕޮއިންޓް ހޯދާ މީހަކަށްވެސް އިނާމެއް ދޭ ގޮތަށް ހަމަޖެހިފައިވާ ކަމަށް މައުލޫމާތުދެއެވެ.

އޯއެލްއެސްސީ މޯލްޑިވްސްއިން އަގުބޮޑު ފެންޓަސީ ޕްރިމިއާ ލީގެއް ބާއްވާއިރު، އޯއެލްއެސްސީގެ ރާއްޖޭގެ ގޮފި ރަޖިސްޓާ ކޮށްފައިވަނީ 2018 ވަނަ އަހަރުއެވެ. ލިވަޕޫލުގެ އިތުރުން ރަސްމީކޮށް ރާއްޖޭގައިވެސް ރަޖިސްޓްރީކޮށްގެން ކުރިއަށްގެންދާ އޯއެލްއެސްސީން އަންނަނީ ކުޅިވަރާއި އެހެނިހެން ގޮތްގޮތުންވެސް ރާއްޖޭގައި ހަރަކާތްތަށް ހިންގަމުންނެވެ.

އެގޮތުން މިދިޔަ އަހަރުގެ ކުރީކޮޅު އޯއެލްއެސްސީ މޯލްޑިވްސްގެ ދައުވަތަކަށް ލިވަޕޫލުގެ ކުރީގެ ވައިސް ކެޕްޓަން ޑެނިއަލް އެގާ ވަނީ ރާއްޖެ އައިސް ލިވަޕޫލުގެ ސަޕޯޓަރުންނާ ބައްދަލުކޮށްފައެވެ. މިއީ ރާއްޖޭގެ ސަޕޯޓާސް ކުލަބަކުން އިސްވެ ބޭރުގެ ކުޅުންތެރިޔަކު ގެނެސްގެން ބޭއްވި ފުރަތަމަ އިވެންޓެވެ.

މީގެ އިތުރުންވެސް އޯއެލްއެސްސީ މޯލްޑިވްސްއިން އަންނަނީ މުޅި ރާއްޖޭގައި ލިވަޕޫލް ޕްރޮމޯޓުކޮށް، ސަޕޯޓަރުންގެ މެދުގައި ގުޅުން ބަދަހިކުރުމުގެ ގޮތުން އެކި ކަހަލަ ހަފުލާތަކާއި، މުބާރާތްތަށް ބޭއްވުމުގެ އިތުރަށް، މުޖުތަމައުއަށް ފާއިދާހުރި އެކިކަންކަމުގައި ބައިވެރިވެ އެހީތެރިވަމުންނެވެ.