ފްލެޓުތަކުގެ މަސައްކަތްތައް އެއްކޮށް ނިންމަން ލޯނެއް ދޫކުރަން ފަށައިފި

ހިޔާ މަޝްރޫޢުގެ ނުނިމި ހުރި މަސައްކަތްތައް ނިންމުމަށްޓަކައި، ބީއެމްއެލް މެދުވެރިކޮށް ލުއި ލޯނެއް ދޫކުރަން ފަށާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ރައީސް ވިދާޅުވީ ހިޔާ ފްލެޓުގެ މަސައްކަތްތައް ނިންމުމަށް މާލީ ގޮތުން ގިނަ ބަޔަކަށް ގޮންޖެހުންތަކެއް ހުރިކަން ފާހަގަކުރެވިފައވާ ކަމަށެވެ. މިކަމަށް ހައްލެއް ހޯދައިދިނުމަށް ބީއެމްއެލް މެދުވެރިކޮށް ލޯނެއް ދޫކުރަން ފަށާފައިވާކަމަށާއި، މިހާރު އެ ލޯނަށް އެޕްލައި ކުރެވޭނެ ކަމަށް ރައީސް ވިދާޅުވިއެވެ. އަދި ބީއެމްއެލް މެދުވެރިކޮށް އެ ފަރާތްތަކަށް އެ ފައިސާ ލިބިގެންދާނެ ކަމަށް ރައީސް ވަނީ ވިދާޅުވެފައެވެ.

މީގެ އިތުރުން ތިން މަސް ތެރޭގައި ހިޔާ ފްލެޓުގެ ފިނިޝިން މަސައްކަތްތައް ނުނިމޭނެ ކަމުގެ ޝަކުވާ ލިބިފައިވާކަމަށް ރައީސް ވިދާޅުވިއެވެ. މިކަމާ ގުޅިގެން އެޗްޑީސީއާ ވާހަކަދައްކަވާފައިވާ ކަމަށާއި، މި ކުރެވުނު މަޝްވަރާތަކަށް ފަހު އެޗްޑީސީން ނިންމާފައިވަނީ މި އަހަރުގެ ޑިސެމްބަރުގެ ނިޔަލަށް ކުލި ނެގުން ފަސްކޮށްލަން ކަމަށް ރައީސް ވިދާޅުވިއެވެ. މިއާއެކު ކުރިން އޮތް މުއްދަތަށްވުރެ އިތުރު ތިން މަސް އިތުރުވެފައިވާކަމަށް ރައީސް ވިދާޅުވިއެވެ.

މި ތަނުން ކުލި ނަގާ މުއްދަތު ފަސްކުރުމުން ވެސް ދައުލަތުގެ ބަޖެޓުން ފައްސަތޭކަ މިލިއަނަށްވުރެ ގިނަ ރުފިޔާ ޚަރަދު ކުރަންޖެހޭކަން ރައީސް ފާހަގަކުރެއްވިއެވެ. މިހާރު ފްލެޓުތައް ދޫކުރާ ރޭޓުގައި ފްލެޓުތައް ދިނީމަ ދައުލަތުގެ ބަޖެޓުން ތިން ބިލިއަނަށްވުރެ ގިނަ ރުފިޔާ ހޭދަކުރަންޖެހޭކަން މީގެ ކުރިން ހާމަކޮށްފައިވާނެ ކަމަށް ވެސް ރައީސް ވިދާޅުވިއެވެ.

ހިޔާ ފްލެޓުތަކުގެ މަސައްކަތްތައް ނިމި، އެ ތަންތަނުގެ ތަޅުދަނޑި ފްލެޓު ލިބުނު ފަރާތްތަކާ ހަވާލުކޮށްފައިވާއިރު، މިހާރު ކުރިއަށްދަނީ އެ ތަންތަނުގެ ފިނިޝިން ކަންކަން ނިންމުމުގެ މަސައްކަތެވެ. ފިނިޝިން މަސައްކަތް ނިންމާ މުއްދަތުގައި އެތަނުން ކުއްޔެއް ނުނަގާނެއެވެ.