ހޫނު ގަދަވުމުގެ ސަބަބުން އަލްޖީރިއާގެ އިރުމަތީގައި ރޯވަމުންދާ އަލިފާނުގެ ސަބަބުން 42 މީހުން މަރުވެއްޖެ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން އަލިފާނުގެ ސަބަބުން މަރުވި މީހުންގެ ތެރޭގައި 25 ސިފައިން ހިމެނެއެވެ. އަދި އަލިފާން ނިއްވުމަށް މަސައްކަތް ކުރަމުން އަންނަ އިތުރު ސިފައިންނަށް އަނިޔާވެފައިވާ ކަމަށް ވެސް ރިޕޯޓްތައް ބުނެއެވެ.

އަލްޖީރިއާގެ 17 ޕްރޮވިންސްއަކުން 100ށް ވުރެ ގިނަ ސަރަހައްދުގައި އަލިފާން ރޯވެފައިވާއިރު، އަލިފާން ނިއްވުމުގެ މަސައްކަތުގައި ހަރަކާތްތެރި ވަނިކޮށް މަރުވި ސިފައިންނަށް އެގައުމުގެ ރައީސް އަބްދުލްމަޖީދު ތަބޫން ވަނީ ތައުރީފްކުރައްވާފައެވެ. އަދި މަރުވި ސިފައިން ވަނީ އަލިފާން ރޯވި ސަރަހައްދުތަކުގައި ދިރިއުޅެމުންދިޔަ 100ށް ވުރެ ގިނަ މީހުން ސަލާމަތް ކޮށްދީފައި ކަމަށް ވިދާޅުވިއެވެ.

އަލްޖީރިއާގެ ފިނިހޫނުމިން 46 ޑިގްރީ ސެލްސިއަސްއަށްވުރެ މަތިވެފައިވާއިރު، ކުރިޔަށް އޮތް ދުވަސްތަކުގައި އެގައުމުގެ އިތުރު ހިސާބުތަކުގައި އަލިފާން ރޯވުމުގެ ފުރުސަތު އެބައޮތް ކަމަށް ރިޕޯޓްތައް ބުނެއެވެ.