ހަރުކަށި ފިކުރަށް ހޭލުންތެރިކަން އިތުރު ކުރުމާ ގުޅޭ ޚާއްސަ ޕްރޮގްރާމްތަކެއް އިސްލާމިކް މިނިސްޓްރީން ހިންގުމަށް ނިންމާފައިވާކަމަށް މެއި 6 ކޮމިޓީގެ މުޤައްރިރު އަދި ވިލުފުށީ ދާއިރާގެ މެމްބަރު ޙަސަން ޢަފީފު ވިދާޅުވެއްޖެއެވެ.

ބުދަ ދުވަހުގެެރޭ އޮތް އެމްޑީޕީގެ ޤައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުން ޢަފީފް ވިދާޅުވީ، ކޮމިޓީގެ އެންމެ މުހިންމު މަސައްކަތަކީ, ރައީސް ނަޝީދަށް އަމާޒުކޮށް ދިން ޙަމަލާގެ ތަހުގީގު ކުރިއަށްދާ ގޮތް ބެއްލެވުމަށްފަހު އެ މައުލޫމާތުތައް ޤައުމީ މަޖިލީހާ ހިއްސާ ކުރެއްވުން ކަމަށެވެ. އެގޮތުން ނިމިދިޔަ ހަފްތާގައި ފުލުހުންނާ ބައްދަލު ކުރައްވައި، ތަހުގީގު ގޮސްފައިވާ ހިސާބު އޮޅުންފިލުވާފައިވާނެ ކަމަށާއި, އަދި އެ މައުލޫމާތުތައް ޤައުމީ މަޖިލީހާވެސް ހިއްސާ ކުރައްވާފައިވާނެކަން ޢަފީފް ފާހަގަ ކުރެއްވިއެވެ.

މެމްބަރު ވިދާޅުވީ، 241 ކޮމިޓީގެ ރިޕޯޓުގައި ބަޔާންކޮށްފައިވާ ރެކޮމެންޑޭޝަންތަކާ ގުޅިގެން ކުރަންޖެހޭ މަސައްކަތްތައް ކުރަމުންދާ ކަމަށެވެ. އެގޮތުން އިސްލާމިކް މިނިސްޓްރީއާވެސް ބައްދަލު ކުރައްވައި، ހަރުކަށި ފިކުރަށް މީހުން ލެނބެމުންދާ ދިއުން ހުއްޓުވުމަށް މިނިސްޓްރީން ކުރަމުންދާ މަސައްކަތްތައް އޮޅުންފިލުވާފައިވާނެކަމަށް އޭނާ ވިދާޅުވިއެވެ. ބުދަ ދުވަހު އޮތް މި ބައްދަލު ކުރެއްވުމުގައި އިސްލާމިކް މިނިސްޓަރ ޑރ އަޙުމަދު ޒާހިރު ޙުސައިންވެސް ބައިވެރިވެވަޑައިގެންކަން މެމްބަރު ފާހަގަ ކުރެއްވިއެވެ.

ޢަފީފް ވިދާޅުވީ، އިސްލާމް ދީނުގައި ވަކި އުސޫލުތަކެއް އޮންނައިރު ވަކި މީހަކީ މަރަންޖެހޭ މީހެއްކަމަށް ދޭހަވާގޮތަށް ވާހަކަ ނުދެއްކޭނެކަން މި ބައްދަލުވުމުގައި މިނިސްޓްރީންވެސް ފާހަގަކޮށްފައިވާ ކަމަށެވެ. އަދި އެކަންކަން ރައްޔިތުންނަށް އިތުރަށް ސާފު ކޮށްދިނުމަށް ޕްރޮގްރާމެއް ހިންގުމަށް މިނިސްޓްރީން ރާވާފައިވާކަމަށެވެ.

މެމްބަރު ވިދާޅުވީ، ބޮޑެތި ޖަރީމާތައް ހިންގާ މީހުން ޖަލަށް ލުމުން، ހަރުކަށި ފިކުރުގެ މީހުންނާ އެއްވެގެންދާ ކަމަށެވެ. އަދި އެކަމުގެ ސަބަބުންވެސް ހަރުކަށި ފިކުރު ފެތުރެމުންދާ ކަމަށެވެ. އަދި މިކަންކަން ހައްލު ކުރުމަށް އެމީހުން ރަނގަޅަށް މުޖުތަމައަށް ނެރުމާއި، ރިހެބިލިޓޭޓު ކުރުމުގެ މަސައްކަތް, ފުލުހުންގެ އިންޓެލިޖެންސްއާ ގުޅިގެން މިނިސްޓްރީން ކުރާނެކަމުގެ މައުލޫމާތު ލިބިފައިވާކަމަށެވެ. އަދި މިއީ ގޮންޖެހުންތަކެއް ހުރި ކަމެއްކަންވެސް, މިނިސްޓްރީއާ ހަވާލާދީ މެމްބަރު ވިދާޅުވިއެވެ.

ދީނުގެ ކަންކަން އޮންނަ ގޮތް ހާމަަކަން ބޮޑުކޮށް ރައްޔިތުންނަށް އެންގުމާއި ހޭލުންތެރިކަން އިތުރު ކުރުމަށް ކުރަންޖެހޭ މަސައްކަތްތަކުގައި ބަޖެޓުގެ ދަތިކަން އޮތްކަން މިނިސްޓްރީން މެއި 6 ކޮމިޓީއާ ވަނީ ހިއްސާކޮށްފައެވެ. އަދި ސްކޫލް ދައުރުގައި ހަރުކަށި ފިކުރު ފެތުރުން ހުއްޓުވުމަށް ކުރަންޖެހޭ މަސައްކަތްތަކަށްވެސް ޚާއްސަ ޕްރޮގްރާމްތަކެއް ހިންގުމަށް މަޝްވަރާ ކުރެވުނުކަން މެމްބަރު ފާހަގަ ކުރެއްވިއެވެ. މެމްބަރު ވިދާޅުވީ، މި މަސައްކަތުގައި ބޭރުގެ އިލްމުވެރިންގެ އެހީވެސް ހޯއްދަވާނެ ކަމަށެވެ.