"މިއަދު އަޅުގަނޑު އެމްޑީޕީގެ މެމްބަރަކަށް ވެސް ނުވަނީތޯއޭ"
ޕާޓީ އެކަތިގަނޑެއްގެ ގޮތުގައި ހިފެހެއްޓުމަށް މަސައްކަތް ކުރައްވާނެ
އެމްޑީޕީގެ ޕީޖީ ލީޑަރު ކަމުގައި ރައީސް ހުންނެވިއިރު އެމްޑީޕީން ކުރިއަށް ގެންދިޔަ ޙަރަކާތެއްގެ ތެރެއިން
ރައީސް ސޯލިޙަކީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ މެމްބަރެއްކަމާއިމެދުވެސް ޝައްކު އުފެދިފައިވާކަމަށް އެމްޑީޕީ ތެރޭގައި ދެކެވެމުންދާ ވާހަކައަށް އެމަނިކުފާނު ރައްދު ދެއްވައިފިއެވެ.
ބުދަ ދުވަހު އޮތް ނޫސްވެރިންގެ ބައްދަލުވުމުގައި އެކަމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ސޯލިޙު ވިދާޅުވީ، އެމަނިކުފާނަކީ ފެށުނީއްސުރެ އެމްޑީޕީގެ މެމްބަރެއް ކަމަށާއި، މިއަދުވެސް ހުންނެވީ އެމްޑީޕީގެ މެމްބަރެއްގެ ގޮތުގައި ކަމަށެވެ. އެގޮތުން އެމްޑީޕީ އުފެއްދުމަށް ސޮއި ކުރެއްވި ފުރަތަމަ 40 މީހުންގެ ތެރެއިން ދެވަނައަށް ސޮއި ކުރެއްވީ އެމަނިކުފާނުކަން ރައީސް ސޯލިޙު ފާހަގަ ކުރެއްވިއެވެ.
ރައީސް ވިދާޅުވީ، އެމަނިކުފާނުގެ ސިޔާސީ މަސައްކަތްޕުޅު ފެށިގެން އައީ އެމްޑީޕީން ކަމަށާއި، އެމަނިކުފާނު ދެމިހުންނަވާނީވެސް އެމްޑީޕީގައި ކަމަށެވެ. އަދި 2008ން ފެށިގެން ރައްޔިތުން ހޮވަމުން އައިސްފައިވަނީ ކޯލިޝަން ސަރުކާރެއް ކަމަށާއި، މިއަދުވެސް އޮތީ ކޯލިޝަން ސަރުކާރެއް ކަމަށެވެ. ވުމާއެކު އެމަނިކުފާނުވެސް ވެރިކަން ކުރައްވާނީ ކޯލިޝަން ސަރުކާރާއެކު ކަމަށް އެމަނިިކުފާނު ވިދާޅުވިއެވެ. އަދި މަޝްވަރާ ކުރައްވަން ޖެހިވަޑައިގަންނަވާ ކަންކަމުގައި ކޯލިޝަނާ މަޝްވަރާ ކުރައްވާނެ ކަމަށާއި، އެއީ ނުފޫޒެއް ނޫންކަމަށް އެމަނިކުފާނު ވިދާޅުވިއެވެ.
އެމްޑީޕީގެ މިވަގުތު އެންމެ އިސް ލީޑަރުގެ ހައިސިއްޔަތުން ޕާޓީ ބައިބައިވިޔަ ނުދިނުމަށް އަޅުއްވަން ޖެހިވަޑައިގަންނަވާ ހުރިހާ ފިޔަވަޅެއްވެސް އެމަނިކުފާނު އަޅުއްވާނެ ކަމަށް ރައީސްގެ ވާހަކަފުޅުގައި ފާހަގަ ކުރެއްވިއެވެ. އެގޮތުން ޕާޓީގެ އެތެރޭގައި ބައިބައިވުން އުފެދޭ ފަދަ ކަމެއް އައުމުން އެކަމެއް ޙައްލު ކުރައްވާނެކަން ފާހަގަ ކުރައްވައި ރައީސް ވަނީ ވިލުފުށީ ދާއިރާގެ މެމްބަރު ޙަސަން އަފީފް ދެއްކެވި ވާހަކައަށް ރައްދު ދެއްވާފައެވެ. އެގޮތުން ރައީސް ސޯލިޙު ނިސްބަތްވެވަޑައިގަންނަވާ ޕާޓީވެސް އޮޅިވަޑައިގެންފައިވާކަމަށް ދޭހަވާ މޭރުމަކުން މެމްބަރު އަފީފް ވާހަކަ ދައްކަވާފައިވާއިރު، ރައީސް ވިދާޅުވީ، އެފަދަ ވާހަކައެއް ދެއްކެވުމުން އެކަމުގެ ހަގީގަތް ބައްލަވަން ޖެހިވަޑައިގަންނަވާނެ ކަމަށެވެ.
ރައީސް ވިދާޅުވީ، އެކަމާ ގުޅޭގޮތުން އެމްޑީޕީގެ ޗެއަރޕަރސަން ޙަސަން ލަތީފާއި، ޕީޖީ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމަށްވެސް ގުޅުއްވި ކަމަށެވެ. އަދި މެމްބަރު އަފީފް ދެއްކެވި ވާހަކަތަކުގެ ހަގީގަތް ބައްލަވައިދެއްވުމަށް އެދިވަޑައިގަންނަވާފައިވާނެ ކަމަށް ރައީސް ވިދާޅުވިއެވެ. ރައީސް ވަނީ އެފަދަ ކަންކަން ޕާޓީގެ ތެރެއިން ވިޔަދީގެން ނުވާނެކަން ފާހަގަ ކުރައްވައި، ޕާޓީގެ ތެރޭގައި މައްސަލަތައް އުފެދޭ ގޮތްގޮތަށް ސީނިއަރ ލެވެލްގެ ބޭފުޅުން އަމަލު ކުރެއްވުން ރަނގަޅު ނޫންކަމަށް ވިދާޅުވެފައެވެ. އަދި މިއަދު އެމަނިކުފާނު އެމްޑީޕީ މެމްބަރަކަށްވެސް ނުވަނީތޯ ސުވާލު ކުރެއްވިކަން ރައީސްގެ ވާހަަކަފުޅުގައި ފާހަގަ ކުރެއްވިއެވެ.
ރައީސް ވަނީ އެމްޑީޕީގެ އެތެރޭގެ ހަމަޖެހުން ޤާއިމުކޮށް، ޕާޓީ އެކަތިގަނޑެއްގެ ގޮތުގައި ހިފެހެއްޓުމަށް ކުރައްވަން ޖެހިވަޑައިގަތް ކޮންމެ ކަމެއް ކުރައްވާނެކަމުގެ ޔަޤީންކަން ދެއްވާފައެވެ.
