ދައުލަތުގެ ލޯނުތައް އަނބުރާ ދެއްކުމަށް 626.9 މިލިއަން ރުފިޔާ ހޭދަކޮށްފި

ދައުލަތުގެ ލޯނުތައް އަނބުރާ ދެއްކުމަށް ޖުލައި މަހުގެ 29ގެ ނިޔަލަށް 626.9 މިލިއަން ރުފިޔާ ހޭދަކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.

ޖުލައި މަހުގެ 29ގެ ނިޔަލަށް ދައުލަތަށް ލިބުނު އާމްދަނީ އާއި ދައުލަތުގެ ޚަރަދުތަކުގެ ތަފާސްހިސާބުތައް ފިނޭންސް މިނިސްޓްރީން އާންމުކޮށްފައިވާއިރު، މި މުއްދަތުގެ ތެރޭގައި މަލްޓިލެޓެރަލް އެޖެންސީތަކަށް ސަބްސްކްރިޕްޝަންގެ ގޮތުގައި 6.7 މިލިއަން ރުފިޔާ ވަނީ ޚަރަދުކޮށްފައެވެ. އަދި ސޮވެރިން ޑިވެލޮޕްމެންޓް ފަންޑަށް 159.2 މިލިއަން ރުފިޔާ ޖަމާކޮށްފައިވާ ކަމަށް ފިނޭންސްއިން ބުނެއެވެ.

Advertisement

އޭގެ އިތުރުން ފިނޭންސްއިން އާންމުކޮށްފައިވާ ތަފާސްހިސާބުތައް ދައްކާގޮތުން ކައުންސިލްސް ބްލޮކް ގްރާންޓް ޑިސްބާސްމެންޓްގެ ގޮތުގައި 778.1 މިލިއަން ރުފިޔާ ވަނީ ދައުލަތުގެ ބަޖެޓުން ހޭދަކޮށްފައެވެ.

ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީއެސްއައިޕީ)ގެ މަޝްރޫއުތަކަށް ޖުލައި 29ގެ ނިޔަލަށް 1.6 ބިލިއަން ރުފިޔާ ޚަރަދުކޮށްފައިވާ ކަމަށް ފިނޭންސްގެ ތަފާސްހިސާބުތައް ދައްކާއިރު، އެންމެ ބޮޑު ހޭދައެއް ކޮށްފައި ވަނީ ދަތުރުފަތުރުގެ އެކި މަޝްރޫއުތަކަށެވެ. އެއީ 396.6 މިލިއަން ރުފިޔާއެވެ. އޭގެ ތެރޭގައި ބަނދަރުގެ މަޝްރޫއުތަކަށް ހޭދަކޮށްފައިވާ 253.2 މިލިއަން ރުފިޔާއާއި ބްރިޖުގެ މަޝްރޫއުތަކަށް ހޭދަކޮށްފައިވާ 29.3 މިލިއަން ރުފިޔާގެ އިތުރުން އެއަރޕޯޓް ތަރައްގީކުރުމުގެ މަޝްރޫއުތަކަށް ހޭދަކޮށްފައިވާ 59.6 މިލިއަން ރުފިޔާ އަދި ޕޯޓުތައް ތަރައްގީކުރުމަށް ހޭދަކޮށްފައިވާ 2.5 މިލިއަން ރުފިޔާ ހިމެނެއެވެ.

އޭގެ އިތުރުން ފެނާއި ނަރުދަމާގެ އެކި މަޝްރޫއުތަކަށް 323 މިލިއަން ރުފިޔާ ޚަރަދުކޮށްފައިވާ އިރު، ސިއްހީ އަދި އިޖުތިމާއީ އެކި ކަންކަމަށް 231.6 މިލިއަން ރުފިޔާ ވަނީ ޚަރަދުކޮށްފައެވެ.

މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އަހަރުގެ މިހާތަނަށް ދައުލަތަށް އާމްދަނީގެ ގޮތުގައި ލިބިފައި ވަނީ 9.9 ބިލިއަން ރުފިޔާއެވެ. އަދި ދައުލަތުގެ ބަޖެޓުން 15.2 ބިލިއަން ރުފިޔާ ވަނީ ޚަރަދުކޮށްފައެވެ.