ޖުލައި 29ގެ ނިޔަލަށް ދައުލަތަށް އާމްދަނީގެ ގޮތުގައި 9.9 ބިލިއަން ރުފިޔާ

ޖުލައި 29ގެ ނިޔަލަށް ދައުލަތަަށް އާމްދަނީގެ ގޮތުގައި 9.9 ބިލިއަން ރުފިޔާ ލިބިފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސުން އާންމުކުރާ ތަފާސްހިސާބުތައް ދައްކާގޮތުން ޖުލައި 29ވަނަ ދުވަހުގެ ނިޔަލަށް ދައުލަތަށް އާމްދަނީގެ ގޮތުގައި ލިބުނު 9.9 ބިލިއަން ރުފިޔާ އަކީ ފާއިތުވި އަހަރުގެ މި މުއްދަތުގައި ދައުލަތަށް އާމްދަނީގެ ގޮތުގައި ލިބުނު 8.7 ބިލިއަން ރުފިޔާއާ އަޅާބަލާއިރު 1.2 ބިލިއަން ރުފިޔާ އިތުރު އަދަދެކެވެ.

Advertisement

މި އަހަރު ދައުލަތަށް ޓެކުހުގެ ގޮތުގައި ލިބިފައި ވަނީ 7.5 ބިލިއަން ރުފިޔާއެވެ. މިއީ ފާއިތުވި އަހަރުގެ މި މުއްދަތުގައި ޓެކުހުން ލިބުނު 6.1 ބިލިއަން ރުފިޔާއާ އަޅާބަލާއިރު، 1.4 ބިލިއަން ރުފިޔާ އިތުރު އަދަދެކެވެ.

މި އަހަރުގެ މި މުއްދަތުގައި ދައުލަތަށް ޓެކްސް ނޫން އެހެނިހެން ގޮތްގޮތުން 2.4 ބިލިއަން ރުފިޔާ ލިބިފައިވާއިރު، ފާއިތުވި އަހަރުގެ މި މުއްދަތުގައި ޓެކްސް ނޫން އެހެނިހެން ގޮތް ގޮތުން ދައުލަތަށް ލިބިފައި ވަނީ 2.2 ބިލިއަން ރުފިޔާއެވެ.

ފިނޭންސްގެ ތަފާސްހިސާބުތައް ދައްކާގޮތުން ފާއިތުވި އަހަރުގެ މި މުއްދަތުގައި ކެޕިޓަލް ރިސީޕްޓްގެ ގޮތުގައި 5.3 މިލިއަން ރުފިޔާ ލިބުނު އިރު، މި އަހަރުގެ މި މުއްދަތުގައި ކެޕިޓަލް ރިސީޕްޓްގެ ގޮތުގައި ލިބިފައި ވަނީ 9 މިލިއަން ރުފިޔާއެވެ. އަދި މި އަހަރު ގްރާންޓްސްގެ ގޮތުގައި 87.2 މިލިއަން ރުފިޔާ ލިބުނު އިރު، ފާއިތުވި އަހަރު ގްރާންޓްސްގެ ގޮތުގައި 475.3 މިލިއަން ރުފިޔާ ވަނީ ލިބިފައެވެ.

މި އަހަރުގެ މިހާތަނަށް ސަރުކާރުން 15.2 ބިލިއަން ރުފިޔާ ޚަރަދުކޮށްފައިވެއެވެ. އެއީ ރިކަރެންޓް އެކްސްޕެންޑިޗަރގެ ގޮތުގައި 11.6 ބިލިއަން ރުފިޔާ އާއި ކެޕިޓަލް އެކްސްޕެންޑިޗަރގެ ގޮތުގައި 3.6 ބިލިއަން ރުފިޔާއެވެ. ފާއިތުވި އަހަރުގެ މި މުއްދަތުގައި ސަރުކާރުން ވަނީ ރިކަރެންޓް އެކްސްޕެންޑިޗަރގެ ގޮތުގައި 10.8 ބިލިއަން ރުފިޔާ އާއި ކެޕިޓަލް އެކްސްޕެންޑިޗަރގެ ގޮތުގައި 4.8 ބިލިއަން ރުފިޔާ ހިމެނޭގޮތުން ޖުމްލަ 15.6 ބިލިއަން ރުފިޔާ ޚަރަދުކޮށްފައެވެ.

ލޯނު ރިޕޭމެންޓްގެ ގޮތުުގައި މި އަހަރުގެ މިހާތަނަށް 626.9 މިލިއަން ރުފިޔާ ޚަރަދުކޮށްފައިވާއިރު، ޕީއެސްއައިޕީ މަޝްރޫއުތަކަށް 1.6 ބިލިއަން ރުފިޔާ ވަނީ ޚަރަދުކޮށްފައެވެ.