ރިޟްވާނުގެ މައްސަލައަށް އިންސާފު ނުލިބި 7 އަހަރު

ރަހީނުކޮށް މަރާލާފައިވާ ނޫސްވެރިޔާ އަހުމަދު ރިޟްވާނު ގެއްލުވާލިތާ 7 އަހަރު ފުރުމާ ގުޅިގެން އާއިލާގެ ފަރާތުން ރިޟްވާނުގެ ހަނދާނުގައި ޚާއްސަ ހަފްލާއެއް ކުރިއަށް ގެންގޮސްފިއެވެ.

ދައުލަތުގެ ބައެއް ވެރިންނާއި، މަޖިލިސް މެމްބަރުންގެ އިތުރުން، ރިޟްވާނުގެ އާއިލާއާއި ގާތް ރައްޓެހިން ބައިވެރިވި މި ހަފްލާ ކުރިއަށް ގެންދިޔައީ އާދީއްތަ ދުވަހު ޖޭޒް ކެފޭގައެވެ. މި ރަސްމިއްޔާތުގައި ވާހަކަ ދައްކަވަމުން ރިޟްވާނުގެ ދައްތަ ފަޒްނާ ބުނީ، މި މައްސަލައިގައި ހެކިބަސް ދޭން ތިބި މީހުންނަށްވެސް އެކިކަހަލަ ގޮންޖެހުންތައް ހުރުމުން އެމީހުން ހެކިބަސް ދޭން ޖެހިލުންވާ ކަމަށެވެ. އަދި ހަނު ހުރުމުގެ ހައްގަކީ ޤާނޫނުގެ ދަށުން ލިބިދޭ ހައްގެއް ނަމަވެސް، އެ ހައްގު ބޭނުން ކުރުމުގައި ވަކި ހަމަތަކަކާއި އުސޫލުތަކެއް ހުންނަންޖެހޭކަން އޭނާ ފާހަގަކުރިއެވެ.

ފަޒްނާ އެހެން ވިދާޅުވެފައިވާއިރު، ރިޟްވާނުގެ މައްސަލައިގައި ތަކުރާރުކޮށް މަރު ކޮމިޝަނުން ސުވާލު ކުރުމުންވެސް ކުރީގެ ރައީސް ޢަބްދުﷲ ޔާމީން ހަނު ހުންނެވުމުގެ ސަބަބުން ގިނަ ބަޔަކު ވަނީ އެކަމަށް ފާޑުކިޔާފައެވެ.

މި ހަފްލާގައި ވާހަކަ ދައްކަވަމުން ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރ މުޙައްމަދު ވަޙީދު (ވައްޑެ) ވިދާޅުވީ، ރިޟްވާނު ގެއްލުވާލިތާ 7 އަހަރުވެފައިވާއިރު، މި މައްސަލައަށް އަދިވެސް އިންސާފު ލިބިފައިނުވުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. އަދި މި މައްސަލާގައި އިންސާފު ހޯދައިދިނުމަށް ރިޟްވާނުގެ އާއިލާއިން ކުރަމުންދާ ބުރަ މަސައްކަތުގެ ނަތީޖާއެއްގެ ގޮތުން، ރާއްޖޭގައި އެފަދައިން ހިނގަމުންދާ ނޭއްގާނީ އެތައް ކަމެއް ތިލަވަމުންދާ ކަމަށެވެ.

ވައްޑެ ވިދާޅުވީ، މީގެ ކުރިން ހައްޔަރު ކޮށްފާނެ ކަމުގެ ބިރު އޮންނައިރު، ހައްޔަރުކުރަން އަންނާނީ ދައުލަތުގެ މުވައްޒަފެއްކަން ޔަގީން ކުރެވޭ ކަމަށެވެ. ނަމަވެސް މިއަދު އެފަދަ ކަމެއް ހިނގާނީ އަދި ހަމަލާއެއް އަމާޒުވާނީ ކާކުގެ ފަރާތުންކަން އަންދާޒާވެސް ނުކުރެވޭކަމަށެވެ.

މި ރަސްމިއްޔާތުގައި ވާހަކަ ދައްކަވަމުން ހިންނަވަރު ދާއިރާގެ މެމްބަރު ޖީހާން މަޙުމޫދާއި، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވަނީ ރިޟްވާނުގެ ބައެއް ހަނދާންތައް ހިއްސާ ކުރައްވައި، މި މައްސަލައަށް އިންސާފު ނުލިބި ލަސްވަމުންދާކަމުގެ ކަންބޮޑުވުން ފާޅު ކުރައްވާފައެވެ. އެގޮތުން އިންތިގެ ވާހަކައިގައި ވަނީ މި މައްސަލަ އެންމެ ރަނގަޅަށް ތަހުގީގު ކުރުމަށް ދައުލަތުގެ މައްޗަށް ލާޒިމުކަމަށް ވިދާޅުވެފައެވެ.

ރިޟްވާން މަރާލުމުގައި ދީނީ ހަރުކަށި މީހުން ހިމެނޭ ކަމަށާއި އެކަމުގައި ފުލުހުންގެ ބައިވެރިވުން ހިމެނޭކަމަށް މަރު ކޮމިޝަނުން ވަނީ ހާމަކޮށްފައެވެ. ރިލްވާން ގެއްލިފައިވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުއެވެ. މި މައްސަލައަށް 7 އަހަރު ވެފައިވާއިރު، އެކަމަށް އިންސާފު ހޯދައިދީ, މި ނުބައި އަމަލުތަކުގައި ބައިވެރިވި މީހުން ޤާނޫނުގެ ކުރިމައްޗަށް ގެނައުމަށް އަދިވެސް އާއިލާއިން ދަނީ ގޮވާލަމުންނެވެ.