އަހަރެއްގެ މެދުކެނޑުމަކަށްފަހު "މެޓް ގާލާ 2021" ސެޕްޓެމްބަރު 13 ގައި ބޭއްވުމުގެ ތައްޔާރީތައް ވާން ފަށައިފިއެވެ.

ކޮވިޑްގެ ބަލިމަޑުކަމާއެކު 2020 ވަނަ އަހަރުގެ ގާލާ އިވެންޓްވަނީ ކެންސަލްކޮށްފައެވެ. މި އަހަރުގެ ގާލާ އިވެންޓަށް ދައުވަތު ދެވިފައިވާ ހުރިހާ ތަރިން ވެސް ވެކްސިން ފުރިހަމަކުރުމަށް ވަނީ މަޖުބޫރުކޮށްފައެވެ. އަދި އިވެންޓް ކުރިއަށްދާއިރު، އިންޑޯރގައި މާސް އެޅުމަށް ވެސް ވަނީ މަޖުބޫރުކޮށްފައެވެ.

މި އަހަރުގެ ގާލާގެ ތީމްއަކީ "އިން އެމެރިކާ: އަ ލެކްސިކަން އޮފް ފެޝަން" އެވެ. މި އިވެންޓް ހުށަހަޅައިދޭ ތަރިންގެ ތެރޭގައި، ލަވަކިޔުންތެރިޔާ ބިލީ އެލިޝް، މަޝްހޫރު ޓެނިސް ކުޅުންތެރިޔާ ނައީމީ އޮސްކާ، އެމެރިކާގެ ރައީސް ޖޯ ބައިޑަންގެ ހުވާކުރުމުގެ ރަސްމިއްޔާތުން ގިނަ ބައެއްގެ ސަމާލުކަން ހޯދި، މަޝްހޫރު ޕޮއެޓް އަމާންޑާ ގޯމަން، ފިލްމީ ތަރި ތިމޮތޭ ޝަލަމޭ، ޑިޒައިނަރ ޓޮމް ފޯރޑް އަދި އެޑިޓަރ އަނާ ވިންޓޯ އެވެ.

ގާލާގެ ތާރީޚުގައި ވެސް މި އަހަރަކީ ވަކި ޚާއްސަ ޝެފުންނާއެކު ގާލާގެ މެނޫ ތައްޔާރުކުރާ އަހަރެކެވެ. މުޅި މެނޫ ބިނާވަނީ ފަތްޕިލާވެލީގެ ބާވަތްތަކަށެވެ. މިހާރުވަނީ މި އިވެންޓަށް ޚާއްސަކޮށް 10 ޝެފުން ވެސް ކަނޑައަޅާފައެވެ.

މި އިވެންޓްގައި ތަރިން އަޅާ ހެދުންތަކަށް ގިނަ ބައެއްގެ ސަމާލުކަން ހުއްޓެއެވެ.