ރިލްވާނު ގެއްލުނު މައްސަލައިގައި ކުރީގެ ސީޕީ މަރު ކޮމިޝަނަށް ހާޒިރުކޮށްފި
7 އޯގަސްޓު 2021 | ހޮނިހިރު 10:48މި މައްސަލައިގައި ސުވާލުކުރުމަށް ރައީސް ޔާމީން ވެސް ވަނީ ހާޒިރުކޮށްފައި
ކުރީގެ ކޮމިޝަނަރ އޮފް ޕޮލިސް ހުސައިން ވަހީދު
މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲ ގެއްލުވާލި މައްސަލައާއި ގުޅިގެން ކުރީގެ ކޮމިޝަނަރ އޮފް ޕޮލިސް ހުސައިން ވަހީދު މަރު ކޮމިޝަނަށް ހާޒިރުކޮށްފިއެވެ.
މަރާލާފައިވާ މީހުންނާއި ގެއްލުވާލާފައިވާ މީހުންނާބެހޭ ކޮމިޝަނަށް ކުރީގެ ސީޕީ ވަހީދު ހާޒިރުކޮށްފައިވަނީ ރިލްވާން ގެއްލުވާލި މައްސަލައިގެ ތަހުގީގަށް މަގާމުގެ ނުފޫޒު ބޭނުންކޮށްގެން ހުރަސް އެޅުމުންނެވެ. މިކަމުގައި އެކަށިގެންވާ ވަރުގެ ތަހުގީގެއް ހިންގާފައިނުވާތީ ކޮމިޝަނުން އޭނާއާ ސުވާލުކޮށްފައިވާކަމަށް މައުލޫމާތު ލިބެއެވެ.
މިކަމާއި ގުޅިގެން ރާއްޖެ އެމްވީން ކުރި ސުވާލަކަށް ޖަވާބުދެއްވަމުން މަރު ކޮމިޝަނުގެ މެމްބަރު މިސްބާހު އައްބާސް ވިދާޅުވީ އެ ކޮމިޝަނުން ބަލަމުންދާ މައްސަލަތަކުގެ ތަހުގީގަށް ހާޒިރުކުރާ މީހުންގެ މައުލޫމާތު އެ ކޮމިޝަނުން ހާމަނުކުރާ ކަމަށެވެ.
ރިލްވާން ގެއްލުވާލި މައްސަލައިގައި ސީދާ ރައީސް ޔާމީނަށް އެނގިވަޑައިގަންނަވާ ބައެއް ކަންކަމާއި ގުޅެގޮތުން ސުވާލުކުރުމަށް ކުރީގެ ރައީސް ޔާމީން އަބްދުލްގައްޔޫމް ވެސް ވަނީ މިދިޔަ ހަފުތާގައި ހާޒިރުކޮށްފައެވެ. މި މައްސަލާގައި ރައީސް ޔާމީނަށްވެސް ކުރަނީ މަގާމުގެ ނުފޫޒު ބޭނުންކޮށްގެން ތަހުގީގަށް ހުރަސްއެޅުމުގެ ތުހުމަތެވެ.
