އައިޕީއެސް ތަމްރީނު ޕްރޮގްރާމް ދިވެހި 7 ފުލުހަކު ފުރިހަމަކޮށްފި
6 އޯގަސްޓު 2021 | ހުކުރު 13:13އައިޕީއެސް ޓްރެއިނިންއަކީ އިންޑިއާގެ އެކި ސްޓޭޓްތަކުން ހޮވާލެވޭ ފަރާތްތަކަށް ހިންގޭ ޕްރޮގްރާމެއް
ޓްރޮފީ ފޮރ އަންއާމްޑް ކޮމްބެޓް އަދި ރޮކް ކްލައިމްބިންގ އިން 1 ވަނަ ހޯދީ ސަބް އިންސްޕެކްޓަރ އޮފް ޕޮލިސް އަހުމަދު ނާޒިމް
އިންޑިއަން ޕޮލިސް ސަރވިސް ޓްރެއިނިންގެ 71 އަދި 72 ވަނަ ތަމްރީނު ޕްރޮގްރާމް ދިވެހި 7 ފުލުހަކު ފުރިހަމަކޮށްފިއެވެ.
މި ތަމްރީނު ޕްރޮގްރާމް ނިންމުން އޮތީ ހުކުރު ދުވަހު އިންޑިއާގެ ހައިދަރުއާބާދުގައި ހުންނަ ސަރުދާރު ވައްލަބާއި ޕަޓޭލް ނެޝަނަލް ޕޮލިސް އެކަޑަމީގައެވެ. ކޯސް ނިންމި 7 ފުލުހުންގެ ތެރެއިން ސަބް އިންސްޕެކްޓަރ އޮފް ޕޮލިސް އަހުމަދު ނާޒިމް ވަނީ ޓްރޮފީ ފޮރ އަންއާމްޑް ކޮމްބެޓް އަދި ރޮކް ކްލައިމްބިންގ އިން 1 ވަނަ ހޯދާފައެވެ.
ތަމްރީނު ޕްރޮގްރާމް ނިންމި ހަތް ފުލުހުންނަކީ ފޭސް 2 ފުރިހަމަކުރުމުގެ ފުރުސަތު އެންމެ ފުރަތަމަ ލިބުނު ދެ ބެޗުގައި ހިމެނުނު ފުލުހުންނެވެ.
އައިޕީއެސް ޓްރެއިނިންއަކީ އިންޑިއާގެ އެކި ސްޓޭޓްތަކުން ހޮވާލެވޭ ފަރާތްތަކަށް ހިންގޭ ތަމްރީނު ޕްރޮގްރާމެކެވެ. މި ތަމްރީނު ޕްރޮގްރާމްގައި ތަހުގީގުކުރުމާއި، ފޮރެންސިކް ސައިންސްގެ އިތުރުން ކްރިމިނޮލޮޖީއާއި ގާނޫނުތަކާއި ފުލުހުންގެ މަސައްކަތާ ގުޅޭ ބައިތައް ކިޔަވައިދީ ތަމްރީނުދެއެވެ.
މި ތަމްރީނު ޕްރޮގްރާމުގައި ބައިވެރިވުމުގެ ފުރުސަތު 1998 ވަނަ އަހަރުން ފެށިގެން ކޮންމެ އަހަރަކުވެސް ދިވެހިރާއްޖެއަށް ދަނީ ލިބެމުންނެވެ. އެގޮތުން، މިހާރުގެ ކޮމިޝަނަރ އޮފް ޕޮލިސް މުހައްމަދު ހަމީދު އަދި ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާނު ޔޫސުފްވެސް ވަނީ 2004 ވަނަ އަހަރު މި ތަމްރީނު ފުރިހަމަކޮށްފައެވެ. މީގެ އިތުރުންވެސް ދިވެހި ފުލުހުންގެ ހިދުމަތުގެ އިސް ސަފުގައި ތިބި ވަރަށް ގިނަ ފުލުހުން ވަނީ މި ތަމްރީނު ހަދާފައެވެ. އައިޕީއެސް ޓްރެއިނިންގެ 73 ވަނަ ބެޗުގައި މިހާރުވެސް 4 ފުލުހަކު ދަނީ ތަމްރީނު ހަދަމުންނެވެ. އަދި މި އަހަރު އިތުރު ފުލުހުން ފޮނުވުމުގެ ފުރުސަތު މިހާރު ވަނީ ލިބިފައެވެ.
