ކޮވިޑް-19ން ދިފާއުވުމަށް 12 އަހަރުން މަތީގެ ކުދިންނަށް ފައިޒާ ވެކްސިން ދޭން ނިންމައިފިއެވެ.

ބުރާސްފަތި ދުވަހުގެ ހަވީރު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ފައިޒާ ވެކްސިން ގެނައުމަށް ކުރި މަސައްކަތުން އެވެކްސިން ލިބޭނެކަން މިހާރު ޔަގީން ވެފައިވާ ކަމަށާއި، މިމަހުގެ ތެރޭގައި ފައިޒާ ވެކްސިން ޖަހަން ފަށާނެ ކަމަށެވެ.

ޑރ.ނަޒްލާ ވިދާޅުވީ ފައިޒާ ވެކްސިން ޖަހާނީ ވަކި ކެޓަގަރީއެއްގެ ބަޔަކަށް ކަމަށެވެ. އެއީ 12 އަހަރާއި 17 އަހަރާއި ދެމެދުގެ ކުޑަ ކުދިންނަށާއި، މާބަނޑު މީހުންކަން ޑރ.ނަޒްލާ ފާހަގަކުރެއްވިއެވެ. މީގެ ތެރޭގައި ކޮވިޝީލްޑް ވެކްސިން ފުރަތަމަ ޑޯޒް ޖެހިފަހުން މާބަނޑުވެފައި ތިބި މީހުންނާއި، މާބަނޑު މީހުންގެ ތެރެއިން އެއްވެސް ޑޯޒެއް ނުޖަހާ މީހުން ހިމެނެއެވެ. އަދި ހަށިގަނޑުގެ ދިފާއީ ނިޒާމު ބަލިކަށިވާ ފަދަ ބައްޔެއް ނުވަތަ ބޭހެއް ބޭނުންކުރާ މީހުން ހިމެނޭ ކަމަށް ޑރ.ނަޒްލާ ވިދާޅުވިއެވެ.

ޑރ.ނަޒްލާ ވިދާޅުވީ ރާއްޖެއިން ބޭރުން ފައިޒާގެ ފުރަތަމަ ޑޯޒް ޖެހުމަށްފަހު ރާއްޖެއައިސް ދެވަނަ ޑޯޒް ޖަހަންޖެހޭ މީހުންނަށް ވެސް މިވެކްސިން ޖެހޭނެ ކަމަށެވެ. ރާއްޖެއިން ބޭރު ގައުމަތަކަށް ކިޔަވަން ދާ ދަރިވަރުންގެ ތެރެއިން އެ ދާ ގައުމަކުން ފައިޒާ ނޫން އެހެން ވެކްސިނެއް ގަބޫލުނުކުރާނަމަ އެ ދަރިވަރަކަށްވެސް ފައިޒާ ވެކްސިން ޖެހޭނެކަމަށް ޑރ. ނަޒްލާ ވިދާޅުވިއެވެ.

12 އަހަރުން މަތީގެ ކުދިންނަށް ވެކްސިން ދޭން ނިންމާފައިވާއިރު، މިމަސައްކަތްތައް ކުރިއަށްގެންދަނީ އެޑިޔުކޭޝަން މިނިސްޓްރީ މެދުވެރިވެގެންނެއެވެ. މިނިސްޓްރީ މެދުވެރިކޮށް މިމަސައްކަތްތައް ކުރަމުންދާއިރު، މިހާރު ވެކްސިންއާ ގުޅޭ ބައެއް މަސައްކަތްތައް ނިމިފައިވާ ކަމަށް ޑރ.ނަޒްލާ ވިދާޅުވިއެވެ.