ދިއްދޫގެ ގޮނޑުދޮށް ޙިމާޔަތް ކުރުމުގެ މަސައްކަތުގެ 65 އިންސައްތަ ނިންމާލައިފި
4 އޯގަސްޓު 2021 | ބުދަ 16:36އެމްޓީސީސީގެ ޓީމާއި މެޝިނަރީތައް ދިއްދޫއަށް ގެންދިޔައީ 25 ފެބްރުއަރީ 2021ގައި
ހއ. ދިއްދޫގެ ގޮނޑުދޮށް ޙިމާޔަތްކުރުމަށް 310 މީޓަރުގެ ސަރަހައްދެއްގައި ޖިއޯ ބޭގްއިން ރިވެޓްމެންޓު ޖަހާނެ
ހއ. ދިއްދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ 65 އިންސައްތަ މަސައްކަތް ނިންމާލައިފިއެވެ.
މި މަޝްރޫޢުގެ މަސައްކަތް ހަވާލުކޮށްފައިވަނީ ރައްޔިތުންގެ ކުންފުނި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)އާއެވެ. މި މަޝްރޫޢުގެ އެންމެ ފަހުގެ މައުލޫމާތު ހާމަކުރަމުން އެމްޓީސީސީން ބުނީ, ކޮނުމަށްފަހު ބިންގަޑު އެއްވަރުކުރަން 7,750 ކިއުބިކް މީޓަރުގެ ވެލި ބޭނުންކުރުމާއި ޖިއޯ ބޭގްސްއަށް އެޅުމަށް 1,926 ކިއުބިކް މީޓަރުގެ ވެލި ބޭނުންކުރުން ހިމެނޭ ކަމަށެވެ. މީގެ އިތުރުން ރަށް ގިރުމުން ސަލާމަތްކުރުމަށްޓަކައި 310 މީޓަރުގެ ސަރަޙައްދެއްގައި ޖިއޯ ބޭގް ރިވެޓްމެންޓް ޖެހުމުގެ މަސައްކަތް ވެސް ހިމެނޭ ކަމަށެވެ. މިއީ 10.02 މިލިއަން ރުފިޔާގެ މަޝްރޫޢެކެވެ.
ދިއްދޫ ގޮނޑުދޮށް ހިމާޔަތްކުރަނީ ޖިއޯބޭގްސް ޖަހައިގެންނެވެ. މިކަމުގެ ޢަމަލީ މަސައްކަތް ފެށުމަށްޓަކައި، އެމްޓީސީސީގެ ޓީމާއި މެޝިނަރީތައް އެރަށަށް ގެންގޮސްފައިވަނީ 25 ފެބްރުއަރީ 2021 ވަނަ ދުވަހުއެވެ. އަދި 28 ފެބްރުއަރީ 2021 ވަނަ ދުވަހު ވަނީ ޕްރޮޖެކްޓް ސައިޓަށް އެތަކެތި މޮބިލައިޒްކޮށްފައެވެ.
މިދިޔަ ޖުލައި މަހުގެ ތެރޭގައި ހއ. ދިއްދޫ ގޮނޑުދޮށް ޙިމާޔަތް ކުރުމުގެ މަޝްރޫޢުގެ މަސައްކަތް ކުރިއަށްދާގޮތް ބައްލަވާލެއްވުމަށްފަހު އެމްޓީސީސީގެ ސީއީއޯ އާދަމް ޢާޒިމް ވިދާޅުވީ، އަމާޒަކީ ބާރު ސްޕީޑްގައި ކުރިއަށްގެންގޮސް، ސެޕްޓެމްބަރު މަހުގެ ނިޔަލަށް މަސައްކަތް ނިންމުން ކަމަށެވެ. އަދި އެމްޓީސީސީން މަސައްކަތް ކުރަނީ ސަރުކާރުން ކުރިއަށްގެންދާ ތަރައްޤީގެ މަޝްރޫޢުތައް ވީހާވެސް އަވަހަކަށް، ފެންވަރު ރަނގަޅުކޮށް ނިންމުން ކަމަށެވެ. މި މަޝްރޫޢުގެ ދަށުން, ދިއްދޫގެ 280 މީޓަރުގެ ސަރަހައްދެއް ހިމާޔަތް ކުރުމަށްވަނީ ހަމަޖެހިފައެވެ.
ދިއްދޫގެ ގޮނޑުދޮށް ގިރުމުގެ މައްސަލައަކީ އެރަށުގެ ރައްޔިތުން ވަރަށް ކަންބޮޑުވާ މައްސަލައެކެވެ. ދިއްދޫއަކީ 5000އާ ގާތްކުރާ އާބާދީއެއް ދިރިއުޅެމުން އަންނަ ރަށެކެވެ.
ދިއްދޫގެ ތަރައްޤީގެ މަޝްރޫޢުތަކަށް ޚާއްސަކޮށްގެން 40 މިލިއަނަށްވުރެ ގިނަ ރުފިޔާ މިއަހަރުގެ ބަޖެޓުގައި ވަނީ ކަނޑައަޅާފައެވެ.
ދިއްދޫގެ ބަނދަރު ފުންކުރުމުގެ މަސައްކަތްވެސް އެމްޓީސީސީން އަންނަނީ ކުރަމުންނެވެ. މިގޮތުން, ފެރީ ނިޒާމު ޤާއިމު ކުރުމުގެ ގޮތުން އަޅާ ޓަރމިނަލްގެ މަސައްކަތް ފެށުމަށް ބޭނުންވާ ސާމާނު މިހާރު އެރަށަށް ގެންގޮސްފައިވާ ކަމަށާއި، ޢަމަލީ މަސައްކަތް ވަރަށް އަވަހަށް ފެށިގެން ދާނެކަމަށް ޢާޒިމް ވިދާޅުވިއެވެ.
