ކޮވިޑް-19 އޮގަސްޓް މަހުގެ ފުރަތަމަ މަރު ފުވައްމުލައް ސިޓީން
3 އޯގަސްޓު 2021 | އަންގާރަ 12:31ނިޔާވެފައިވަނީ 94 އަހަރުގެ ދިވެހި ފިރިހެނެއް
ފުވައްލުމަކު ހޮސްޕިޓަލްގެ ސިއްހީ ޚިދުމަތްތެރިން މަސައްކަތުގައި
ކޮވިޑް ޖެހިގެން ފުވައްމުލައް ސިޓީގައި މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ އަންގާރަ ދުވަހުގެ ހެނދުނު 9:00ގައި ފުވައްމުލަކު އަތޮޅު ހޮސްޕިޓަލަށް ގެންދެވުނު 94 އަހަރުގެ ދިވެހި ފިރިހެނެއް ނިޔާވެފައިވާ ކަމަށެވެ. މިއީ ރާއްޖޭގައި ކޮވިޑް ޖެހިގެން ނިޔާވި 222 ވަނަ މީހާއެވެ.
މިއީ ކޮވިޑްގައި މި މަހުގެ ތެރޭގައި ނިޔާވި ފުރަތަމަ މީހާއެވެ.
ރާއްޖޭގައި ކޮވިޑްގެ ކޭސްތައް އިތުރުވެ, މެއިމަހުގެ 6ވަނަ ދުވަހުން ފެށިގެން ދުވާލެއްގެ މައްޗަށް 1000ން މަތިން ކޮވިޑްގެ ކޭސްތައް ރިޕޯޓްކުރަން ފެށިއެވެ. އަދި މެއި މަހުގެ މެދުތެރެއިން ފެށިގެން ކޮވިޑްގައި ނިޔާވާ މީހުންގެ އަދަދު އިތުރުވެގެން ދިޔައެވެ. އެގޮތުން މެއިމަހު އެކަނިވެސް 93 މީހަކު މި ބަލީގައި ނިޔާވެފައިވެއެވެ. މިއީ އެއްމަސް ތެރޭގައި ރާއްޖޭގައި އެންމެ ގިނަ އަދަކަށް މީހުން ނިޔާވި މަހެވެ. އަދި ޖޫންމަހު 51 މީހަކު ނިޔާވެފައިވާ އިރު، ޖުލައިމަހު 13 މީހަކު ވަނީ ނިޔާވެފައެވެ.
މިހާތަނަށް ރާއްޖޭގައި ކޮވިޑަށް 77،000ށް ވުރެ ގިނަ މީހުން ޕޮޒިޓިވްވެފައިވާ އިރު، މީގެ ތެރެއިން 75،000 އާއި ގާތްކުރާ އަދަކަށް މީހުން ވަނީ ބަލިން ރަނގަޅުވެފައެވެ. ރާއްޖޭގައި ޕޮޒިޓިވްވި މީހުންގެ ތެރެއިން 77 އިންސައްތަ ހިއްސާ ކުރަނީ ދިވެހިންނެވެ.
