ފާތިޙްގެ މައްޗަށް ދައުވާ ނުކުރުމަށް ނިންމައިފި
3 އޯގަސްޓު 2021 | އަންގާރަ 09:59ރައީސް ނަޝީދަށް އަމާޒުކޮށްދިން ހަމަލާއާ ގުޅިގެން ޖުމްލަ 10 މީހަކު މިހާތަނަށް ވަނީ ހައްޔަރުކޮށްފައި
ހަމަލާއާ ގުޅިގެން ހައްޔަރުކުރި އަހުމަދު ފާތިހު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް މޭ 6 ވަަނަ ދުވަހުގެރޭ ބޮމެއް ގޮއްވާލި މައްސަލައިގައި ހައްޔަރުކޮށްފައިވާ ލ. ގަން، ދުންފިނިއުފާ، އަހުމަދު ފާތިހުގެ މައްޗަށް ދައުވާ ނުކުރަން ނިންމައިފިއެވެ.
އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވީ، ފާތިހުގެ މައްޗަށް ދައުވާއެއް ކުރެވެން ނެތްކަމަށެވެ. ޕީޖީ ވިދާޅުވީ، ދައުވާ ކުރަން ފޮނުވަނީ އެ ދާއުވާއެއް ސާބިތުވާ ވަރަށް ހެކި ހުރެގެން ކަމަށެވެ. ފާތިހުގެ ތަހުގީގުގައި އޭނާގެ މައްޗަށް ކުށް ސާބިތުވާވަރަށް ހެކި ނެތް ކަމަށް ޕީޖީ ޝަމީމު ވިދާޅުވިއެވެ.
ފާތިހު ހައްޔަރުކޮށްފައިވަނީ، ބ. ދަރަވަންދޫންނެވެ. ހައްޔަރުކުރުމުން އޭނާއަކީ ފުލުހުންގެ އިންޓެލިޖެންސްގައި ވެސް މަސައްކަތްކުރި މީހެއްކަން ވަނީ އެނގިފައެވެ.
ހަމަލާއާ ގުޅިގެން ދައުވާ އުފުލާފައިވަނީ ހަމަލާއާ ގުޅިގެން އެންމެ ފުރަތަމަ ހައްޔަރުކުރި ތިން މީހުން ކަމަށްވާ އަހުމަދު އަދުހަމާއި މުޖާޒް އަހްމަދު އަދި ތަހުމީން އަހްމަދުގެ މައްޗަށާއި ބޮން ގޮއްވާލި ސައިކަލްގައި އެ ބޮން ހަރުކުރުމުގައި އަމަލީ ގޮތުން މަސައްކަތް ކުރި ކަމަށް ތުހުމަތުވާ އަލީ ހައިޝަމްގެ މައްޗަށެވެ.
ރައީސް ނަޝީދަށް އަމާޒުކޮށްދިން ހަމަލާއާ ގުޅިގެން ޖުމްލަ 10 މީހަކު މިހާތަނަށް ވަނީ ހައްޔަރުކޮށްފައެވެ. އެއީ މިހާރު ދައުވާކުރަން ފޮނުވާފައިވާ މީހުންގެ އިތުރުން މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި އއ. މާޅޮސް، އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމް އަދި ހއ. މޮޅަދޫ، ބަހާރުގޭ އަބްދުﷲ އަލިމަނިކެވެ.
މީގެތެރެއިން އިސްހާގާއި ތަސްލީމަކީ ހަމަލާގައި އެންމެ އިސް ދައުރެއް އަދާކުރި ކަމުގެ ތުހުމަތުކުރާ ދެމީހުންނެވެ. އަދި އަބްދުﷲ އަލިމަނިކަކީ ރާއްޖޭގައި ހަރުކަށި ފިކުރު ފެތުރުމަށް އިސްކޮށް ހަރަކާތްތެރިވާ މީހެއް ކަމަށާއި އަދުހަމް ފިލުވުމާއި ހެކި ނައްތާލުމަށް މަސައްކަތް ކޮށްފައިވާ ކަމަށް ތުހުމަތުކުރެވޭ މީހެއްކަމަށް ވެސް ފުލުހުންގެ ތަހުގީގަށް ވަނީ އެނގަފައެވެ.
