ތަހުމީނާއި ހައިޝަމްގެ ޑީއެންއޭ އައިއީޑީ ތެރެއިން ފެނޭ، ސަބަބެއް ނުވިސްނޭ: ޕީޖީ ޝަމީމް
3 އޯގަސްޓު 2021 | އަންގާރަ 09:47މިހާރު ލިބިފައި ހުރި ހެކިތަަކަށް ބަލާއިރު އެނަލިލިސް ރިޕޯޓުން އައިއީޑީ ތައްޔާރުކުރި ގޮތާއި ގޮއްވާލި ގޮތުގެ ތަފްސީލު ފެންނަން އެބަހުރި
ބޮން ގޮއްވާލި ސަރަހައްދު
މެއި މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް ނަޝީދަށް އަމާޒުކޮށް، ދިން ހަމަލާގެ ތުހުމަތުގައި ފުލުހުން ހައްޔަރުކޮށްފައިވާ ތަހުމީން އަޙުމަދާއި ޢަލީ ހައިޝަމްގެ ޑީއެންއޭ، އައިއީޑީ ތެރެއިން ފެންނަ ކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ރައީސް ނަޝީދަށް ދިން ހަމަލާއާ ގުޅިގެން އެންމެ ފަހުގެ މައުލޫމާތުތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަމީމް ވިދާޅުވީ ޑީއެންއޭ ރިޕޯޓުތަކުން އެ ދެމީހުންގެ އައިޑީ ފެންނައިރު އައިޑީ ފެންނަން ޖެހޭ ސަބަބު، ބޮން ހެދުން ފިޔަވާ ނުވިސްނޭ ކަމަށެވެ. ޝަމީމް އިތުރަށް ވިދާޅުވީ މިހާރު ލިބިފައި ހުރި ހެކިތަަކަށް ބަލާއިރު އެނަލިލިސް ރިޕޯޓުން އައިއީޑީ ތައްޔާރުކުރި ގޮތާއި ގޮއްވާލި ގޮތުގެ ތަފްސީލު ފެންނަން އެބަހުރި ކަމަށެވެ. އެހެންނަމަވެސް މިވަގުތު މީޑިއާތަކާ އެ މައުލޫމާތު ހިއްސާ ނުކުރެއްވި ނަމަވެސް އައިއީޑީ ގޮއްވާލާފައިވާ ގޮތާއި ކަން ހިނގައި ދިޔަ ގޮތް ކޯޓަށް މައްސަަލަ ހުށަހަޅާއިރު ކިޔައިދޭނެ ކަމަށެވެ.
ނަޝީދު އަވަހާރަކޮށްލުމަށް ދިން ހަމަލާގައި ބައިވެރިވެފައިވާކަމަށް ތުހުމަތުކުރެވޭ މީހުން އެއް ފަހަރަށްވުރެ ގިނަ ފަހަރަށް ނީލޯފަރު ހިނގުމުގައި ހަރަކާތްތެރިވެ ގ. ކެނެރީގެ ސަރަހައްދު ސަރވެއިލްކޮށްފައިވާކަމަށް އެ ހަމަލާގައި ރައީސް ނަޝީދުގެ ސެކިޔުރިޓީ ފެއިލްވި ގޮތާއި ގުޅޭގޮތުން އެކުލަވާލި އިންކުއަރީން ރިޕޯޓުން ވެސް ވަނީ ހާމަވެފައެވެ. މީގެއިތުރުން މެއި 6 ވަނަ ދުވަހުގެ ރޭ އައިއީޑީ ގޮއްވާލުމުގެ ގާތްގަނޑަކަށް 1 ގަޑިއިރު ކުރިން، އެ އައިއީޑީ ގޮއްވާލިކަމަށް ތުހުމަތުކުރެވޭ އަދުހަމް އަޙުމަދު ރަޝީދު އެ ސަރަހައްދަށް ގޮސްފައިވެއެވެ. އަދި އަދުހަމް ހުއްޓިހުރީ ނީލޯފަރު ހިނގުން ފެންނަގޮތަށް އަތަމާ ޕެލަސް ގޯޅި ތެރޭގައެވެ.
ރިޕޯޓުގައި ރައީސް ނަޝީދުގެ ތްރެޓް ހިސްޓްރީ ހިމަނާފައިވާއިރު 2018 ވަނަ އަހަރުގެ ނޮވެމްބަރ މަހުގެ 1 ވަނަ ދުވަހު ރާއްޖެ ވަޑައިގެންނެވި ފަހުން އެކި ފަހަރު މަތީން ތްރެޓްތައް ލިބިވަޑައިގަންނަވާފައިވާކަން ވަނީ އެނގިފައެވެ. ނަމަވެސް މިހަމަލާ ދޭން އުޅޭކަމުގެ އިންޓެލް އެއްވެސް މައުލޫމާތެއް އިންޓެލް އިދާރާތަކަށް ލިބިފައިނުވާކަން ވަނީ ފާހަގަކޮށްފައެވެ.
މީގެ އިތުރުން ފުލުހުން ވަނީ އެތަނުގައި އަމަލީގޮތުން ހަރަކާތްތެރިވި މީހުންގެ ހުރިހާ ހަރަކާތެއް މާލޭގެ އެކި ސީސީޓީވީތަކުން ފުލުހުން ހޯދައި އާންމުކޮށްފައެވެ. ފުލުހުން އެންމެ ފުރަތަމަ ދެއްކި ވީޑިއޯއިން ފެންނަ ގޮތުގައި ބޮން ގޮއްވާލުމުގެ ކުރިން އޭނާ ހުރީ ނީލޯފަރު މަގުން މަޖީދީ މަގަށް ނިކުންނަ އިރު ކުރިމަތީގައި ހުރި އަތަމާ ޕެލަސް ގޯޅި ތެރޭގައެވެ. އެތަނުގައި ހުރި ފާރެއްގައި ހަމަޖެހިލައި ފައި ވިއްދައިގެން ފޯނަކުން ވާހަކަދައްކަމުންދާ މަންޒަރު އެ ވީޑިއޯއިން ފެނެއެވެ. އަދި ތަކުރާރުކޮށް، ކުރިއަށް ނިކުމެލައި އެ ސަރަހައްދު ބަލަމުން ދެއެވެ.
ރައީސް ނަޝީދު ގެކޮޅުން ނިކުމެވަޑައިގެން ކާރުކޮޅާ ދިމާލަށް ވަޑައިގެންނެވި އިރު އަދުހަމް މަޑުމަޑުން އެ ދިމާ ކުރިމައްޗަށް ނިކުމެ އެތަނުގައި ހުރި ތަނބަކަށް ނިވާވެ ބޮން ގޮއްވާލާ މަންޒަރު ވެސް ވީޑިއޯއިން ފެނެއެވެ. ފުލުހުން ބުނީ އެ ވީޑިއޯ ރަނގަޅަށް ބެލުމުން އޭނާ އަތުގައި އޮތް ރިމޯޓު ވެސް ފެނިފައިވާ ކަމަށާއި، އެތަނުގައި ދެން ތިބި އާންމުންނާއި އޭނާގެ އުޅުމުގައި ތަފާތުތަކެއް ހުރިކަން ފާހަގަވި ކަމަށެވެ. އެގޮތުން އެހެން މީހުން ވަގުތުން އެކަމަށް ރިއެކްޓް ކުރި އިރު، އޭނާގެ އުޅުން ހުރި ގޮތުން އެއީ ކުރިއާލައި އެނގިފައިވާ ކަމެއްކަން ދޭހަވާ ކަމަށް ފުލުހުން ބުންޏެވެ.
ފުލުހުން ބުނީ އެތަނުގައި އޭނާ ހުރި އިރު ފާރުގައި ފައި ވިއްދައިގެން ހުރުމުން އެތަނުގެ ފޫޓްޕްރިންޓު ވެސް ނަގާފައިވާ ކަމަށެވެ. އަދި އޭނާ ހައްޔަރުކޮށް ނެގި ފުޓް ޕްރިންޓާއި ފާރުގައި ހުރި ފުޓް ޕްރިންޓް ދިމާވާ ކަމަށާއި އެތަނުގައި ހުރީ އަދުހަމް ކަން ޔަގީން ވެފައިވާ ކަމަށެވެ. މީގެ އިތުރަށް އައިއީޑީ ގޮއްވާލުމަށް ފަހު ދެން އޭނާގެ އަމަލު ހުރި ގޮތުގެ ތަފްސީލީ ވީޑިއޯ ވެސް އާންމުކޮށްފައިވެއެވެ. އެތަނުން ބާރަށް ދުވެފައި ކަނާތަށް ގޮސް، ހެލެނބެލި ގޯޅިން ވަދެގެން ރަށްދެބައި މަގާ ހަމައަށް އޭނާ ދިޔައީ ދުވެފައެވެ. އަދި އެ ހިސާބުން ހަލުވި ހިނގުމެއްގައި ގޮސް ޗާނދަނީ މަގުން ޖަލާލުއްދީން މިސްކިތުގައި މަޑުކުރި ކަމަށާއި އެތަނުގައި ގިނަ އިރު ނުކޮށް، ނިކުމެގެން އަމީނީ މަގަށް ގޮސް އަމީނީ ބިލްޑިން ކުރިމަތީގައިވާ ޕާކަށް ވަދެފައިވާ ކަމަށް ބުންޏެވެ.
އޭނާގެ ބައިވެރިޔާ މުޖާޒުއާ ބައްދަލުވި ކަމަށް ފުލުހުން ބުނަނީ އެ ޕާކުންނެވެ. އެތަނުން ދެ މީހުން އެކީ ނިކުމެ ގާކޮށި ތެރެއިން ގޮސް ގަލޮޅު މަދަރުސާ ހުރަސްކޮށް ބޮޑުރަސްގެފާނު މަގުން އަރައިގެން ޖަމާލުއްދީން ސްކޫލް ކައިރީގައި ހުރި ގެސްޓް ހައުސް އަކަށް ވަދެފައިވާ މަންޒަރު ވެސް ފުލުހުންނަށް ސީސީޓީވީ ފުޓޭޖުން ފެނިފައިވާ ކަމަށް ފުލުހުން ބުންޏެވެ.
