މާލޭ ސިޓީގެ މަގުމަތީގައި ހިނގާ ބިގާވެއުޅޭ މީހުންނާއި ވެހިކަލް ދުއްވާ ފަރާތްތަކަށް ދަތިވާގޮތަށް ބަހައްޓާފައި ހުންނަ އެއްގަމު އުޅަނދު ފަހަރާއި ހަލާކުވެ ނުދުއްވާ ހުންނަތާ ގިނަދުވަސްވެފައިވާ އުޅަނދުފަހަރު ނެގުމުގެ މަސައްކަތް މާލޭ ސިޓީ ކައުންސިލާއި ފުލުހުން ގުޅިގެން ކުރަން ފަށައިފިއެވެ.
ސިޓީ ކައުންސިލުން ބުނީ 2 އޯގަސްޓުން ފެށިގެން އެ ކައުންސިލާއި ފުލުހުން ގުޅިގެން ބޭނުންނުކުރާ އުޅަނދުތައް ނެގުމުގެ މަސައްކަތް ފަށާފައިވާ ކަމަށާއި، އެގޮތަށް ބަހައްޓާފައި ހުރި އެފަދަ އެއްގަމު އުޅަނދުފަހަރު ނަގައި މަގުމަތި ސާފުކުރަން އަންގާކަމަށެވެ. އަދި މި އުޅަނދުފަހަރުގެ ވެރިފަރާތުން ނުނަގައި ހުންނަ އެއްގަމު އުޅަނދުފަހަރު "އެއްގަމު އުޅަނދު ޕާކު ކުރުމުގެ ގަވައިދު" ގެ 6 ވަނަ ނަމްބަރުގެ ދަށުން ނަގައި ނައްތާލެވޭނެ ކަމަށެވެ.
އަދި އެ ވެހިކަލްތައް ނެގުމުގެ ތެރޭގައާއި ނެގުމަށް ފަހު އުޅަނދާއި ތަކެއްޗަށް ލިބޭ ގެއްލުމާއި އުނިއިތުރަށް އެ ކައުންސިލުން ޒިންމާ ނުވެވޭނެ ކަމަށް ވެސް ސިޓީ ކައުންސިލުން ބުނެއެވެ.
މާލޭ ސިޓީއަކީ ސާފު ފެހި ތިމާވެއްޓާ ރައްޓެހި ސިޓީއަކަށް ހެދުމަށް ޚާއްސަ ޕްރޮގްރާމްތަކެއް ސިޓީ ކައުންސިލުން ކުރަމުންދާއިރު ސާފު ފެހި ތިމާވެއްޓާ ރައްޓެހި ސިޓީއަކަށް ހެދުމުގެ ޕްރޮގްރާމް ހިންގުމަށް ހަމަޖެހިފައިވަނީ މުޖުތަމައުގެ ވަރަށް ބޮޑު އެއްބާރުލުމަކާއެކު ކަމާއި އަދި އެ ފަރާތްތަކުގެ ބައިވެރިވުމާއެކުގައި ކަމަށް މާލޭ ސިޓީ ކައުންސިލުން ވަނީ ބުނެފައެވެ.
