އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު އަނެއްކާވެސް އިތުރުކޮށްފި
މީގެ ކުރިން 16 ފަހަރަކު މި މުއްދަތު އިތުރުކުރި
މާލޭގެ ބޮޑުތަކުރުފާނު މަގު
ކޮވިޑް-19ގެ ހާލަތާ ގުޅިގެން މިދިޔަ އަހަރުން ފެށިގެން މުޅި ރާއްޖޭގައި ހިންގާފައިވާ އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު އަނެއްކާވެސް އެއް މަސް ދުވަހުގެ މުއްދަތަށް އިތުރުކޮށްފިއެވެ.
ހެލްތް މިނިސްޓަރ އަހުމަދު ނަސީމް ސޮއިކުރައްވާ ނެރުއްވި ގަރާރުގައި ވަނީ އެންމެ ފަހުން އިއުލާނުކުރި އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު ހަމަވެފައިވާއިރު މި މުއްދަތު އިތުރު އެއް މަސް ދުވަހަށް އިތުރުކުރަން ނިންމާފައިވާ ކަމަށެވެ.
ކޮވިޑް-19 އިތުރަށް ފެތުރުމުގެ ނުރައްކާ އަދިވެސް އެބައޮތް ކަމަށާއި، އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރުކުރުމަށްޓަކައި ޚާއްސަ ފިޔަވަޅުތަކެއް އަޅަންޖެހޭކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ލަފާދެއްވާފައިވާތީ، މި މުއްދަތު އިތުރަށް ދަންމާލަން ނިންމީކަމަށް ގަރާރުގައި ވެއެވެ.
އެ ގާނޫނުގެ ދަށުން، ރާއްޖޭގެ ހުރިހާ ސަރަހައްދެއްގައި 12 މާޗު 2020ން ފެށިގެން އިއުލާނު ކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު އިތުރުކޮށްފައިވަނީ އަންނަ ސެޕްޓެމްބަރު މަހުގެ 3 ވަނަ ދުވަހުގެ ނިޔަލަށެވެ. މީގެ ކުރިން 16 ފަހަރެއްގެ މަތިން މި މުއްދަތު ވަނީ އިތުރުކޮށްފައެވެ.
އަދި ވަގުތާއި ހާލަތަށް ރިއާޔަތްކޮށް އަޅަންޖެހޭ ޚާއްސަ ފިޔަވަޅުތައް އަޅަމުން ގެންދިޔުމަށް ޑިރެކްޓަރ ޖެނެރަލް އޮފް ޕަބްލިކް ހެލްތަށް މި ގަރާރުގައި ވަނީ އަންގާފައެވެ.
ރާއްޖެއަށް ކުރިމަތިވެފައިވާ ކޮވިޑް-19ގެ ތިންވަނަ ރާޅާއެކު، ކޮންމެ ދުވަހަކު ވެސް ދަނީ ގިނަ އަދަދެއްގެ ބަޔަކު ޕޮޒިޓިވްވަމުންނެވެ. އެންމެ ފަހުގެ ހާލަތަށް ބަލާއިރު، ހޯމަ ދުވަހު މުޅި ރާއްޖެއިން 86 މީހަކު ކޮވިޑަށް ޕޮޒިޓިވްވެފައިވެއެވެ. މާލެ ސަރަހައްދުން 31 މީހަކު ޕޮޒިޓިވްވެފައިވާއިރު، އަތޮޅުތެރެއިން 37 މީހުން އަދި ރިސޯޓުތަކުން 18 މީހުން ޕޮޒިޓިވްވެފައިވެއެވެ.
