ކުޅުދުއްފުށީގެ 68 ގެއަކާއި ދޯންޏެއް މޮނިޓަރިންގެ ހާލަތުގައި!
ޕޮސިޓިވް ކޭސްތައް ފެނުމާ ގުޅިގެން މޮނިޓަރިންގއަށް ލެވިފައިވާ ގެތަކުގެ އަދަދު ހޯމަ ދުވަހާ ހަމައަށް ވަނީ 14ށް އަރާފައި
ކުޅުދުއްފުށި ރީޖަނަލް ހޮސްޕިޓަލް
ކުޅުދުއްފުށިން ފެންނަ ކޮވިޑްގެ ކޭސްތަކާ ގުޅިގެން 68 ގެއަކާއި ދޯންޏެއް މޮނިޓަރިންގެ ހާލަތަށް ގެނެސްފިއެވެ.
ޖުމްލަ 69 ތަނެއް މޮނިޓަރިންގެ ހާލަތަށް ގެނެސްފައިވާ އިރު ކުޅުދުއްފުށި ސިޓީ ކައުންސިލުން ބުނެފައިވަނީ މި ގެތަކާއި އުޅަނދުތަކަށް ކަމާބެހޭ ފަރާތްތަކުގެ ހުއްދަނެތި ވަދެ ނުކުމެ ނުވަތަ އަރާ ފައިބައި އުޅުމަކީ މަނާކަމެއް ކަމަށެވެ.
ޕޮސިޓިވް ކޭސްތައް ފެނުމާ ގުޅިގެން މޮނިޓަރިންގއަށް ލެވިފައިވާ ގެތަކުގެ އަދަދު ހޯމަ ދުވަހާ ހަމައަށް ވަނީ 14ށް އަރާފައެވެ. އަދި ޕޮސިޓިވް ކޭސްތަކުގެ ޑައިރެކްޓް ކޮންޓެކްޓުން ދިރިއުޅޭތީ މޮނިޓަރިންގއަށް ލެވިފައިވާ ގެތަކާއި އުޅަނދުތަކުގެ އަދަދަކީ 55 އެވެ. މީގެ ތެރޭގައި ރަންދި 7 ދޯނި ވެސް ހިމެނެއެވެ.
ކުޅުދުއްފުށީ ރީޖަނަލް ހޮސްޕިޓަލުން އެންމެ ފަހުން އާންމުކުރި މައުލޫމާތުތައް ދައްކާގޮތުން، ކުރިން ޕޮޒިޓިވްވެފައިވާ ކޭސްތަކުގެ ކޮންޓެކްޓުންގެ ގޮތުގައި ފާހަގަކުރެވިފައިވާ 18 ފަރާތެއްގެ ސާމްޕަލް ނަގައި އާދީއްތަ ދުވަހު ޓެސްޓް ކުރެވުނު އިރު، އޭގެ ތެރެއިން 7 ފަރާތެއް ޕޮޒިޓިވްވެ، ކުޅުދުއްފުށި ސިޓީގެ އެކްޓިވް ކޭސްތަކުގެ އަދަދު 51ށް ވަނީ އަރާފައެވެ.
އެ ހޮސްޕިޓަލުން ބުނީ ހުމާއި ރޯގާގެ އަލާމާތްތައް ހުރި އެންމެހާ ބޭފުޅުން ލަސް ނުކުރައްވާ ސާމްޕަލް ނެގުމަކީ ބަލި ފެތުރުން ކޮންޓްރޯލު ކުރުމަށް އެޅިގެން ދާނެ ފިޔަވަޅެއް ކަމަށާއި، ފުލޫ އޯޕީޑީއަށް ވަޑައިގެން ނުވަތަ 7606688 އަށް ގުޅާ ނުވަތަ އެސްއެމްއެސް ކުރައްވައިގެން ސާމްޕަލް ނެގުމުގެ ކަންތައްތައް ކުރިޔަށް ގެންދިއުމަށް އެދޭ ކަމަށެވެ.
އަދި ކަރަންޓީނުގައި ތިއްބަވާ ބޭފުޅުން ވެސް އެންމެންގެ ރައްކަލަށްޓަކައި ކަރަންޓީނުގެ އުސޫލުތަކަށް ފުރިހަމައަށް ތަބާވުމަށާއި، މި ވަގުތު އެންމެ މުހިންމު ކަމެއްގެ ގޮތުން ސާޖިކަލް މާސްކު އަޅައިގެން އުޅުމާއި، ސައިބޯނި ލައިގެން ގިނަގިނައިން އަތް ދޮވުމާއި، ބައްދަލު ވާ މީހުންގެ އަދަދު މަދު ކުރުމަށް ނަސޭހަތްތެރިވާ ކަމަށެވެ.
ކޭސްތައް ގިނަވެ، ހާލަތު އިތުރަށް ގޯސްވެގެން ދިޔަ ނުދިނުމަށްޓަކައި އެންމެން ގުޅިގެން މަސައްކަތް ކުރުމަށް އިލްތިމާސް ކޮށްފައިވެއެވެ. އަދި ހަރުކަށި ފިޔަވަޅުތައް އަޅަން ޖެހި، އާންމު ދިރިއުޅުމުގެ ކަންތައްތަކަށް ބުރޫ އަރާ ހިސާބަށް ދިޔަ ނުދިނުމަށްޓަކައި ބަލި ފެތުރުން ކޮންޓްރޯލު ކުރުމަށް އެޗްޕީއޭއިންނާއި، ކަމުގެ މާހިރުން ދެއްވާ އިރުޝާދުތަކާ އެއްގޮތަށް އަމަލު ކުރުމަށް އެދިފައިވެއެވެ.
ކުޅުދުއްފުށީގައި ކޮވިޑް ފެތުރުމާ ގުޅިގެން ހާއްސަ ފިޔަވަޅުތަކެއް ވަނީ އަޅާފައެވެ. އެގޮތުން ބޭރަށް ނުކުންނަން ޖެހިއްޖެނަމަ މާސްކު ބޭނުން ކުރުމާއި, އެކިއެކި ޚިދުމަތް ފޯރުކޮށްދޭ ފަރާތްތައް ކަމުގައިވާ ޓެކްސީ ޑްރައިވަރުންނާއި ފިހާރަތަކުގައި މަސައްކަތް ކުރާ ފަރާތްތަކުން ވެސް މާސްކު އެޅުން ހިމެނެއެވެ. އަދި ޕާކު ތަކާއި އާންމު އެންމެހާ ތަނެއް ބަންދު ކުރެވިފައިވާތީ މިފަދަ ތަންތަނަށް ނުދިއުމާއި، ގްރޫޕް ހަދައިގެން މޫދަށް ނުދިއުމަށް ވަނީ އަންގާފައެވެ.
މީގެ އިތުރުން މަގުމަތީގައި ގުރޫޕް ހަދައިގެން ނޫޅުމާއި ކޮންމެހެން ނުކުންނަން ޖެހިގެން ނޫނީ ގެއިން ބޭރަށް ނުދިއުމަށް އަންގާފައިވާ އިރު، ޒަރޫރީ ހާލަތެއްގައި މެނުވީ އެއްގެއިން އަނެއް ގެއަށް ޒިޔާރަތް ނުކުރުމަށް ވަނީ އަންގާފައެވެ. އަދި ކަރަންޓީންގައި ތިބޭ މީހުން ކަރަންޓީންގެ އުސޫލުތަކަށް ތަބާވުމަށް ވެސް އިލްތިމާސްކޮށްފައިވެއެވެ.
ސިޓީ ކައުންސިލުން ބުނީ ބަލި އިތުރަށް ފެތުރި ރަށުގެ އާންމު ހާލަތު މިއަށްވުރެ ގޯސްވެއްޖެނަމަ ރައްޔިތުންނަށް ކުރިމަތިވެދާނެ ދަތިތަކުން ސަލާމާތްވުމަށްޓަކައި, ކަމާގުޅުންހުރި އިދާރާތަކުން ދޭ އިރުޝާދުތަކާއި އަންގާ އެންގުންތަކަށް އަމަލުކުރުމަށް ނަސޭހަތްތެރިވާ ކަމަށެވެ. އަދި ބަލި ފެތުރުން ކޮންޓްރޯލްކޮށް ކުޅުދުއްފުށި ސިޓީ އާންމު ހާލަތަށް ގެނައުމަށް ހުރިހާ ރައްޔިތުންގެ އެއްބާރުލުމަށް ސިޓީ ކައުންސިލުން ވަނީ އެދިފައެވެ.
