ފާއިތުވެދިޔަ 24 ގަޑިއިރުގެ ތެރޭގައި ކޮވިޑް-19ށް ރާއްޖެއިން ޕޮޒިޓިވްވެފައިވަނީ 86 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.

އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާގޮތުން އާދީއްތަ ދުވަހުގެ ހަވީރު 06:00ން ފެށިގެން ހޯމަ ދުވަހުގެ ހަވީރު 06:00އާ ހަމައަށް ރާއްޖެއިން 5653 މީހުން ވަނީ ކޮވިޑަށް ޓެސްޓު ކޮށްފައެވެ. އަދި އޭގެ ތެރެއިން 86 މީހުން ވަނީ ޕޮޒިޓިވްވެފައެވެ. އެއީ މާލެ ސަރަހައްދުން ޕޮޒިޓިވްވި 31 މީހުންނާއި އަތޮޅުތެރެއިން ޕޮޒިޓިވްވި 37 މީހުންގެ އިތުރުން ރިސޯޓުތަކުން ޕޮޒިޓިވްވި 18 މީހުންނެވެ.

މި 86 މީހުންނާއެކު ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު ވަނީ 77،633ށް އަރާފައެވެ. މިވަގުތު ހުރި އެކްޓިވް ކޭސްތަކުގެ އަދަދަކީ 2،472 އެވެ. އޭގެ ތެރެއިން 19 މީހުންނަށް ހޮސްޕިޓަލުގައި އަންނަނީ ފަރުވާ ދެމުންނެވެ. ރާއްޖެއިން މި ބަލީގައި 221 މީހުން ނިޔާވެފައިވާއިރު، 74،928 މީހުން ވަނީ ބަލިން ފަސޭހަވެފައެވެ.

ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދުތައް ދަށްވާން ފަށާފައި މިވަނީ، ކޮވިޑްގެ ތިންވަނަ ރާޅާއެކު އެޕްރީލް މަހުގެ މެދުތެރެއިން ފަށައިގެން ކޮވިޑްގެ ކޭސްތައް އިންތިހާ ދަރަޖައަށް އިތުރުވުމަށްފަހުގައެވެ. އަދަދުތައް އިތުރުވާން ފެށުމާއިއެކު އެޗްޕީއޭއިން ވަނީ, ކޮވިޑުން ރައްކާތެރިވުމަށް އަޅާފައިވާ ފިޔަވަޅުތައް ވަރުގަދަ ކޮށްފައެވެ. އެގޮތުން މާލެ ސަރަހައްދުގައި މ ކާފިއުވެސް ހިންގާފައެވެ.