ޓޯކިއޯ އޮލިމްޕިކް ގޭމްސް 2020 ގެ އަންހެނުންގެ ފުޓްބޯޅަ އިވެންޓުގައި ވަރުގަދަ އެމެރިކާ ބަލިކުރުމަށްފަހު ފައިނަލުގެ ޖާގައެއް ކެނެޑާ ހޯދައިފިއެވެ.

ހޯމަ ދުވަހު ކުޅުނު ސެމީ ފައިނަލް މެޗުން ކެނެޑާ މޮޅުވީ 1-0 ގެ ނަތީޖާއަކުންނެވެ. މި މެޗުން ކެނެޑާ މޮޅުވިއިރު، މިއީ 2001 ވަނަ އަހަރަށްފަހު ކެނެޑާއިން އެމެރިކާ ބަލިކުރި ފުރަތަމަ ފަހަރެވެ. މި މެޗުގެ ކުރިން މި ދެ ގައުމު ބައްދަލުކުރި 36 މެޗުންވެސް މޮޅުވެފައިވަނީ އެމެރިކާއެވެ.

ޓޯކިއޯގެ ކަޝިމާ ސޮކާ ސްޓޭޑިއަމުގައި ކުޅުނު މި މެޗުގައި އެމެރިކާއިން ގިނަ ހަމަލާތަކެއް އުފެއްދި ނަމަވެސް، ކެނެޑާއިން ވަނީ ރަނގަޅަށް ޑިފެންސްކޮށް އެމެރިކާ ހުއްޓުވާފައެވެ. މި މެޗުގައި ފެނިގެންދިޔަ ހަމައެކަނި ލަނޑު ކެނެޑާއިން ކާމިޔާބުކޮށްފައިވަނީ މެޗުގެ 74 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ގައުމަށް ކާމިޔާބުކޮށްދިނީ ޖެސީ ފްލެމިންގެވެ.

މި މޮޅާއެކު ކެނެޑާ އޮލިމްޕިކްސްގެ ފައިނަލަށް ދަތުރުކުރިއިރު، އެންމެ ފަހުން ބޭއްވި ދެ އޮލިމްޕިކްސްއިންވެސް އެ ގައުމަށް ލިބުނީ ލޯ މެޑެއްޔެވެ. މި ފަހަރުގެ ފައިނަލުގައި ކެނެޑާ ބައްދަލުކުރަން ޖެހޭނީ 1-0 ގެ ނަތީޖާއަކުން އޮސްޓްރޭލިއާ ބަލިކޮށް ފައިނަލަށް ދަތުރުކުރި ސްވިޑެންއާއެވެ.

އޮލިމްޕިކްސްއިން ރަން މެޑަލް ހޯދުމުގެ ފުރުސަތު އެމެރިކާއަށް ގެއްލުނުއިރު، މި ފަހަރުގެ ގޭމްސްގައި ކުޅުނު ފުރަތަމަ މެޗުން ސްވިޑެން އަތުން ބަލިވެ އެމެރިކާގެ ބަލިނުވުމުގެ ސިލްސިލާއަށްވެސް ވަނީ ނިމުން އައިސްފައެވެ. މި ފަހަރުގެ އޮލިމްޕިކްސްއާ ކުރިމަތިލުމުގެ ކުރިން އެމެރިކާގެ އަންހެން ޓީމުން ވަނީ މެޗަކުން ބަލިނުވެ 44 މެޗު ހަމަކޮށްފައެވެ.

އަންހެނުންގެ ފުޓްބޯޅައިގައި މި ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ އެމެރިކާ އަކީ އެންމެ ފަހުން 2019 ވަނަ އަހަރު ބޭއްވި ފީފާ އަންހެނުންގެ ވޯލްޑް ކަޕުގެ ޗެމްޕިއަނުންނެވެ. އަދި އޭގެ ކުރިން 2015 ވަނަ އަހަރު ބޭއްވި މުބާރާތްވެސް ކާމިޔާބުކޮށްފައިވަނީ އެމެރިކާއިންނެވެ.