މާލެ ސަރަހައްދުގެ ސްކޫލްތަކުގެ ކިޔެވުން ފެށޭ ގަޑި ފުރަތަމަ ދެ ހަފުތާގައި ތަފާތުވާނެ: މިނިސްޓްރީ
ބޭރުން އަންނަ ޓީޗަރުންގެ ޕީސީއާރު ޓެސްޓު ނެގެޓިވް ވެފައިވާކަން ޔަގީންކުރަންޖެހޭ
ގައިދުރުކަމާއެކު ދަރިވަރުން ސްކޫލްތެރެއަށް ވައްދަނީ
ދިރާސީ އައު އަހަރުގެ ކިޔެވުން މިމަހުގެ 10 ގައި ފަށާއިރު، މާލެ ސަރަހައްދުގެ ސްކޫލްތަކުގެ ކިޔެވުން ފެށޭ ގަޑި ފުރަތަމަ ދެ ހަފުތާގައި ތަފާތުވާނެކަމަށް އެޑިއުކޭޝަން މިނިސްޓްރީން ބުނެފިއެވެ.
ކޮވިޑް-19ގެ ހާލަތުގައި މިދިޔަ އަހަރު ސްކޫލްތަކުގެ ކިޔެވުން ފެށިއިރު އެޑިއުކޭޝަން މިނިސްޓްރީން ވަނީ ސްކޫލްތަކުންނާއި ދަރިވަރުން އަމަލުކުރަން ޚާއްސަ އުސޫލެއް އެކުލަވާލާފައެވެ. 2022-2021 ވަނަ އަހަރުގެ ދިރާސީ އައު އަހަރު މިމަހުގެ 10 ވަނަ ދުވަހު ފަށާއިރު، މިއަހަރުވެސް ސްކޫލްތަކުން އަމަލުކުރަންވީ އުސޫލު އެޑިއުކޭޝަން މިނިސްޓްރީން ވަނީ އާންމުކޮށްފައެވެ.
އެޑިއުކޭޝަން މިނިސްޓްރީން އާންމުކޮށްފައިވާ އުސޫލުގައި ވާގޮތުން ސްކޫލްތަކުގެ ދަންފަޅިތަކުގެ ދިގުމިނަކީ އާންމު ހާލަތުގައި ވެސް ދަރިވަރުން ސްކޫލްތަކުގައި ހޭދަކުރަންޖެހޭ ވަގުތު ނަމަވެސް، ފުރަތަމަ ދެ ހަފްތާގައި މާލެ ސަރަހައްދުގެ ސްކޫލްތަކުގެ ކިޔެވުން ފެށޭގަޑި އެކި ގްރޭޑްތަކާ ތަފާތުވާނެއެވެ. އެހެންކަމުން އެކި ގްރޭޑްތަކުގެ ކިޔެވުން ފެށޭ ގަޑިތަކުގައި ވީހާވެސް ތޮއްޖެހުން ކުޑަވާނެހެން އިންތިޒާމުތައް ހަމަޖެއްސުމަށް ވަނީ އަންގާފައެވެ. ކްލާސްރޫމްތަކުގައި ވައި ދައުރުވާނެހެން ހުރިހާ ވަގުތެއްގައި ދޮރުތައް ހުޅުވާފައި ބެހެއްޓުމަށާއި، ކިޔަވައިދިނުން ކުރިއަށް ގެންދިއުމުގައި ގައިދުރުކަން ހުންނާނެހެން ކްލާސްރޫމްތައް ތަރުތީބު ކުރުމަށާއި، އެއަރ ކޮންޑިޝަން ކޮށްފައިވާ ކްލާސްތަކުގައި ދަރިވަރުންގެ މެދުގައި ތިން ފޫޓުގެ ދުރުމިން ހުންނާނެހެން އިންތިޒާމުތައް ހަމަޖެއްސުމަށް ސްކޫލްތަކަށް ވަނީ އަންގާފައެވެ.
ރާއްޖެއިން ބޭރުން އަންނަ ޓީޗަރުން ރާއްޖެ އަންނަތާ 5 ދުވަހާއި 7 ދުވަހުގެ މުއްދަތުގެ ތެރޭގައި ހަދާފައިވާ ޕީސީއާރު ޓެސްޓު ނެގެޓިވް ވެފައިވާކަން ކަށަވަރުކުރުމަށާއި، އޮގަސްޓު 1 ވަނަ ދުވަހުން ފެށިގެން މޮނިޓަރިން އަށް ލާފައިވާ ރަށްރަށަށް ދަތުރުކޮށްފައިވާ މުވައްޒަފުން ސްކޫލް ހުންނަ ރަށަށް އެނބުރި އަންނަތާ 5 ދުވަހާއި 7 ދުވަހުގެ މުއްދަތުގެ ތެރޭގައި ހަދާފައިވާ ޕީސީއާރު ޓެސްޓު ނެގެޓިވް ވެފައިވާކަން ކަށަވަރުކުރުމަށް މިނިސްޓްރީން އަންގާފައިވެއެވެ.
ހައިރިސްކު ކެޓަގަރީގައި ހިމެނޭ ދަރިވަރުން ސްކޫލުގައި ހޭދަކުރާ ވަގުތުތަކުގައި މާސްކާއެކު ފޭސް ޝީލްޑް ބޭނުންކުރުމުގެ ފުރުސަތު ދިނުމަށާއި، ކުރިއެކޭވެސް އެއްގޮތަށް ދަރިވަރުން ސްކޫލަށް ވަންނައިރު، ހުން ބެލުމާއި، އަތް ސާފުކުރުން ފަދަ ކަންކަން ކުރިއަށްގެންދިއުމަށް އަންގާފައިވެއެވެ. މީގެ އިތުރުން މާސްކާނުލައި ތިން ފޫޓުގެ ދުރުމިނުގައި ދަރިވަރުންނަށް ހެލިފެލިވެ އުޅެވޭނެ ވަގުތުކޮޅެއް ދިނުމަށާއި، ތިން ފޫޓުގެ ދުރުމިނުގައި ދަރިވަރުންނަށް އިންޓަރވަލް ނެގޭނެ އިންތިޒާމު ހަމަޖައްސައިދިނުމަށް އަންގާފައިވެއެވެ.
މީގެ އިތުރުން އުމުރުން 12 އަހަރުން މަތީގެ ހުރިހާ ދަރިވަރުންގެ ވެކްސިން ޑޯޒްތައް ފުރިހަމަވުމުން ސްކޫލްގެ އިތުރު ހަރަކާތްތައް ފެށުމަށާއި، މުވައްޒަފުން ވެކްސިން ޑޯޒްތައް ފުރިހަމަކޮށްފައިވީނަމަވެސް ރައްކާތެރިކަމުގެ މިންގަނޑުތައް ދެމެހެއްޓުމަށް މިނިސްޓްރީން އަންގާފައިވެއެވެ. މާލެ ސަރަހައްދުގެ ސްކޫލްތަކުގެ ކިޔެވުން ފެށޭގަޑި އެކި ގްރޭޑްތަކަށް ތަފާތުކޮށް އިންތިޒާމުކުރުމުގައި ސެޝަންގެ ދިގުމިނަށް ގެންނަންޖެހޭ ބަދަލުތައް ސްކޫލްގެ އެޑްމިނިސްޓްރޭޝަންގެ މަޝްވަރާއާއެކު ހަމަޖެއްސުމަށް ވެސް އެޑިއުކޭޝަން މިނިސްޓްރީން ސްކޫލްތަކަށް އަންގާފައިވެއެވެ.
