ފައިޒަރ އަދި މޮޑާނާއިން ޔޫރަޕަށް ވެކްސިން ވިއްކާ އަގު ބޮޑުކޮށްފި

ފައިޒަރ އަދި މޮޑާނާ ކުންފުނިން އުފައްދާފައިވާ ކޮވިޑް-19 ވެކްސިން ޔޫރަޕުގެ ގައުމުތަކަށް ވިއްކާ އަގު އެ ކުންފުނިތަކުުން ބޮޑުކޮށްފިއެވެ.

ފައިނޭޝަލް ޓައިމްސްގައި ރިޕޯޓުކޮށްފައިވާ ގޮތުން ޔޫރަޕިއަން ޔޫނިއަންއާއެކު ފައިޒަރ އަދި މޮޑާނާ ކުންފުނިން އެންމެ ފަހުން ސޮއިކުރި އެއްބަސްވުމުގައި އެ ކުންފުނިތަކުން ވަނީ ވެކްސިންގެ ޑޯޒްތައް އަގު ބޮޑުކޮށްފައެވެ. މި ދެ ވެކްސިނަކީ ކޮވިޑް-19ށް މިހާތަނަށް އުފައްދާފައިވާ ވެކްސިންތަކުގެ ތެރެއިން އެންމެ ފާހަގަކޮށްލެވޭ ދެ ވެކްސިނެވެ.

ރިޕޯޓުތައް ބުނާގޮތުން ކުރިން 18.39 އެމެރިކާ ޑޮލަރަށް ވެކްސިންގެ ޑޯޒެއް ވިއްކި ފައިޒަރ ވެކްސިން، މިހާރު ވިއްކަން އެއްބަސްވެފައި ވަނީ ޑޯޒެއް 23.15 އެމެރިކާ ޑޮލަރަށެވެ. އަދި މޮޑާނާ ވެކްސިންގެ ޑޯޒެއް މިހާރު ވިއްކުމަށް ހަމަޖެހިފައި ވަނީ 25.50 އެމެރިކާ ޑޮލަރަށެވެ. މިއީ ކުރިން މޮޑާނާގެ ކޮވިޑް ވެކްސިންގެ ޑޯޒްތައް ވިއްކަމުން އައި 22.60 އެމެރިކާ ޑޮލަރާ އަޅާބަލާއިރު ބޮޑު އަދަދެއް ނަމަވެސް، ވެކްސިންގެ އަގު ބަދަލުކުރެވުނު އިރު އެންމެ ފުރަތަމަ ޑޯޒެއް ވިއްކަން އެއްބަސްވި 28.50 އެމެރިކާ ޑޮލަރަށް ވުރެ ދަށް އަދަދެކެވެ.

ޔޫރަޕުގައި ޑެލްޓާ ވޭރިއަންޓް ފެތުރުން ކޮންޓްރޯލުކުރުމަށް ގިނަ މަސައްކަތްތަކެއް ކުރަމުންދާއިރު، އެސަރަހައްދުގެ ވެކްސިން ޖެހޭ އާބާދީގެ ބޮޑު ބަޔަކަށް ވެކްސިންގެ ޑޯޒްތައް ޖެހުމަށް އީޔޫ އިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މި ސެޕްޓެމްބަރު މަހާ ހަމައަށް އީޔޫގެ ގައުމުތަކުގެ ވެކްސިންޖެހޭ އާބާދީގެ 70 އިންސައްތަ މީހުންނަށް ވެކްސިންގެ ދެ ޑޯޒް ޖެހޭނެ ކަމަށް ލަފާކުރެއެވެ. އަދި ސެޕްޓެމްބަރާ ހަމައަށް ހަތަރު ކުންފުންޏަކުން ވެކްސިންގެ އެއް ބިލިއަން ޑޯޒް އީޔޫއަށް ލިބޭނެ ކަމަށް އެ ޔޫނިއަން އިން ވަނީ މީގެން ކުރިން ބުނެފައެވެ.