ކޮވިޑާ ގުޅިގެން މެލޭޝިއާގެ ގާނޫނު ހަދާ މަޖިލީހުގެ ހާއްސަ ޖަލްސާތައް މެދުކަނޑާލައިފި

މެލޭޝިއާގެ ގާނޫނު ހަދާ މަޖިލީހުގެ ތެރެއިން ކޮވިޑްގެ ކޭސްތަކެއް ފެނި، މަޖިލީހުގެ ހާއްސަ ޖަލްސާތައް ވަގުތީގޮތުން މެދުކަނޑާލައިފިއެވެ.

މިއާއެކު އިތުބާރު ނެތްކަމުގެ ވޯޓަކާ ހިސާބަށް ގޮސްފައިވާ އެ ގައުމުގެ ބޮޑުވަޒީރު މުހްޔިއްދީން ޔާސީންއަށް ލުއިތަކެއް ލިބިގެންދާނެ ކަމަށް މީޑިއާތަކުން ރިޕޯޓް ކޮށްފައިވެއެވެ. މަގާމުން އިސްތިއުފާ ދިނުމަށް މުހްޔިއްދީން އަށް ގޮވާލާފައިވަނީ ކޮވިޑާ ގުޅިގެން އަޅާފައިވާ ފިޔަވަޅުތަކާ ގުޅިގެން މެލޭޝިއާގެ ރަސްގެފާނު ނުރުހުން ފާޅުކުރައްވާފައިވަނިކޮށެވެ.

ރަސްގެފާނު ސުލްތޯން އަބްދުﷲ ސުލްތޯން އަހްމަދު ޝާހްގެ ގަނޑުވަރުން ބުރާސްފަތި ދުވަހު ބުނީ ގަވާއިދުތައް އުވާލުމުގެ ހުއްދަ ރަސްގެފާނު މިހާތަނަށް ދެއްވާފައިނުވާ ކަމަށެވެ. މަޖިލީހަށް ދޮގު މައުލޫމާތު ފޯރުކޮށްދިނުމުން ރަސްގެފާނު އެކަމާ ހިތްހަމަޖެހިވަޑައި ނުގަންނަވާކަންވަނީ ހާމަކޮށްފައެވެ.

ޖުލައި 26 ވަނަ ދުވަހުން ފެށިގެން އެމަރޖެންސީ ހާލަތާ ގުޅިގެން މަޖިލީހުގެ ޖަލްސާތައް ހުއްޓާލާފައި އޮތުމަށްފަހު އަލުން ޖަލްސާތައް ފެށިގެން ކުރިއަށް ދިޔަ އިރު ޖުލައި މަހުގެ 26 ވަނަ ދުވަހު ކޮވިޑްގެ 11 ކޭސް މަޖިލިސްކުރާ ގެއިން ފެނިފައިވެއެވެ. ހާއްސަ ޖަލްސާތައް ބާއްވަން ނިންމާފައިވަނީ ވެސް މަސް ދުވަހުގެ މެދުކެނޑުމަކަށްފަހުގައެވެ.

ހޯމަ ދުވަހު ހާއްސަ ޖަލްސާތަކުގެ ތެރެއިން ފަހު ޖަލްސާ ބާއްވަން ނިންމާފައިވާ އިރު، މަޖިލީހުގެ އިދާރާއިން ވަނީ ޖަލްސާ ކެންސަލްކޮށްފައިވާކަން އިއުލާންކޮށްފައެވެ. އަދި ޖަލްސާ ފަސްކޮށްފައިވާ ކަމަށާއި، އެގޮތަށް ނިންމާފައިވަނީ މަޖިލިސްކުރާ ގޭގައި ބަލި ފެތުރުމުގެ ފުރުސަތު ބޮޑުކަމަށް ހެލްތް މިނިސްޓްރީން ބުނުމާ ގުޅިގެން ކަމަށް ވެސް މަޖިލީހުގެ އިދާރާއިން ވަނީ ބުނެފައެވެ.