އިންޓަނެޓާއި ބެހޭ ގޮތުން ޝަކުވާއެއް އޮތްނަމަ 1515ށް ގުޅާލާ!
ސަރުކާރުގެ "ނެޓު ހެޔޮ" މަޝްރޫއުގެ ބޭނުމަކީ އިންޓަނެޓްގެ މުޅި ޚިދުމަތް ރަނގަޅުވުން
އިންޓަނެޓްގެ މައްސަލަތައް ގިނަކަމުގެ ޝަކުވާ ކުރަމުންދޭ
ރާއްޖޭގެ އިންޓަނެޓް ޚިދުމަތާއި ގުޅޭ ގޮތުން ޝަކުވާ ހުށަހެޅުމަށް ހޮޓްލައިނެއް ގާއިމްކޮށްފިއެވެ.
އެންވައިރްމަންޓް، ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓްރީން ވަނީ ރާއްޖެއިން ދެމުންދާ އިންޓަނެޓް ޚިދުމާއި ގުޅިގެން ޝަކުވާ ހުށަހެޅުމަށް ޚާއްސަ ހޮޓްލައިނެއް ގާއިމްކޮށްފައެވެ. އަދި ސަރުކާރުގެ "ނެޓު ހެޔޮ" މަޝްރޫއުގެ ބޭނުމަކީ އިންޓަނެޓްގެ މުޅި ޚިދުމަތް ރަނގަޅުވުން ކަމަށް މިނިސްޓްރީން ބުނެއެވެ.
އެހެންކަމުން އިންޓަނެޓް ޚިދުމަތާއި ގުޅޭ އެއްވެސް ޝަކުވާއެއް އޮތް ނަމަ 1515 އަށް ގުޅައި، އެކަން ހިއްސާކޮށްދިނުމަށް މިނިސްޓްރީން ވަނީ އެދިފައެވެ.
ރާއްޖޭގެ އިންޓަނެޓް ޚިދުމަތާއި ގުޅޭ ގޮތުން ޝަކުވާ ހުށަހެޅުމަށް ހޮޓްލައިނެއް ގާއިމްކޮށްފައިވާއިރު، އިންޓަނެޓް ލަސްވުމާއި، އެކަށީގެންވާ ސްޕީޑްގައި ޚިދުމަތް ނުލިބޭ ވާހަކައަކީ ގިނަ ބަޔަކު ކުރަމުންދާ ޝަކުވާއެކެވެ.
އިންޓަނެޓް އަގުހެޔޮކޮށް ހެޔޮއަގުތައް އިއުލާންކުރީ މެއި މަހުގެ 27 ވަނަ ދުވަހު ހެނދުނު އޮންލައިންކޮށް ބޭއްވި ރަސްމިއްޔާތެއްގައެވެ. މި ބަދަލު ގެނައުމުން ގޭބިސީތަކާއި ވިޔަފާރިތަކުގައި ބޭނުންކުރާ އިންޓަނެޓްގެ އަގު ވަނީ ވަރަށް ބޮޑަށް ހެޔޮވެގެން ގޮސްފައެވެ. ޖުލައި މަހުން ފެށިގެން ރެސިޑެންޝަލް އިންޓަނެޓް ގެ ޚިދުމަތް އަގު ހެޔޮކޮށްފައިވާއިރު، މޯބައިލް އިންޓަނެޓް އޮކްޓޯބަރު މަހުން ފެށިގެން ހެޔޮވާނެ ކަމަށް ސަރުކާރުން ބުނެފައިވެއެވެ.
ރާއްޖޭގައި އިންޓަނެޓުގެ ހިދުމަތް ފޯރުކޮށްދޭ ތިން ކުންފުންޏެއް އޮވެ އެވެ. އެއީ ދިރާގު، އުރީދޫ އަދި އާރްއޯއެލް އެވެ. އިންޓަނެޓް އަގުހެޔޮ ކުރުމުގެ ސިޔާސަތުގެ ދަށުން ކުރިއަށް އޮތް ފަސްއަހަރު ދުވަހުގެ ތެރޭގައި ރާއްޖެއަށް އިތުރު ސާވިސް ޕްރޮވައިޑަރެއް ނުގެނައުމަށް ސާވިސް ޕްރޮވައިޑަރުންނާއިއެކު ސަރުކާރުންވަނީ އެއްބަސްވެފައެވެ.
