މާލެ-ހުޅުލެ ގުޅުވައިދޭ ސިނަމާލެ ބްރިޖާއި ހުޅުމާލެ-ފޭސް 2 ގެ ބްރިޖަކީ ކުރީގެ ރައީސް މައުމޫން އަބްދުލްގައްޔޫމްގެ ތަސައްވުރެއް ކަމަށް އާޓްސް، ކަލްޗަރ އެންޑް ހެރިޓޭޖް މިނިސްޓަރު ޔުމްނާ މައުމޫނު ވިދާޅުވެއްޖެއެވެ.

ޕްރޮގްރެސިވް ކޮންގްރެސް ކޯލިޝަނުގެ ގައުމީ ކެމްޕެއިން "މިނިވަންކަމުގެ ދިފާއުގައި-ދިވެހީން" އިފްތިތާހު ކުރުމުގެ ރަސްމިއްޔާތުގައި ޕީއެންްސީގެ ރައީސް އަދި އިދިކޮޅު ކޯލިޝަންގެ އެކްޓިން ލީޑަރު އަބްދުއްރަހީމް އަބްދުﷲ ވަނީ ބޮޑެތި ތުހުމަތުތަކެއް ރައީސް މައުމޫނަށް ކުރައްވާފައެވެ. އެގޮތުން ރައީސް އަބްދުﷲ ޔާމީންގެ ވެރިކަމުގައި، މައުމޫނުގެ ތާއީދު އަނބުރާ ގެންދެވީ ޔާމީން ގެންނަވަމުން ގެންދެވި ތަރައްގީގެ ސަބަބުން މައުމޫނުގެ "ލެގަސީ" ފޮހެވިގެންދާތީ ކަމަށް އަބްދުއްރަހީމް ވިދާޅުވިއެވެ. އަބްދުއްރަހީމް ވިދާޅުވީ ދެބޭފުޅުންގެ ގުޅުން ގޯސްވެފައިވަނިކޮށް 7 އޮކްޓޫބަރު 2016 ގައި ޔާމީންގެ އެދިވަޑައިގަތުމަކަށް މައުމޫނު އެމަނިކުފާނާއި ބައްދަލުކުރެއްވި ކަމަށެވެ. މިބައްދަލުކުރެއްވުމުގައި މާލެ-ހުޅުލެ ގުޅާލަން ބްރިޖް އަޅަނީ ކީއްކުރަންތޯ މައުމޫން ސުވާލު އުފައްދަވާފައިވާ ކަމަށާއި، މާލޭގައި އިސްލާމީ މަރުކަޒެއް ބިނާ ކޮށްފައި ވަނިކޮށް ކިންގް ސަލްމާން މިސްކިތުގެ ނަމުގައި އެހެން އިސްލާމީ މަރުކަޒެއް ހެދުމުގެ ބޭނުމެއް ނެތް ކަމަށް މައުމޫނު ވިދާޅުވެފައިވާ ކަމަށެވެ. އަދި ހުޅުމާލެ ހިއްކަވާފައި ވަނިކޮށް ފޭސް ދޭއްގެ ނަމުގައި "ޒުވާނުންގެ ޝަހަރެއް" ހިއްކުމުގެ ބޭނުމަކީ ކޮބައިތޯ ސުވާލު ކުރެއްވި ކަމަށެވެ. މިއިން އެއްވެސް ކަމަކީ މައުމޫނު ކުރައްވަން ބޭނުންނުވާ ކަމެއް ކަމަށާއި، މިކަން ދޮގު ނުކުރެވޭނެ ކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމްގެ ވާހަކަތަކަށް ރައްދު ދެއްވަމުން ޔުމްނާ ކުރެއްވި ޓްވީޓެއްގައި ވިދާޅުވީ މާލެ-ހުޅުލެ ގުވައިދޭ ސިނަމާލެ ބްރިޖާއި، ހުޅުމާލެ-ފޭސް 2 ގެ ބްރިޖަކީ ވެސް އެކަމަނާގެ ބައްޕާފުޅު މައުމޫނުގެ ތަސައްވުރެއް ކަމަށެވެ. ޔާމީންގެ ސަރުކާރަށް އޮތް ތާއީދު އަނބުރާ ގެންދެވީ ޕީޕީއެމްގެ ސަރުކާރު ޕީޕީއެމްގެ އުސޫލުތަކާއި ދުރަށް ގޮސް ކޮރަޕްޝަނާ އަނިޔާވެރިކަމުގެ ތެރެއަށް ދިޔުމުން ކަމަށް ޔުމްނާ ވިދާޅުވިއެވެ. އަދި ވިދާޅުވީ އޭރު ކަން ހިނގާދިޔަ ގޮތް ހަނދާން ނެތޭހާ ދުވަހެއް ނުވާ ކަމަށެވެ.

އަބްދުއްރަހީމް ގިނަ ތުހުމަތުތަކެއް ކުރެއްވި، ނަމަވެސް ޔާމީންގެ ސަރުކާރަށް ކުރާ ތާއީދު އަނބުރާ ގެންދެވިކަން ހާމަކޮށް ބޭއްވި ނޫސްވެރިންގެ ބައްދަލުވުމުގައި މައުމޫނު ވިދާޅުވީ ޔާމީނާއި ބައްދަލުކޮށް މައްސަލަތައް ހައްލުކުރުމަށް މަސައްކަތް ކުރެއްވި ކަމަށެވެ. އަދި ޔާމީނާ ބައްދަލުކޮށް މަޝްވަރާކުރައްވަން ކުރި ހުރިހާ މަސައްކަތްތަކެއްވީ ނާކާމިޔާބުވެފައި ކަމަށް މައުމޫނު ވިދާޅުވިއެވެ. އަދި ވިދާޅުވީ ޔާމީނާ ބައްދަލުނުވާތާ އަހަރެއް ވެފައިވާ ކަމަށެވެ.

ޔާމީނުގެ ސަރުކާރަށް އޮތް ތާއީދު އަނބުރާ ގެންދަވާކަން މައުމޫން ހާމަ ކުރެއްވީ ޕީޕީއެމްގެ ހިންގުން ޕާޓީގެ މުސްތަޝާރު ޔާމީނާއި ހަވާލު ކުރުމަށް ކޯޓުން ތާއީދުކޮށްފައި ވަނިކޮށް 27 އޮކްޓޫބަރު 2016 ގައެވެ.