ބްރައިޓަންއަށް ކުޅެމުން އައި އިންގްލެންޑުގެ ޑިފެންޑަރު ބެން ވައިޓުގެ ސޮއި އާސެނަލުން ހޯދައިފިއެވެ.
އުމުރުން 23 އަހަރުގެ ވައިޓް އާސެނަލަށް ބަދަލުވީ 50 މިލިޔަން ޕައުންޑުގެ ފީއަކަށެވެ. އާސެނަލުން ވައިޓުގެ ސޮއި ހޯދިއިރު، އޭނާ ހޯދުމަށް އާސެނަލުން މީގެ ކުރިން ދެ ފަހަރެއްގެ މަތިން ވަނީ ބިޑް ކޮށްފައެވެ.
އާސެނަލުގެ ރަސްމީ ވެބްސައިޓަށް ދިން އިންޓަވިއުއެއްގައި އެ ޓީމުގެ ކޯޗު މިކޭލް އާޓެޓާ ބުނީ ވައިޓަކީ މި ފަހަރުގެ ޓްރާންސްފާ ބާޒާރުގައި އާސެނަލުން ގެންނަށް އެންމެ ބޮޑަށް ބޭނުންވި ކުޅުންތެރިޔާ ކަމަށާއި، އެހެންކަމުން އޭނާގެ ޓްރާންސްފާގެ ކަންކަން ނިމުމުން ހިތްހަމަޖެހޭ ކަމަށެވެ. އަދި ވައިޓަކީ ވިސްނުންތޫނު ޑިފެންޑަރެއް ކަމަށާއި، އޭނާއާއެކު އާސެނަލުގެ ފަހަތް އިތުރަށް ވަރުގަދަ ވެގެންދާނެ ކަމަށްވެސް އާޓެޓާ ވަނީ ބުނެފައެވެ.
ވައިޓަކީ މި ފަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި އިންގްލެންޑުގެ ސްކޮޑުގައި ހިމެނުނު ކުޅުންތެރިއެކެވެ. އިންގްލެންޑުގެ ސްކޮޑުން ވައިޓަށް ފުރުސަތު ލިބުނީ ޔޫރޯގެ ކުރިން ލިވަޕޫލުގެ ޒުވާން ޑިފެންޑަރު ޓްރެންޓް އަލެކްސަންޑަ-އާނޯލްޑަށް އަނިޔާވުމުންނެވެ. އެކަމަކު މި ފަހަރުގެ ޔޫރޯގައި ވައިޓް މެޗެއް ކުޅެފައެއް ނުވެއެވެ.
ބްރައިޓަންއިން ސީނިއާ ކެރިއަރު ފެށި ވައިޓް މީގެ ކުރިން ވަނީ ލޯނު އުސޫލުން ނިއުޕޯޓް ކައުންޓީ އާއި ޕީޓަބޮރޯ ޔުނައިޓެޑް އަދި ލީޑްސް ޔުނައިޓެޑަށް ކުޅެފައެވެ. އޭގެ ތެރެއިން 2019-2020 ވަނަ އަހަރުގެ ސީޒަނުގެ އިނގިރޭސި ދެވަނަ ޑިވިޝަނުގެ ޗެމްޕިއަންކަން ލީޑްސްއިން ހޯދިއިރު، ވައިޓް ވަނީ އެ ޓީމުގައި ތަފާތު މޮޅު ކުޅުމެއް ދައްކާފައެވެ. އަދި މިދިޔަ ސީޒަނުގައި ވައިޓް ވަނީ ބްރައިޓަންއާއެކު އިނގިރޭސި ޕްރިމިއާ ލީގުގައިވެސް މޮޅު ކުޅުމެއް ދައްކާފައެވެ.
އާސެނަލުން ވައިޓްގެ ސޮއި ހޯދިއިރު، އެ ޓީމުން ވަނީ މި ޓްރާންސްފާގައި ބެންފިކާއަށް ކުޅެމުން އައި އުމުރުން 21 އަހަރުގެ ނޫނޯ ޓަވަރޭސްގެ ސޮއި ހޯދާފައެވެ. އެކަމަކު ކުރިއަށް އޮތް ސީޒަނަށް ބްރެޒިލުގެ ޑިފެންޑަރު ޑޭވިޑް ލުއިޒްގެ އެއްބަސްވުން އާނުކުރަން އާސެނަލުން ވަނީ ނިންމާފައެވެ.
