މިދިޔަ ޖޫން މަހު ކަސްޓަމްސްގެ އިމްޕޯޓާއި އެކްސްޕޯޓް އިތުރު
ރާއްޖެއިން ކްލިއަރެންސް ދިން އުޅަނދުފަހަރު ވެސް މިދިޔަ ޖޫން މަހު އިތުރު
ކަސްޓަމްސް ކްލިއަރެންސްގައި ހުރި މުދާތަކެއް
މިދިޔަ ޖޫން މަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ 59 އިންސައްތަ އިތުރުވެއްޖެއެވެ.
ކަސްޓަމްސްއިން އާންމުކޮށްފައިވާ މިދިޔަ ޖޫން މަހުގެ ތަފާސްހިސާބުތައް ދައްކާގޮތުން އެމަހު ރާއްޖެއިން އެކްސްޕޯޓުކުރި މުދަލުގެ އެފްއޯބީ އަގާއި، އިމްޕޯޓުކުރި މުދަލުގެ ސީއައިއެފް އަގު އޭގެ ކުރީ އަހަރާ އަޅާ ބަލާއިރު ވަނީ އިތުރުވެފައެވެ.
ކަސްޓަމްސްއިން ބުނީ މިއަހަރުގެ ޖޫން މަހު ރާއްޖެއިން އެކްސްޕޯޓުކުރި މުދަލުގެ އެފްއޯބީ އަގު 228 މިލިއަން ރުފިޔާއަށް އަރާ ކަމަށެވެ. މިދިޔަ 2020 އަހަރުގެ ޖޫންމަހު ރާއްޖެއިން އެކްސްޕޯޓުކުރި މުދަލުގެ އެފްއޯބީ އަގު އަރަނީ 221 މިލިއަން ރުފިޔާއަށް ކަމަށާއި، މިއަހަރު 3 އިންސައްތަ އިތުރުވެފައިވާ ކަމަށް ކަސްޓަމްސްއިން ބުނެފައިވެއެވެ.
ރާއްޖެއަށް އިމްޕޯޓުކުރި މުދަލުގެ ސީއައިއެފް އަގު މިދިޔަ އަހަރާ އަޅާ ބަލާއިރު 44 އިންސައްތަ އިތުރުވެފައިވާ ކަމަށާއި، މިދިޔަ އަހަރު ރާއްޖެއަށް އިމްޕޯޓުކުރި މުދަލުގެ ސީއައިއެފް އަގު 2.1 ބިލިއަން އަރާ ކަމަށާއި، މިއަހަރު މި އަދަދު 3 ބިލިއަން ރުފިޔާއަށް އަރާފައިވާކަމަށް ކަސްޓަމްސްއިން ވަނީ ބުނެފައެވެ.
މިއާއެކު ކަސްޓަމްސްއަށް މިއަހަރުގެ ޖޫން މަހު ލިބުނު އާމްދަނީ 247 މިލިއަން ރުފިޔާއަށް އިތުރުވެފައިވާ ކަމަށް ކަސްޓަމްސްއިން ބުނެފައިވެއެވެ. މިދިޔަ އަހަރުގެ ޖޫން މަހު ކަސްޓަމްސްއަށް ލިބުނީ 156 މިލިއަން ރުފިޔާ ކަމަށާއި، މި އަހަރު މި އަދަދު ވަނީ 59 އިންސައްތައަށް އިތުރުވެފައި ކަމަށް ކަސްޓަމްސްއިން ބުނެފައިވެއެވެ.
ފާއިތުވި މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ އޮމާން، ޗައިނާ އަދި ސިންގަޕޫރުންނެވެ. އޮމާނުން 490 މިލިއަން ރުފިޔާގެ މުދާ އެތެރެކޮށްފައިވާ ކަމަށާއި، ޗައިނާއިން 391 މިލިއަން ރުފިޔާގެ މުދާ، އަދި ސިންގަޕޫރުން 354 މިލިއަން ރުފިޔާގެ މުދާ ރާއްޖެ އެތެރެކޮށްފައިވާ ކަމަށް ކަސްޓަމްސްއިން ވަނީ ބުނެފައެވެ. މިދިޔަ ޖޫން މަހު ރާއްޖެއިން އެންމެ ގިނަ މުދާ އެކްސްޕޯޓުކޮށްފައިވަނީ ތައިލެންޑު، ޖަޕާން އަދި ޖަރުމަނުވިލާތަށް ކަމަށް ކަސްޓަމްސްއިން ބުނެފައިވެއެވެ.
ޖޫން މަހު ޕްރޮސެސް ކުރި ޑިކްލަރޭޝަންއަށް ބަލާއިރު، މިދިޔަ އަހަރު އެ އަދަދު ހުރީ 6،593 ގައެވެ. މިއަހަރުގެ ޖޫން މަހު މި އަދަދު ހުރީ 13،831 ގައެވެ.
މީގެ އިތުރުން ކްލިއަރެންސް ދެވުނު އުޅަނދުތަކުގެ ތަފާސްހިސާބުތަކަށް ބަލާއިރު، ރާއްޖެއިން ބޭރުން އައިސްފައިވާ 67 އުޅަނދަކަށް މިދިޔަ އަހަރުގެ ޖޫން މަހު ވަނީ ކްލިއަރެންސް ދީފައެވެ. މިއަހަރުގެ ޖޫން މަހު 82 އުޅަނދަކަށް ކްލިއަރެންސް ދީފައިވާ ކަމަށް ކަސްޓަމްސްއިން ވަނީ ބުނެފައެވެ. ރާއްޖެއިން ފުރާފައިވާ 73 އުޅަނދަކަށް ކްލިއަރެންސް ދީފައިވާއިރު، މިއަހަރު 93 އުޅަނދަކަށް ކްލިއަރެންސް ދީފައިވާ ކަމަށް ކަސްޓަމްސްއިން ބުނެފައިވެއެވެ.
