އައްސޭރި ޖަލުގެ ވަށާފާރު އުސްކުރުމުގެ އަމަލީ މަސައްކަތް މި މަހު 29 ގައި ފެށޭނެ- ކޮމިޝަނަރ
28 ޖުލައި 2021 | ބުދަ 07:13މި ޕްރޮޖެކްޓުގެ މަސައްކަތް ނިމުމުން، ފާރުމަތިން ޖަލުގެ ތެރެއަށް އެއްޗެހި އުކާ މައްސަލައަށް ހައްލެ ލިބިގެންދާނެ
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު
އައްސޭރި ޖަލުގެ ވަށާފާރު އުސްކުރުމުގެ ޕްރޮޖެޓް ބަޔަކާ ހަވާލުކުރެވިފައިވާ ކަމަށާއި، 29 ޖުލައިގައި އަމަލީ މަސައްކަތް ފެށިގެން ދާނެ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ކޮމިޝަނަރ މިހެން ވިދާޅުވީ އައްސޭރި ޖަލުގެ އޮފިސަރުން ހިންގި އޮޕަރޭޝަނެއްގައި ޖަލަށް ވެއްދުމަށްޓަކައި އެ ޖަލުގައި ޕޮޓުކޮށްފައިވާ މަސްތުވާތަކެތި އެ ޖަލުގެ އޮފިސަރުން ހޯދާފައިވާ ކަން ހާމަކުރައްވައި ކުރެއްވި ޓްވީޓެއްގައެވެ. މީގެ އިތުރުން މި ޕްރޮޖެކްޓުގެ މަސައްކަތް ނިމުމުން، ފާރުމަތިން ޖަލުގެ ތެރެއަށް އެއްޗެހި އުކާ މައްސަލައަށް ހައްލެ ލިބިގެންދާނެ ކަމަށް ކޮމިޝަނަރ ވިދާޅުވިއެވެ. .
އަންގާރަ ދުވަހު ހިންގި މި އޮޕަރޭޝަނާ ގުޅިގެން ކޮމިޝަނަރ ވިދާޅުވީ މި އޮޕަރޭޝަން ހިންގާފައިވަނީ އަންގާރަ ދުވަހުގެ ރޭ ލިބުނު މައުލޫމާތަކާ ގުޅިގެން ކަމަށާއި، މި ތަކެތި މިހާރު ފުލުހުންނާ ހަވާލުކުރެވިފައިވާ ކަމަށެވެ.
ރާއްޖޭގެ ޖަލުތަކުގެ ހާލަތު ރަނގަޅުކުރުމަށްޓަކައި ސަރުކާރުން ޚާއްސަކޮށް ހޯމް މިނިސްޓަރުގެ އިސްނެންގެވުމަށް ޚާއްސަ މަސައްކަތްތަކެއްދަނީ ކުރައްވަމުންނެވެ. އެގޮތުން ޖަލުތަކުގެ ހާލަތު ދެނެގަތުމަށް ކޮމިޝަން ފޮރ ޕްރިޒަންސް އޮޑިޓްގެ ނަމުގައި ކޮމިޝަނެއް އުފައްދަވައި ޖަލުތަކުގެ އޮޑިޓް ރިޕޯޓެއްވަނީ އެކުލަވާލައި އާންމުކުރައްވާފައެވެ. އަދި އދ.ގެ "މަންޑޭލާ ރޫލްސް"ގެ މިންގަނޑަށް ޖަލުތަކުގެ ކަންތައްތައް އިންތިޒާމުކުރުމުގެ މަސައްކަތް ފަށާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވަނީ ވިދާޅުވެފައެވެ.
ޖަލުގައި ޖާގަ ނެތުމުން އެކި ކުށްކުށުގައި ޖަލަށްލެވޭ މީހުން އެއްތަނެއްގައި ތިބެންޖެހިފައިވާކަމަށާއި އެހެންނަމަވެސް ބޮޑެތި ކުށްވެރިންނާއި ހައްދުފަހަނަ އަޅާފައިވާ މީހުންގެ ގޮތުގައި ފާހަގަކުރެވިފައިވާ މީހުން ވަކިކުރުމުގެ މަސައްކަތް ކުރަމުން އަންނަކަމަށް މިނިސްޓަރ އިމްރާން ވަނީ މީގެ ކުރިން ވިދާޅުވެފައެވެ. ޖަލުގެ ހާލަތު ރަނގަޅުކުރުމަށް ޖަލުތަކުގެ ހާއްސަ އޮޑިޓެއް ހަދައި، ފާހަގަކުރެވުނު ކަންކަން އިސްލާހުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ދަށުން މާލެއާއި ހުޅުމާލޭ ޖަލު އެއްކޮށްލުމުގެ މަސައްކަތް މި އަހަރު ކުރުމަށް ވަނީ ނިންމާފައެވެ.
މާލެއާއި ހުޅުމާލޭ ޖަލު އެއްކޮށްލުމަށްފަހު އަޅާ ޖަލު ވެގެންދާނީ ރާއްޖޭގައި ހަދާ ސަރަހައްދީ އެންމެ ބޮޑު ޖަލަށް ކަމަށާއި މިތަނުގައި ރިމާންޑް މީހުންނާއި އަންހެން ޤައިދީންގެ އިތުރުން ކުޑަކުދިން ވެސް ބޭތިއްބުމަށް ނިންމާފައިވާކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވަނީ ވިދާޅުވެފައެވެ.
މި ތަނަކީ ޑިޓެއިނީސްއަށް ހާއްސަ ޖަލަކަށް ވާނެކަމަށް ވެސް ކޮމިޝަނަރ އަހްމަދު މުޙައްމަދުފުޅު ވިދާޅުވިއެވެ. ކުށްވެރިން އެއްތަނުން އަނެއްތަނަށް އުފުލުމަކީ މިހާރު ދިމާވާ އެންމެ ބޮޑު ގޮންޖެހުންކަން ފާހަގަކުރައްވަމުން ކޮމިޝަނަރ ވިދާޅުވީ އައު ޖަލާއެކު މިކަމަށް ހައްލެއް ލިބިގެންދާނެކަމަށެވެ. އަދި މި މަސައްކަތް ނިމޭއިރު މުވައްޒަފުން ތިބޭނެ އިތުރު އެކޮމަޑޭޝަން ބްލޮކްތައް ވެސް ހެދިގެންދާނެކަމަށެވެ. ކޮމިޝަނަރ އަހްމަދު މުޙައްމަދުފުޅު ވިދާޅުވީ މާލެއާއި ހުޅުމާލޭ ޖަލު އެއްކޮށްލުމުގެ މަސައްކަތް ނިންމައި 2022 ވަނަ އަހަރު އެތަން ބޭނުންކުރަން ފެށޭވަރުވާނެކަމަށެވެ.
