އެމްއެސްއެސްގެ ކޮންޓެއިނަރ އަގުތައް ވަނީ އެއް ހަމައެއްގައި ހިފެހެއްޓިފައި

މޯލްޑިވްސް ސްޓޭޓް ޝިޕިން (އެމްއެސްއެސް)ގެ ޚިދުމަތްފެށި އެއް އަހަރު ދުވަސް ވެގެން ދިޔަ އިރު، އެ ކުންފުނިން އުފުލާ ކޮންޓެއިނަރުތަކުގެ އަގަށް މާބޮޑު ބަދަލުތަކެއް ނުގެނެސް އެއް ހަމައެއްގައި ހިފެހެއްޓިފައިވާ ކަމަށް އެމްއެސްއެސްގެ ބެލެނިވެރި ކުންފުނިކަމަށްވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ ހުސެން އަމްރު ވިދާޅުވެއްޖެއެވެ.

އެސްޓީއޯގެ ސަބްސިޑަރީ ކުންފުނިތަކާ ގުޅޭގޮތުން ރާއްޖެޓީވީގެ 'ވިޔަފާރި މިއަދު' ޕްރޮގްރާމްގައި ވާހަކަދައްކަވަމުން އަމްރު ވަނީ އެމްއެސްއެސް ގެ މަސައްކަތް ފެށިގެން އައި އިރު، ކޮވިޑް-19ގެ ސަބަބުން އެޅިފިޔަވަޅުތަކާއެކު ދުނިޔޭގެ ގިނަ ގައުމުތަކެއް ލޮކްޑައުން ކުރުމުން ފްރައިޓްގެ އަގު ވަރަށް ބޮޑުތަނުން އުފުލިގެން ދިޔަކަން ފާހަގަކުރައްވާފައެވެ. މިއާއެކުވެސް އެމްއެސްއެސް އިން އުފުލާ ކާގޯގެ އަގަށް ބޮޑެތި ބަދަލުތަކެއް ނުގެނެސް އޮޕަރޭޓް ކުރެވިފައިވާ ކަމަށާއި ކާގޯގެ އަގުތަކަށް ބަދަލެއް އައިސްފައިވާ ނަމަ އެ ބަދަލު އައިސްފައި ވަނީ ދުނިޔޭގެ އަގުތަކަށް އައި ބަދަލުތަކާއެކު ކަމަށް އަމްރު ވަނީ ވިދާޅުވެފައެވެ.

އަމްރު ވަނީ އެމްއެސްއެސްގެ ޚިދުމަތް ފެށި އެއް އަގުތަކަށް ބަދަލު ނުގެނެސް ވިޔަފާރިވެރިންނަށް ކުންފުނީގެ ޚިދުމަތްތައް ފޯރުކޮށްދެމުންދާތީ އޭގެ ފައިދާ ރާއްޖޭގެ އަމިއްލަ ވިޔަފާރިވެރިންނަށް ކުރަމުން އަންނަކަމަށް ވިދާޅުވެފައެވެ. އެގޮތުން އެމްއެސްއެސްގެ ސަބަބުން ހޯލްސޭލް އަދި ރީޓެއިލް ވިޔަފާރި ކުރާ ކުދި އަދި މެދު ފަންތީގެ ވިޔަފާރިތަކަށް ވަރަށް ބޮޑު ފަސޭހަތަކެއް ވެގެން ގޮސްފައިވާކަން އަމްރު ފާހަގަކުރެއްވިއެވެ.

އޭގެ އިތުރުން އެމްއެސްއެސްގެ މަސައްކަތްތައް އިތުރަށް ފުޅާކުރުމުގެ މަސައްކަތްތައް ކުރަމުންދާ ކަމަށާއި ބޭނުމަކީ ރާއްޖެއަށް ބޭރުގެ ފައިސާ ވަންނާނެ އިތުރު ދޮރުތައް ހުޅުވުން ކަމަށް އަމްރު ވިދާޅުވިއެވެ. އަދި އެމްއެސްއެސްގެ ޚިދުމަތް ފުޅާކޮށް ރާއްޖެއިން ބޭރަށް ޚިދުމަތް ދިނުމުގެ މަސައްކަތްތައް ކުރާނެ ކަމަށް ވިދާޅުވިއެވެ.

މީގެ ކުރިން 'ވިޔަފާރި މިއަދު' ޕްރޮގްރާމްގައި ވާހަކަދައްކަވަމުން އެމްއެސްއެސްގެ މެނޭޖިން ޑިރެކްޓަރ ކެޕްޓަން އަބްދުﷲ ސައީދު ވަނީ އެމްއެސްއެސްގެ ޚިދުމަތް ފެށި އިރު، އެ ކުންފުނީގެ ކޮންޓެއިނަރ ވެސަލް އިން އަމިއްލަ ވިޔަފާރިވެރިންގެ އޯޑަރުތަކާއެކު އުފުލަމުން ދިޔައީ 50 ކޮންޓެއިނަރުގެ މުދާ ކަމަށާއި ނަމަވެސް މިހާރު އެންމެ މަދުވެގެން 300 ކޮންޓެއިނަރުގެ މުދާ ކޮންމެ ދަތުރެއްގައި އުފުލާ ކަމަށް ވިދާޅުވެފައެވެ. އަދި ކުންފުނީގެ ޝެޑިއުލް މެއިންޓެއިންކޮށް އިންޓަނޭޝަނަލް ޝިޕިން ލައިންތަކާ ގުޅިގެން ކުންފުނީގެ ކޮންޓެއިނަރ ކާގޯގެ ވޮލިއުމް އިތުރުކުރުމުގެ މަސައްކަތް ކުރަންފަށައި މިހާރު ދުނިޔޭގެ އެންމެ ބޮޑު ޝިޕިން ލައިން މަރސްކްއާ އެކު އެއްބަސްވުމަކަށް އާދެވިފައިވާ ކަމަށް ވަނީ ވިދާޅުވެފައެވެ.

އެމްއެސްއެސްގެ ކޮންޓެއިނަރ ވެސަލްގެ ދަތުރުތައް މިހާރު ކޮންމެ 10 ދުވަހަކުން ރާއްޖެއަށް ކުރެއެވެ.