ރައީސް މައުމޫނުގެ އޯޑަރަށް ކުރީގެ ރައީސް މުޙައްމަދު ނަޝީދަށް ޖަލުގައި އެކި ކަހަލަ އަނިޔާތައް ކުރިކަމަށް ދެކެވޭ ވާހަކަތައް ރައީސް މައުމޫނު ދޮގު ކުރައްވައިފިއެވެ.
ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ރައީސް މައުމޫނު ވިދާޅުވީ، އެއްވެސް އިރެއްގައި ޖަލުގައި މީހުންނަށް އަނިޔާ ކުރުމަކީ އެމަނިކުފާނު ރުހިވަޑައިގަންނަވާ ކަމެއް ނޫންކަމަށެވެ. އަދި އެފަދަ ކަމަކަށް އެއްވެސް އިރެއްގައި ހުއްދަ ދެއްވާފައިނުވާނެ ކަމަށެވެ. ނަމަވެސް ވެރިކަމުގައިވެސް އަދި އޭގެ ކުރިންވެސް އެ އިރަކު އޮންނަ ސަރުކާރަކަށް ނޭނގި އެކަންކަން ހިނގާފައިވާކަމަށް ރައީސް މައުމޫނު ވިދާޅުވިއެވެ.
ރައީސް މައުމޫނު ވިދާޅުވީ، އެފަދަ މައްސަލައެއް ހުށައެޅުނު ކޮންމެ ފަހަރަކުވެސް އެކަމަށް ވަކި ކޮމިޓީއެއް އުފައްދަވައި، ތަހުގީގު ކުރައްވާފައިވާނެ ކަމަށެވެ. އަދި އެފަދަ ބައެއް މައްސަލަތައް ޝަރީއަތަށް ފޮނުއްވާފައިވާނެ ކަމަށެވެ.
ބައެއް މައްސަލަ ޝަރީއަތަށް ފޮނުވައިގެން ސާބިތުވެފައިވެސް ހުންނާނެ. އަޅުގަނޑާ ހިސާބަށް މައްސަލައެއް އަތުވެއްޖެނަމަ ވަރަށް ރަނގަޅަށް ބަލާ ހަދަންކުރީގެ ރައީސް މައުމޫނު ޢަބްދުލް ޤައްޔޫމު
ރައީސް މައުމޫނުގެ ވެރިކަމުގައި ކުރީގެ ރައީސް ނަޝީދަށް ޖަލުގައި އެކި ކަހަލަ އަނިޔާތައް ކުރިކަމަށް ކުރެވޭ ތުހުމަތުތަކާ ގުޅޭގޮތުން ރައީސް މައުމޫނު ވިދާޅުވީ، ޚުދު ރައީސް ނަޝީދުވެސް އެފަދަ ވާހަކަފުޅެއް ދައްކަވާނެ ކަމަށް ގަބޫލުފުޅު ނުކުރައްވާ ކަމަށެވެ. އަދި ރައީސް ނަޝީދަކީ ރައްޔިތުންގެ ޤަދަރާއި އިޙްތިރާމް ލިބިވަޑައިގެންވާ ބޭފުޅެއްކަން ފާހަގަ ކުރައްވައި ރައީސް މައުމޫނު ވިދާޅުވީ، އެއްވެސް އަސާސެއް ނެތި ރައީސް ނަޝީދު އިތުރުފުޅެއް ހައްދަވާފައި އޮވެދާނެކަމަށް ގަބޫލުފުޅު ނުކުރައްވާ ކަމަށެވެ.
ރައީސް މައުމޫނު ވަނީ، އެމަނިކުފާނަށް އެނގިވަޑައިގެން ރައީސް ނަޝީދަށް އެއްވެސް އަނިޔާއެއް ދީފައި ނުވާނެ ކަމަށް ވިދާޅުވެފައެވެ. އެގޮތުން މީހުން އަނދަގޮނޑި ޖެހުން އުވާލެއްވީވެސް އެމަނިކުފާނުކަން ފާހަގަ ކުރައްވައި، އެއްވެސް މީހަކަށް ލާއިންސާނީ އަނިޔާއެއް ލިބުމަށް އެދިވަޑައިނުގަންނަވާކަމަށް ވިދާޅުވިއެވެ.
