ކުޅުދުއްފުށި ސިޓީ އިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު 14ށް އަރައިފިއެވެ.

ކުޅުދުއްފުށީ ރީޖަނަލް ހޮސްޕިޓަލުން ބުނީ ހޯމަ ދުވަހު އޯޕީޑީ އިން އިތުރު ހަތަރު ކޭހެއް ފެނިފައިވާ ކަމަށާއި, މިވަގުތު ފުރަބަންދުގެ 3 ޕޮޒިޓިވް ކޭހާއެކު އެ ސިޓީން 14 މީހަކު ކޮވިޑަށް ޕޮޒޓިވްވެފައިވާ ކަމަށެވެ.

ކުޅުދުއްފުށީ ހޮސްޕިޓަލުން ބުނީ އަލަށް ޕޮޒިޓިވްވި މީހުންގެ ކޮންޓެކްޓް ޓްރޭސިންގެ މަސައްކަތް މިހާރު ކުރިއަށްދާ ކަމަށެވެ.

ރަށުގައި ބަލި ފެތުރުމުގެ ފުރުސަތު އަދިވެސް އޮތުމާއެކު، ރައްކާތެރިކަމުގެ ފިޔަވަޅުތައް އެޅުން މަތީ ދެމިތިބުމަށް ކުޅުދުއްފުށީ ހޮސްޕިޓަލުން ވަނީ އިލްތިމާސްކޮށްފައެވެ. ވަކިން ޚާއްސަކޮށް މި ދުވަސްވަރަކީ ޗުއްޓީ ދުވަސްވަރަށް ވުމާއެކު، މީހުން އެއްވެ އުޅޭ ތަންތަނަށް ނުދިޔުމަށް ހޮސްޕިޓަލުން އިލްތިމާސްކޮށްފައިވެއެވެ.

އެރަށުން އެންމެ ފުަރަތަމަ ޕޮޒިޓިވް ކޭސްއެއް ފެނުނީ މި މަހުގެ 23 ވަނަ ދުވަހުއެވެ. އެއީ 13 އަހަރުގެ ކުޑަ އަންހެން ކުއްޖެކެވެ. އެކުއްޖާގެ 23 ޑައިރެކްޓް ކޮންޓެކްޓުން ފާހަގަކުރެވުނު ކަމަށް ކުޅުދުއްފުށީ ހޮސްޕިޓަލުން ބުނެފައިވެއެވެ.

ޑައިރެކްޓް ކޮންޓެކްޓުންގެ ނަތީޖާއަށް ބަލައި އިތުރު ސާމްޕަލްތައް ނަގާނެ ކަމަށާއި، ގިނަ ކޭސްތަކެއް ފެނިއްޖެނަމަ ރަށުގައި ބަލި ފެތުރިފައި އޮތް މިންވަރު ދެނެގަންނަން ރެންޑަމް ސާމްޕަލް ނަގާނެ ކަމަށްވެސް އެ ހޮސްޕިޓަލުން ބުނެފައިވެއެވެ.

މީގެ އިތުރުން އެޗްޕީއޭގެ ގަވައިދުގެ ދަށުން އެރަށް މޮނިޓަރިންނަށް ލުމާއެކު، ރޭގަނޑު 09:00ން ފަތިހު 04:00ށް ވަނީ ކާފިއު ވެސް ހިންގާފައެވެ.

މިދިޔަ ޖޫން މަހުގެ 10 ވަނަ ދުވަހު ވެސް ކުޅުދުއްފުށި ސިޓީ ވަނީ މޮނިޓަރިންނަށް ލާފައެވެ. އެއީ އެރަށުން ފްލޫ ކްލިނިކަށް ދެއްކި މީހަކު ޕޮޒިޓިވްވެގެންނެވެ. އަދި މެއި މަހު ވެސް ކުޅުދުއްފުށި ސިޓީ މޮނިޓަރިންނަށް ލާފައިވެއެވެ.