މާސްކާ ނުލައި ދެން ދިރިއުޅޭނީ ކިހިނެއް؟

މީގެ އަހަރެއްހާ ދުވަސް ކުރިން އަޅުގަނޑުމެންނަށް ފެނިގެން ދިޔައީ ކޮވިޑާއި ގުޅިގެން ދިވެހިން އައު އުސޫލުތަކަކަށް ތަބާވާން ޖެހުނުތަނެވެ. ކޮވިޑުން ރައްކާތެރިވުމަށްޓަކައި އަޅަން ޖެހޭ ކޮންމެހެން މަޖުބޫރު ފިޔަވަޅުތަކުގެ ތެރޭގައި މާސްކް އެޅުން މަޖުބޫރު ކަމަކަށް ވެގެން ދިޔައެވެ. ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅުތައް އިތުރަށް ވަރުގަދަ ކުރުމުގެ ގޮތުން އާންމު ތަންތާގައި މާސްކް އެޅުން މަޖުބޫރު ކަމަށްވެގެން ދިޔައެވެ. އެންމެ ފުރަތަމަ މި އުސޫލު މާލެ ސަރަހައްދަށް ތަންފީޒު ކުރި ނަމަވެސް ފަހުން ރަށްރަށުގައި ވެސް ކޭސްތައް އިތުރުވާން ފެށުމާއި ގުޅިގެން ފެބްރުއަރީ ހަތްވަނަ ދުވަހުން ފެށިގެން ރަށްރަށުގައި ވެސް ވަނީ މާސްކް އެޅުން މަޖުބޫރުކޮށްފައެވެ.

މިއުސޫލާއި ގުޅިގެން އަޅުގަނޑުމެންނަށް އެކި ކަހަލަ ތަފާތު ކަންކަންތައް ފެނިގެން ދިޔައެވެ. މާސްކުގެ ވިޔަފާރި އިތުރުވެގެން ދިޔައިރު އަވަށްޓެރި އިންޑިއާއިން ވެސް ވަނީ ކޮވިޑާއި ގުޅިގެން ތަފާތު އެތައް ކަމެއް ކޮށްފައެވެ. އެގޮތުން ވައިރަސްއަށް ބިރުގަންނަ ކަސްޓަމަރުންނަށް ޚާއްސަކޮށްގެން އެއް ރެސްޓޯރެންޓަކުން ވަނީ "ކޮވިޑް ރިހަ" އަދި "މާސްކް ނާން" އެފަދަ މީހުންނަށް ފޯރުކޮށްދޭން ފަށާފައެވެ. މިފަދަ މަޖާ އެތައް ކަމެއް ފެނިގެން ދިޔައިރު މާސްކް އަޅައިގެން ތިބެ ކެއިންބުއިމުގެ ކަންތައް ކުރިއަށް ގެންދާނެ ގޮތަށް ވެސް ބައެއް މީހުން ޖޯކު ޖަހާ ވީޑިއޯތައް ވަނީ އާންމުކޮށްފައެވެ.

މިފަދަ ސީރިއަސްކަމެއްގެ ތެރެއިން މަޖާކުރުމަށް ވެސް ފުރުސަތު ލިބިގެން ދިޔައިރު މާސްކް ނާޅާ މީހުންނާއި ދޭތެރޭގައި ފިޔަވަޅު އަޅާނެ ކަމަށް ސަރުކާރުން ބުންޏެވެ. މިފިޔަވަޅުތަކުގެ ދަށުން ފާއިތުވި މަސްތަކުގައި ގިނަ އަދަދެއްގެ ބަޔަކު 1000 ރުފިޔާ އިން ވަނީ ޖޫރިމަނާކޮށްފައެވެ. މެއި މަހަށް ބަލާލިޔަސް މާސްކް ނާޅައި މަގުމަތީގައި އުޅުނު 175 މީހަކު ވަނީ ޖޫރިމަނާކޮށްފައެވެ. އެއީ 24 ގަޑިއިރުގެ ތެރޭގައި ޖޫރިމަނާ ކުރި މީހުންގެ އަދަދެވެ. 24 ގަޑިއިރަށް ބަލާއިރު މިއީ ކުޑަ އަދަދެއް ނޫނެވެ.

ކޮންމެއަކަސް މި ފިޔަވަޅުތަކާއެކު އަޅުގަނޑުމެން ކުރިއަށް ގޮސް، މިހާރު ސަރުކާރުން މިވަނީ ލުއިތައް ވެސް ދޭން ފަށާފައެވެ. އެހެންނަމަވެސް މާސްކް އެޅުމަށް އޮތް އުސޫލަށް ލުއި ދީފައެއް ނުވެއެވެ. މާސްކް އެޅުމުން ކޮވިޑް-19 ވައިރަސްއަށް ތިމާ ހުށައެޅުމުގެ "ރިސްކް" ކުޑަކޮށްދޭއިރު މާސްކް އަޅަން ޖެހޭނެ ކަމަށް އަދިވެސް ސިއްހީ ތަޖުރިބާކާރުން ދަނީ ބުނަމުންނެވެ.

މާސްކް އެޅުމަށް އެއްބަޔަކު ދެކޮޅު ހެދިޔަސް އަނެއް ބަޔަކަށް މިކަން ވީ މާ ރަނގަޅު ކަމަކަށެވެ. މަގުމަތިން ދާއިރު މީހުންނަށް ކާކުކަން ވަކި ކުރަން ނޭނގުމާއި މީހުންގެ ނަޒަރުން ސަލާމަތްވުމަށް މާސްކް އެހީތެރިވެދޭ ކަމަށް އެފަދަ މީހުން ބުނެއެވެ. އަމިއްލަ ނަފްސަށް އޮންނަ އިތުބާރު ކުޑަމީހުންނަށް ވެސް މާސްކް އަޅައިގެން ކަންތައްތައް ކުރުމަށް ފަސޭހަވެގެންދާ ކަމަށް ވަނީ ބުނެފައެވެ. އެގޮތުން ޕޯޑިއަމްއަކަށް އަރައި ވާހަކަ ދައްކަން ޖެހުނަސް ލައިވް ޕްރޮގްރާމަކަށް އަރައި މައުލޫމާތެއް ހިއްސާ ކޮށްލަން ވިޔަސް މާސްކާއެކު އެކަން ވެގެން ދިޔައީ ނުލާހިކު "ކޮމްފަޓަބަލް" ކަމަކަށެވެ.

މާސްކާ އަޅައިގެން އަޅުގަނޑުމެންގެ ދިރިއުޅުމުގެ ކަންތައްތައް ބައްޓަން ކުރަން ޖެހިފައިވާއިރު ހިތުގައި އުފެދޭ ސުވާލަކީ މާސްކާ ނުލައި ދެން އުޅެވޭނެހެެއްޔެވެ؟