ހަމަލާގައި އެންމެ އިސްކޮށް އުޅުނު އެކަކު ހައްޔަރުކޮށްފި
24 ޖުލައި 2021 | ހޮނިހިރު 19:52ހަމަލާ ދިނުމުގައި އެންމެ އިސްކޮށް އުޅުނު މީހާއާއެކު އިތުރު 5 މީހަކު ވަނީ ހައްޔަރުކޮށްފަ
ތަހުގީގަށް ހައްޔަރުކުރި 6 މީހުން
ރައްޔިތުންގެ މަޖިލީހުގެ ރައީސް މުޙައްމަދު ނަަޝީދަށް އަމާޒުކޮށް، ދިން ހަމަލާގައި އެންމެ އިސްކޮށް އުޅުނު އެކަކު ހައްޔަރުކޮށްފިއެވެ.
ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ އެކަން ކަށަވަރުކޮށްދީފައެވެ.
މި ބައްދަލުވުމުގައި ވާހަކަދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ ހަމަލާއާ ގުޅިގެން އެންމެ ފަހުން ހައްޔަރުކޮށްފައިވަނީ ހއ. ހޯރަފުށީ، އަލަނާސިގޭ މުޙައްމަދު ތަސްލީމް ކަމަށެވެ. އޭނާ ހައްޔަރުކުރީ އައްޑޫ ސިޓީން ކަމަށް ސީޕީ ވިދާޅުވިއެވެ.
މިހާތަނަށް ބެލި ބެލުމުން އޭނާއަކީ ހަމަލާ ދިނުމުގައި އެންމެ އިސްކޮށް އުޅުނު މީހުންގެ ތެރެއިން އެކަކު ކަމަށް ސީޕީ ވިދާޅުވިއެވެ. އަދި އޭނާއަކީ ރައީސް ނަޝީދު އަވަހާރަކޮށްލަން ޖެހޭކަމަށް ބުނެ އެ ޝުއޫރު ފާޅު ކޮށްފައިވާ މީހެއްކަން ސީޕީ ފާހަގަ ކުރެއްވިއެވެ.
ރައީސް ނަޝީދަށް އަމާޒުކޮށް ދިން ހަމަލާއާއި ގުޅިގެން އިތުރު 6 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އަދި ފުލުހުން ވަނީ މި މީހުންގެ ވަނަވަރު ވެސް އާންމުކޮށްފައެވެ.
މިއާއެކު މި މައްސަލައިގައި މިހާތަނަށް 10 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
