އޭއެފްސީ ކަޕަށް ތައްޔާރުވުމަށް މާޒިޔާ ސައުދީއަށް

އޭއެފްސީ ކަޕުގެ ދެކުނު އޭޝިއާގެ ގްރޫޕުގެ މެޗުތަކަށް ތައްޔާރުވުމަށް މާޒިޔާ ސްޕޯޓްސް އެންޑް ރެކްރިއޭޝަން ސައުދީ އަރަބިއްޔާއަށް ފުރައިފިއެވެ.

މާޒިޔާއިން ސައުދީގައި ކުރާ ކޭމްޕަކީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހޯދައިދިން ފުރުސަތެކެވެ. މި ތަމްރީނު ކޭމްޕަށް މާޒިޔާ ޓީމު ހޮނިހިރު ދުވަހު ފުރިއިރު، ކޭމްޕަށްފަހު މާޒިޔާ ޓީމު އެނބުރި ރާއްޖެ އައުމަށް ހަމަޖެހިފައިވަނީ އަންނަ އޯގަސްޓް މަހުގެ 14 ވަނަ ދުވަހުއެވެ.

އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ މާޒިޔާގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. މި މުބާރަތަށް ތައްޔާރުވުމުގެ ގޮތުން މާޒިޔާ ޓީމު ސައުދީއަށް ފުރިއިރު، މި މަހުގެ 10 ވަނަ ދުވަހު އެ ޓީމުން ވަނީ މާލޭގައި ތަމްރީނުތައް ފަށާފައެވެ.

ތަމްރީނުތަކަށް މާޒިޔާ ޓީމު ސައުދީއަށް ފުރިއިރު، ދާދި ފަހުން އޭއެފްސީން ވަނީ އޭއެފްސީ ކަޕުގެ ގްރޫޕް ޑީގެ މެޗުތައް ރާއްޖޭގައި ކުޅުމަށް ނިންމާފައެވެ. އޭއެފްސީން މިހާރު ނިންމާފައިވާ ގޮތުން ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާ ޕްލޭއޮފް މެޗު ކުޅޭނީ އަންނަ އޯގަސްޓް މަހުގެ 15 ވަނަ ދުވަހުއެވެ. އަދި އެއަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ އަންނަ މަހުގެ 18، 21 އަދި 24 ވަނަ ދުވަހުއެވެ.

މިހާރު އޮތްގޮތުން އޭއެފްސީ ކަޕުގައި މާޒިޔާއިން ކުޅޭ ފުރަތަމަ މެޗުގައި އަންނަ މަހުގެ 18 ވަނަ ދުވަހު ނުކުންނާނީ ބަޝުންދަރާއާ ދެކޮޅަށެވެ. އަދި ދެވަނަ މެޗުގައި އެ މަހުގެ 21 ވަނަ ދުވަހު މޯހަން ބަގާންއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 24 ވަނަ ދުވަހު ނުކުންނާނީ ޕްލޭއޮފްގައި އީގަލްސް އާއި ބެންގަލޫރު ކުޅެގެން މޮޅުވާ ޓީމަކާ ދެކޮޅަށެވެ.

މި ފަހަރުގެ އޭއެފްސީ ކަޕަށް މާޒިޔާއިން ތައްޔާރުވަމުން އަންނައިރު، ދާދި ފަހުން އެ ޓީމުން ވަނީ މިދިޔަ ސީޒަނުގައި ސުޕަ ޔުނައިޓެޑް ސްޕޯޓްސް (ސަސް) ގެ ގޯލު ބެލެހެއްޓި އުޒްބެކިސްތާނުގެ ގޯލްކީޕަރު މިރްޒޮހިދު މަމަކްތޯނޯފްގެ ސޮއި ހޯދާފައެވެ.