އައްޑޫގައި ލަންކާ ނުވަތަ ޗައިނާގެ ކޮންސިއުލޭޓެއް ގާއިމުކުރުމަށް މަސައްކަތް ކުރަނީ
24 ޖުލައި 2021 | ހޮނިހިރު 13:24އިންޑިއާ ކޮންސިއުލޭޓް ގާއިމުކުރުމަށް ނިންމި ނިންމުން ވަނީ ސިޔާސީ ކަމަކަށް ހަދާފައި
އައްޑޫ ސިޓީ
އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމްކުރުމުގެ ކުރިން ސްރީލަންކާ ނުވަތަ ޗައިނާގެ ކޮންސިއުލޭޓެއް ގާއިމްކުރުމަށް މަސައްކަތް ކުރަމުންދާ ކަމަށް އެސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މޭޔަރު ވިދާޅުވީ އިންޑިއާ ކޮންސިއުލޭޓް ގާއިމްކުރުމުގެ ކުރިން ޗައިނާ ނުވަތަ ލަންކާގެ ކޮންސިއުލޭޓެއް ހުޅުވޭތޯ މަސައްކަތް ކުރަމުންދާ ކަމަށެވެ. އައްޑޫގައި އިންޑިއާގެ ކޮންސިއުލޭޓެއް ގާއިމްކުރަން ނިންމިކަން އިންޑިއާ ސަރުކާރުން އިއުލާނު ކުރުމާއެކު އެއްބަޔަކު އެކަން ސިޔާސީ ކަމަކަށް ހަދާފައިވާ ކަމަށާއި، ނަމަވެސް އެ ހުރިހާ މައްސަލައަކަށް ހައްލު ލިބިގެންދާނެ ކަމަށް މޭޔަރު ވިދާޅުވިއެވެ.
މޭޔަރު ވިދާޅުވީ ޗައިނާގެ ކޮންސިއުލޭޓެއް ގާއިމުކުރުމާމެދު ޗައިނާގެ އެމްބަސީ ބޭފުޅުންނާއި މަޝްވަރާކޮށްފައިވާ ކަމަށާއި، އެބޭފުޅުންގެ ޝައުގުވެރިކަމެއް އެކަމުގައި ނެތް ކަމަށެވެ. ނަމަވެސް މަސައްކަތް ކުރަނީ އިންޑިއާ ކޮންސިއުލޭޓު ގާއިމް ކުރުމުގެ ކުރިން އެހެން ގައުމެއްގެ ކޮންސިއުލޭޓެއް ގާއިމް ކުރުމަށް ކަމަށެވެ.
އަދި މާލެ ސިޓީގައިވެސް އިންޑިއާގެ ހައިކޮމިޝަނެއް އެބަހުރި ކަމަށާއި، އެކަން މައްސަލައަކަށް ނުވާ ކަަމަށެވެ. ނަމަވެސް އައްޑޫގައި އިންޑިއާގައި ކޮންސިއުލޭޓެއް ގާއިމުކުރުން މައްސަލައަކަށްވާ ސަބަބު ނުވިސްނޭ ކަމަށް މޭޔަރު ވިދާޅުވިއެވެ.
ނިޒާރު ވިދާޅުވީ އައްޑޫގައި އިންޑިއާގެ ކޮންސިއުލޭޓެއް ގާއިމުވެގެން ދިއުމަކީ އިޤްތިޞާދީގޮތުން ގިނަ ފައިދާތަކެއް ލިބޭނެ ކަމެއް ކަމަށާއި، އެއީ ބޭރުގެ ގައުމުތަކާ ގުޅުވައިދޭ ވަސީލަތަކަށްވާނެ ކަމަށެވެ.
