ސެންޓްރަލް ބޯޑް އޮފް އިންޑައިރެކްޓް ޓެކްސަސް އެންޑް ކަސްޓަމްސް އާއި މޯލްޑިވްސް ކަސްޓަމްސް ސާރވިސްއާ ދެމެދު ސޮއިކުރި އެމްއޯޔޫގެ ދަށުން ކަސްޓަމްސްގެ ސިއްރު އެއްވެސް މައުލޫމާތެއް ހިއްސާ ނުކުރާނެ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވިދާޅުވެއްޖެއެވެ.

ޓްރެއިނިންތައް ހިންގުމާއި މައުލޫމާތު ބަދަލުކުރުމުގައި ދޭދޭ ގައުމުތަކާއެކު އެއްބަސްވުން ގާއިމު ކުރުމަކީ އަބަދުވެސް ކުރަމުން އަންނަ ކަމެކެވެ.

ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ޝަރީފު ވިދާޅުވީ، ވިޔަފާރިވެރިޔާ ހުށަހަޅާ މައުލޫމާތުތަކުގައި ޝައްކުއުފެދޭ ފަދަ ކަމެއް އޮތްނަމަ އެ މުދަލެއް އެތެރެ ކުރި ގައުމަކުން އެ މައުލޫމާތު ހޯދުމުގެ ފުރުުސަތު މިފަދަ އެއްބަސްވުންތަކުން ފަހިވެގެންދާނެ ކަމަށެވެ. އިންޑިއާއާއެކު ވެވުނު އެއްބަސްވުމުގެ ދަށުން، އިންޑިއާގެ ކަސްޓަމުން އެފަދަ މައުލޫމާތު ރާއްޖޭގެ ކަސްޓަމަށް ލިބިގެންދާނެ ކަމަށް ވިދާޅުވިއެވެ. މިއީ އެއްގޮތަކަށްވެސް ކަސްޓަމްސްގެ ހުރިހާ ޑޭޓާތައް އިންޑިއާއާ ހިއްސާ ކުރުން ނޫން ކަމުގައި ޝަރީފު ވިދާޅުވިއެވެ.

ބޭނުންވާ މައުލޫމާތެއް ކަށަވަރު ކުރުމަށް ދެގައުމުން ބޭނުންވާ ހިނދެއްގައި އެމައުލޫމާތު ހިއްސާކުރުން އެއީ މި އެއްބަސްވުމުގެ އެންމެ ބޮޑު ބޭނުން ކަމުގައި ޝަރީފު ވިދާޅުވިއެވެ. އެއްވެސް ސިއްރު މައުލޫމާތެއް ހިއްސާ ނުކުރާނެ ކަމަށާއި، މިކަމުން ވިޔަފާރިވެރިންނަށް ވާނީ ފައިދާ ކަމުގައި ވިދާޅުވިއެވެ. އެގޮތުން އެއްބަސްވުމުގެ ސަބަބުން ލިޔެކިޔުންތައް ނަކަލުކޮށްގެން ރާއްޖޭއަށް އެތެރެކުރާ މުދާ ދެނެގަނެވޭނެ ކަމަށެވެ.

ކަސްޓަަމްސްގެ މަސައްކަތްތައް ވަރަށް ގާތުން ރައީސުލްޖުމްހޫރިއްޔާ ބައްލަވަމުން ގެންދަވާ ކަންވެސް ޝަރީފުގެ ވާހަކައިގައި ފާހަގަކުރެއްވިއެވެ. އަދި ކަސްޓަމްގެ ކުރިއެރުމާއި މަސައްކަތްތައް ހަރުދަނާ ކުރެއްވުމަށްވެސް ރައީސް މަސައްކަތްކުރައްވާ ކަމުގައި ވިދާޅުވިއެވެ.

ސެންޓްރަލް ބޯޑް އޮފް އިންޑައިރެކްޓް ޓެކްސަސް އެންޑް ކަސްޓަމްސް (ސީ.ބީ.އައި.ސީ - އިންޑިއާ) އާއި މޯލްޑިވްސް ކަސްޓަމްސް ސަރވިސްއާ ދެމެދު ޕްރީ-އެރައިވަލް ކާގޯ ޑޭޓާ ބަދަލުކުރުމަށް ސީ.ބީ.އައި.ސީ.އާއެކު މޯލްޑިވްސް ކަސްޓަމްސް ސަރވިސް އިން އެމް.އޯ.ޔޫގައި ސޮއި ކުރީ ޖުލައި މަހުގެ 22 ވަނަ ދުވަހުއެވެ.

ދިވެހިރާއްޖެއިން ބައިވެރިވެފައިވާ ޓްރޭޑް ފެސިލިޓޭޝަން އެގްރީމެންޓް (ޓީ.އެފް.އޭ.) އަދި ރިވައިޒްޑް ކިޔޯޓޯ ކޮންވެންޝަން (އާރު.ކޭ.ސީ)ގައި ވެސް، ދޭދޭ ގައުމުތަކުގެ މެދުގައި އެމް.އޯ.ޔޫގެ ދަށުން ޑޭޓާ ބަދަލުކުރުމަށް ވަނީ ވަރަށް ބޮޑަށް ބާރުއަޅާފައެވެ. ކަސްޓަމްސްއިން ވަނީ މީގެ ކުރިންވެސް ބައެއް ގައުމުތަކާއެކު މިފަދަ އެއްބަސްވުންތަކުގައި ސޮއިކޮށްފައެވެ.