ޗައިނާއިން އަލަށް އުފެއްދި، ދުނިޔޭގެ އެންމެ ބާރަށް ދުވާ މެގްލެވް ރޭލު ދައްކާލައިފިއެވެ.
މެގްލެވް ނުވަތަ މެގެންޓިކް ލެވިޓޭޝަންއަކީ ރޭލުގެ ދަތުރުތައް ކުރުމަށް ދެ ވައްތަރެއްގެ ދަގަތްފާނު ބޭނުންކުރާ ނިޒާމެކެވެ.
މީގެ އެއް ދަގަތްފާނު ބޭނުންކުރަނީ ރޭލު ދުވާ ޓްރެކްގައި ނުޖެހޭނެ ގޮތަށް ރޭލު މައްޗަށް އުފުލުމަށެވެ. އަނެއް ދަގަތްފާނު ބޭނުންކުރަނީ ރޭލު ކުރިއަށް ދުވާނެ ގޮތް ހެދުމަށެވެ.
މިފަހަރު ޗައިނާއިން ތައްޔާރުކޮށްފައިވާ ދަގަތްފާނުގެ ބާރުގައި ދުވާ ރޭލަކީ ގަޑިއިރެއްގެ ތެރޭގައި 600 ކިލޯމީޓަރަށް ދުވާ ރޭލެކެވެ.
މި ރޭލު ވެގެން ގޮސްފައިވަނީ ދުނިޔޭގެ އެންމެ ބާރަށް ދުވާ އެއްގަމު އުޅަނދު އަދި ރޭލަށެވެ.
މި ރޭލު ދުވާ މެގްލެވް ޓްރެކުގެ ގޮތުގައި ޗައިނާގައި މިވަގުތު އޮތީ އެންމެ ޓްރެކެކެވެ. އެހެންކަމުން ޗައިނާގެ ސިޓީތަކުން އިތުރު މެގްލެވް ޓްރެކްތައް ވުޖޫދަށް ގެނައުމުގެ މަސައްކަތް ކުރަމުންދާކަމަށް ރިޕޯޓުތަކުން ބުނެއެވެ.
ޗައިނާގެ ސިޓީތައް ކަމަށްވާ ޝަންހާއި އަދި ޗެންގްޑޫ އިން މިހާރު ވަނީ މި ޓްރެކްތައް އިމާރާތްކުރުމަށް ހަދަންޖެހޭ ދިރާސާތައް ވެސް ފަށާފައެވެ.
