ވެލިދޫ އައިސޮލޭޝަން ފެސިލިޓީ އެއްކޮށް ބަންދުކުރަނީ

ހަފްތާ ބަންދުގައި އއ. ވެލިދޫ އައިސޮލޭޝަން ފެސިލިޓީ އެއްކޮށް ބަންދުކުރަން ނިންމައިފިއެވެ.

ރާއްޖެއެމްވީއަށް މައުލޫމާތު ދެމުން ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނީ އެ ފެސިލިޓީގައި މިހާރު އެއްވެސް މީހަކު ނުހުންނާނެ ކަމަށާއި ކޭސް ލޯޑް ކުޑަވުމުން ފެސިލިޓީ ބަންދުކުރަން ނިންމާފައިވާ ކަމަށެވެ.

ވެލިދޫ އައިސޮލޭޝަން ފެސިލިޓީ ޚިދުމަތަށް ގެނެވިފައިވަނީ ފަރުކޮޅުފުށި އައިސޮލޭޝަން ފެސިލިޓީ ފުރުމާ ގުޅިގެން މި އަހަރުގެ މެއި މަހުގައެވެ. ގްރޭޓަރ މާލެ ސަރަހައްދުގައި މިވަގުތު ޚިދުމަތް ފޯރުކޮށްދެމުންދަނީ ފަރުކޮޅުފުއްޓާއި ހުޅުމާލެ ކޮވިޑު ފެސިލިޓީގައެވެ.

އެޗްޕީއޭ އިން އާންމުކޮށްފައިވާ މައުލޫމާތުތަކަށް ބަލާއިރު މިވަގުތު ހޮސްޕިޓަލުތަކުގައި ފަރުވާދެމުންދަނީ 8 މީހަކަށެވެ. ރާއްޖޭގެ ކޮވިޑުގެ ހާލަތަށް ބަލާއިރު މިހާރު ފެންނަ ކޭސްތަކުގެ އަދަދު ވަނީ މަދުވެފައެވެ. އެހެންނަމަވެސް ކޮވިޑް-19ގެ އިތުރު ރާޅެއް އައުމުގެ ފުރުސަތު ކުޑަކުރުމަށް އެންމެން އެކުގައި ރައްކާތެރިކަމުގެ ފިޔަވަޅުތަކަށް ފުރިހަމައަށް އަމަލުކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފައެވެ.

ބަލީގެ ހާލަތު ރަނގަޅުވެފައިވާ މި ދަނޑިވަޅުގައި ބަލީގެ އިތުރު ރާޅެއް އައުމުގެ ފުރުސަތު ކުޑަކުރުމަށް އެންމެން އެކުގައި ރައްކާތެރިކަމުގެ ފިޔަވަޅުތަކަށް ފުރިހަމައަށް އަމަލުކުރުމަކީ ވަރަށް މުހިންމު ކަމެއްކަމަށް އެޗްޕީއޭއިން ބުނެއެވެ.

ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު އަޅާފައިވާ ފިޔަވަޅުތަކަށް ގިނަ ލުއިތަކެއް ވަނީ ދީފައެވެ. ނަމަވެސް ވެކްސިންގެ ދެ ޑޯޒު ފުރިހަމަ ކުރިކަމުގައި ވިޔަސް، މޮނިޓަރިންގެ ހާލަތުގައި އޮންނަ ރަށްރަށަށް ދަތުރުކުރާނަމަ ކަރަންޓީންގެ މުއްދަތު ފުރިހަމަ ކުރަންޖެހޭނެ ކަމަށް ބުނެފައިވެއެވެ. ވެކްސިންގެ 2 ޑޯޒް ޖެހުމަށްފަހު 14 ދުވަސް ފުރިހަމަވެފައިވާނަމަ ޕީސީއާރް ނެގެޓިވް ނަތީޖާއެކު ރަށްރަށަށް ދެވޭ ގޮތަށް ހުޅުވާލީ މާލެ ސަރަހައްދުގައި ކޮވިޑް ޕޮޒިޓިވްވާ އަދަދު މަދުވުމުންނެވެ.

ދިން ލުއިތަކާއި ލިބިފައިވާ ޗުއްޓީއާއެކު ގިނައަދަދެއްގެ މީހުން ރަށްރަށަށް ދަތުރުކުރަމުން ދާއިރު އެޗްޕީއޭގެ އުސޫލުތަކަށް އަމަލުކުރަމުން ގެންދިއުމަށް ވަނީ އިލްތިމާސް ކޮށްފައެވެ.