ކުޅުދުއްފުށީ ރައްޔިތުންގެ އުންމީދުތައް މި ސަރުކާރުން ހާސިލްކޮށްދޭނެކަން ޔަގީން: މޭޔަރު
21 ޖުލައި 2021 | ބުދަ 05:03ކުރިއަށް އޮތް ތަނުގައި ކުޅުދުއްފުށީގެ ތަރައްގީއަށް ބޮޑު ކުރިއެރުމެއް ލިބިގެންދާނެ ކަމަށް ވިދާޅުވި
ކުޅުދުއްފުށި ސިޓީގެ މޭޔަރ މުހައްމަދު އާތިފް
ކުޅުދުއްފުށީ ރައްޔިތުންގެ ފަރާތުން އެމްޑީޕީއަށް ލިބޭ ތާއީދާއެކު އެ ރައްޔިތުންގެ އުންމީދުތައް މި ސަރުކާރުން ހާސިލްކޮށްދޭނެކަން ޔަގީންކުރައްވާކަމަށް ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވެއްޖެއެވެ.
ރިޔާސީ އިންތިޚާބުގައި އެމްޑީޕީއަށް 100 އިންސައްތަ ތާއީދު ލިބުނީ ހަމައެކަނި ކުޅުދުއްފުށި ސިޓީންނެވެ.
މިކަމާ ގުޅޭގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވީ ރައީސުލްޖުމްހޫރިއްޔާ އެންމެ ފަހުން ތިލަދުންމަތީ ދެކުނުބުރީގެ ބައެއް ރަށްތަކަށް ކުރެއްވި ދަތުރުފުޅުގައި އެންމެ ފުރަތަމަ ކުޅުދުއްފުއްޓަށް ވަޑައިގެންނެވުމަކީ، އެމަނިކުފާނަށް ކުޅުދުއްފުށިން ދިން ތަރުހީބު ބަލައިގެންފައިވާކަމުގެ ހެއްކެއް ކަމަށެވެ.
ކުޅުދުއްފުށީގެ ރައްޔިތުން މި ސަރުކާރަށް ދެމުންދާ ތަރުހީބާއެކު، އެމީހުންގެ އުންމީދުތަކެއް ވެސް ވާކަމަށް މޭޔަރ އާތިފް ވިދާޅުވިއެވެ.
ރައީސްގެ މި ދަތުރުފުޅުގައި ކުރެވުނު މަޝްވަރާތަކުން މި ސަރުކާރުން ކުޅުދުއްފުށީ ރައްޔިތުންގެ އުންމީދުތަކުގައި ކުލަ ޖައްސައިދޭނެކަން ފާހަގަކުރެވުނު ކަމަށް މޭޔަރ ވިދާޅުވިއެވެ.
ކުރިއަށް އޮތް ތަނުގައި ކުޅުދުއްފުށީގެ ތަރައްގީއަށް ބޮޑު ކުރިއެރުމެއް ލިބިގެންދާނެ ކަމަށް ވެސް މޭޔަރ ފާހަގަކުރެއްވިއެވެ.
މި މަހުގެ 16 އިން 18 އަށް ރައީސުލްޖުމްހޫރިއްޔާ ހދ. އަތޮޅަށް ކުރެއްވި ދަތުރުފުޅުގައި ކުޅުދުއްފުށްޓަށް ވަޑައިގެން އެ ސިޓީގެ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި، ކުޅުދުއްފުށީ ރީޖަނަލް ހޮސްޕިޓަލުގެ އިސްވެރިންނާއި، އެސިޓީގެ 3 ސުކޫލުގެ އިސްވެރިންނާއި، ކުޅުދުއްފުށީ ޕޮލިސް ސްޓޭޝަންގެ އިސްވެރިންނާ ވަނީ ބައްދަލުކުރައްވާފައެވެ.
މީގެ އިތުރުން ރައީސުލްޖުމްހޫރިއްޔާގެ އަނބިކަނބަލުން ވަނީ ހދ. ކުޅުދުއްފުށީ ފެމިލީ އެންޑް ޗިލްޑްރަންސް ސަރވިސް ސެންޓަރަށް ޒިޔާރަތްކުރައްވައި، އެ މުއައްސަސާގެ އިސްވެރިންނާއި، އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއި، ބައްދަލުކުރައްވާފައެވެ.
