ބަޖްރަންގީ ބައިޖާންގެ ދެވަނަ ބައެއް އުފައްދަނީތަ؟

ގިނަ ބައެއްގެ މަޤުބޫލުކަން ހޯދި ފިލްމް ބަޖްރަންގީ ބައިޖާންގެ ދެވަނަ ބައެއް އުފައްދަން އުޅޭކަމުގެ އަޑުތައް މިވަނީ ގަދަވެފައެވެ.

ފިލުމު ރިލީޒް ކުރިތާ 6 އަހަރަށް ފަހު އެ ފިލްމުގެ ސްކްރީން ރައިޓަރ، ކޭވީ ވިޖަޔެންދުރަ ޕްރަސާދު ބުނީ ދެވަނަ ބައިގެ ސްކްރީން ޕްލޭ ލިޔަމުން އަންނަ ކަމަށެވެ. ޕިންކް ވިލާއަށް ދިން އިންޓަވިއުއެއްގައި ކޭވީ ވިޖަޔެންދުރަ ޕްރަސާދު ބުނީ ވާހަކަ ކުރިއަށް ގެންދާނެ ގޮތުގެ ޕްލޮޓް މިހާރު ފައިނަލް ކުރެވިފައިވާ ކަމަށެވެ. އަދި މިކަމަށް ސަލްމާންޚާންގެ ރުހުން ވެސް ލިބިފައިވާ ކަމަށެވެ.

މި ފިލްމަށް ބޮޑު ތަރުޙީބެއް ލިބިފައިވާއިރު މި ފިލްމު ވަނީ ޗައިނާގައި ވެސް ރިލީޒްކޮށްފައެވެ. މި ފިލްމުވެގެން ގޮސްފައިވަނީ ޗައިނާގައި ރިލީޒްކުރި، ސަލްމާންގެ ފުރަތަމަ ފިލްމަށެވެ. މި ފިލްމު ވަނީ ޗައިނާގެ 8000 ސްކްރީނެއްގައި އަޅުވާފައެވެ. "ބަޖްރަންގީ ބައިޖާން" ޑައިރެކްޓް ކޮށްފައި ވަނީ ކަބީރު ޚާންއެވެ. ފިލްމުގެ ލީޑް ކާސްޓުންގެ ތެރޭގައި ސަލްމާން ޚާނާއި ހަރްޝާލީގެ އިތުރުން ފެނިގެންދަނީ ކަރީނާ ކަޕޫރާއި ނަވާޒުއްދީން ސިއްދީޤީއެވެ.

ފިލްމުން ދައްކުވައިދެނީ ޕާކިސްތާނުން ފުރާ ރޭލަކުން އާއިލާގެ މީހަކާ ނުލައި އިންޑިއާއަށް ދެވޭ ކުޑަ އަންހެން ކުއްޖަކު ރައްކާތެރިކަމާ އެކު ޤައުމަށް ގެންގޮސްދޭން އިންޑިއާގެ މީހަކު ކުރާ އުނދަގޫ ދަތުރުގެ ވާހަކައެވެ. ފިލްމަށް 63 ވަނަ ނެޝަނަލް އެވޯޑްސްގައި ބެސްޓް ޕޮޕިއުލާ ފިލްމު ފްރޮވައިޑިން ހޯލްސަމް އެންޓަޓައިންމަންޓް އެވޯޑް ލިބިފައިވާއިރު ފިލްމުގެ ވާހަކައަށް ފިލްމުފެއާރގައި އެންމެ މޮޅު ސްޓޯރީގެ އެވޯޑްވެސް ވަނީ ލިބިފައެވެ.

ނުވަދިހަ ކްރޯޑް އިންޑިއަން ރުޕީސްއަށް އުފެއްދި މި ފިލްމު ރިލީޒް ކޮށްފައި ވަނީ 2015 ވަނަ އަހަރުގެ ޖުލައި މަހުގެ 17ވަނަ ދުވަހުގައެވެ.