ފޮރިން މިނިސްޓްރީގެ އައު އިމާރާތް ހުޅުވި ރަސްމިއްޔާތުގައި ދިދަ ނެގީ އެންމެ ހަގު ދެ މުވައްޒަފުން
ދިދަ ނެގި ދުވަހު އެ ފުރުސަތު މިނިސްޓްރީން ފަހިކޮށްދިނުމުން ވަރަށް އުފާވި ކަމަށް އެ ކުދިން ބުނި
ދިދަ ނެގި މުވައްޒަފުން
ޒަމާން ތަރައްޤީވެ، ޤައުމު ކުރިއަރައިދާއިރު ވަރަށް ގިނަ ކަންތައްތަކެއް މިހާރު މިވަނީ ބަދަލުވެފައެވެ. ކުރީގައި ނުހިނގާ އެތައް ކަމެއް މިހާރު ހިނގަމުންދާއިރު ކުރީގައި ކަންކަމުގައި ގޮތް ނިންމި ގޮތްތައް ވަނީ ބަދަލުވެފައެވެ.
އިހުގައި ޤައުމުގެ އެންމެ އިސްކަންކަމުގައި ގޮތް ނިންމަނީ އެންމެ އުމުރުން ދޮށީ މީހުންނެވެ. އެމީހުންގެ ބަސް ވިކޭއިރު އެމީހުންނަށް ގިނަ ބަޔަކު އިހްތިރާމު ވެސް ކުރެއެވެ. އުމުރުން ދުވަސްވުމުން އެފަދަ މީހުންގެ ތަޖުރިބާ ގިނަކަމަށް ބުނެއެވެ. އެއީ މުޅިއަކުން ދޮގު ވާހަކައެއް ނޫނެވެ. އެހެންނަމަވެސް ޒަމާން ތަރައްޤީވެ މި ވިސްނުން ވެސް ބަދަލުވާން ފަށައިފިއެވެ. ކަންކަމުގައި ޒުވާނުންގެ ހިޔާލު ހޯދާ، ޤައުމުގެ ބޮޑެތި ކަންކަމުގައި ޒުވާނުންގެ ހިއްސާ ވަނީ އިތުރުކުރަން ފަށާފައެވެ. ޒުވާނުންނަކީ ވެސް ޤައުމުގެ ވަރަށް ބޮޑު ހިއްސާއެއް ކަމަށް ވަނީ ދެކެން ފަށާފައެވެ.
މިކަމުގެ އެންމެ ބޮޑު އެއް މިސާލު ފެނިގެންދިޔައީ ފޮރިން މިނިސްޓްރީ އިމާރާތް މަރާމާތު ކުރުމަށްފަހު، ފަތުހުالله ޖަމީލް ބިލްޑިންގގެ ނަމުގައި އެތަން ހުޅުވި ރަސްމިއްޔާތުގެ ދިދަ ނެގުމަށްޓަކައި ފޮރިން މިނިސްޓްރީގައި މަސައްކަތް ކުރާ އެންމެ ހަގު ދެ ޒުވާނުންނަށް އެ ފުރުސަތު ފަހިކޮށްދިނުމުންނެވެ. އެ މިނިސްޓްރީއަށް އެތައް އަހަރަކު ޚިދުމަތް ކޮށްދެއްވާފައި ތިއްބެވި ބޭފުޅުންގެ ބަދަލުގައި މި ފުރުސަތު ފަހިކޮށްދީފައިވަނީ އެ ދެ ޒުވާނުންނަށެވެ.
މިފަދަ މުހިންމު ރަސްމިއްޔާތެއްގައި ޤައުމުގެ ޝަރަފުކަމުގައިވާ ދިވެހި ދިދަ ނެގުމަށްޓަކައި ހަވާލު ކުރެވިގެން ދިޔުމަކީ ޒުވާނުންގެ ހިއްސާ މިފަދަ ކަންކަމުގައި އޮތް މިންވަރު ހާމަވެގެންދާ ކަމެކެވެ. އެ ރަސްމިއްޔާތުގައި ދިދަ ނެގުމުގެ ޝަރަފު ލިބުނީ ފޮރިން މިނިސްޓްރީގެ އިކޮނޮމިކް ކޯޕަރޭޝަން ޑިޕާޓްމަންޓުގައި މަސައްކަތްކުރާ މުހައްމަދު ރާއިދު ސާއިދާއި ޕްރޮޓޮކޯލް ޑިޕާޓްމަންޓުގައި މަސައްކަތް ކުރަމުންދާ ފައިހާ އަހްމަދު ފިރާގަށެވެ.
މި ލިބުނު ފަޚުރާ ގުޅިގެން ރާއްޖެއެމްވީއާ ވާހަކަ ދައްކަމުން ރާއިދު ބުނީ އެފަދަ ޝަރަފެއް ލިބުމުން ވަރަށް އުފާވާ ކަމަށެވެ. މިނިސްޓްރީއާ އެންމެ ފުރަތަމަ ގުޅުނީ މިނިސްޓްރީގެ އެޑްމިން ސެކްޝަނަށް ކަމަށާއި އެހެންނަމަވެސް މިދިޔަ އަހަރު އިކޮނޮމިކް ކޯޕަރޭޝަން ޑިޕާޓްމަންޓާ ގުޅުމުން ވަރަށް ގިނަކަންތައްތަކެއް ދަސްވެގެންދިޔަ ކަމަށެވެ. އެގޮތުން ރާއްޖޭގެ އިޤްތިސާދު ވަރުގަދަ ކުރުމަށްޓަކައި ގިނަ މަސައްކަތްތަކެއް މިނިސްޓްރީގައި ކުރަމުންދާ ކަމަށް ރާއިދު ބުންޏެވެ.
ފައިހާ ވެސް ބުނީ ދިދަ ނެގި ދުވަހު އެ ފުރުސަތު މިނިސްޓްރީން ފަހިކޮށްދިނުމުން ވަރަށް އުފާވި ކަމަށެވެ. އަދި މިކަމުން ވެސް އަންގައިދެނީ މިނިސްޓްރީގައި މަސައްކަތް ކުރުމަށް ހަމަހަމަ ފުރުސަތު ފަހިވެފައި އޮތުން ކަމަށެވެ. މިނިސްޓްރީން މުވައްޒަފުންނަށް ހަމަހަމަ ފުރުސަތު ފަހިކޮށްދިނުމުގެ އިތުރުން މިންތީގެ ހަމަހަމަކަން ވެސް ޤާއިމުކުރާ ކަމަށް ފައިހާ ބުންޏެވެ.
މި ދެ މުވައްޒަފުންނަކީ ވެސް ޤައުމަށްޓަކައި ވަރަށް މުހިންމު މަސައްކަތެއް ކުރަމުންދާ ޤައުމުގެ މުސްތަޤްބަލު ބިނާކުރުމަށްޓަކައި އަތުކުރި އޮޅާލާފައިވާ ދެ ޒުވާނުންނެވެ. ޒުވާން އުމުރު އެ ފެށީ ޤައުމަށް ޚިދުމަތް ކުރުންމަތީގައެވެ. އަދި އެ ދެޒުވާނުންގެ އުންމީދަކީ ވެސް އެގޮތުގެ މަތީގައި ދެމިތިބުމެވެ.
ޤައުމު ހެޔޮ މިސްރާބަށް ގެންދިއުމުގައި އެންމެ އިސް ބަޔަކީ ޒުވާނުންކަމާއި ޒުވާނުންނަށް ފުރުޞަތުތައް ފަހިކޮށްދީ ޤައުމުގެ މުސްތަޤްބަލު ބިނާކުރުމުގައި ޒުވާނުންގެ ބަސް މުހިންމު ކަމަށާއި އަދި ޤައުމުގެ މުސްތަޤްބަލު ބިނާކުރުމަށްޓަކައި ބޭނުންވަނީ ޒުވާނުން ކަމަށް ވެސް މި ސަރުކާރުން ޤަބޫލުކުރެއެވެ.
