ހަނިމާދޫގެ މަގުތަކުގައި ތާރު އެޅުމުގެ މަސައްކަތް ރައީސުލްޖުމްހޫރިއްޔާ ފަށްޓަވައިދެއްވައިފިއެވެ.

މި މަސައްކަތް ރައީސުލްޖުމްހޫރިއްޔާ ފައްޓަވައި ދެއްވީ ތާރު އެޅުމަށް ހަމަޖެހިފައިވާ މަގެއްގައި ބޭއްވި ޚާއްޞަ ރަސްމިއްޔާތެއްގައެވެ.

މި މަޝްރޫއުގެ ދަށުން ހަނިމާދޫގެ 20 މަގެއްގައި 44،000 އަކަ މީޓަރުގެ ސަރަހައްދެއްގައި ތާރު އަޅާނެއެވެ. އަދި މަގުތަކުގައި ފެން ހިންދުމުގެ ނިޒާމް ގާއިމުކުރުމާއި، މަގުބައްތި ހަރުކުރުމާއި، މަގުމަތީގެ ނިޝާންތައް ހަރުކުރުމުގެ މަސައްކަތް ކުރުމަށް ވެސް ހަމަޖެހިފައިވެއެވެ.

މި މަޝްރޫއަކީ 71.9 މިލިއަން ރުފިޔާގެ މަޝްރޫއެކެވެ.

އެމްޓީސީސީގެ ސީއީއޯ ދެއްކެވި ވާހަކަފުޅުގައި، ރާއްޖޭގެ ޢުމްރާނީ ތަރައްޤީގެ ބައިވެރިއެއްގެ ހައިސިއްޔަތުން އެމްޓީސީސީއާ ސަރުކާރުން ހަވާލުކުރައްވާ މަސައްކަތްތައް ވަގުތުން ނިންމާނެ ކަމުގެ ޔަޤީންކަން އަރުވާކަމަށް ވިދާޅުވިއެވެ.

އެ ކުންފުނީގެ ތާރީޚުގައި އެންމެ ގިނަ މަޝްރޫޢު ނިންމާ ހަވާލުކުރެވުނީ ވޭތުވެދިޔަ 2 އަހަރުގެ ތެރޭގައި ކަމަށާއި، މި ކާމިޔާބީގެ އަސްލަކީ މި ސަރުކާރުން ރައްޔިތުންގެ އިޙުސާސްތައް ދެނެގަނެ މިދަތި އުނދަގޫ ދަނޑިވަޅުގައި ވެސް ރައްޔިތުންގެ ލާބައާއި މަންފާއަށް ކުރިއަށް ގެންދަވާ މަސައްކަތްތަކަށް ދެއްވާ އިސްކަން ކަމުގައި އާޒިމް ވިދާޅުވިއެވެ.

އެމްޓީސީސީގެ މަސައްކަތް ބައްޓަން ކުރަމުން މިދަނީ ސީދާ ރައީސް އިބްރާހިމް މުޙައްމަދު ޞާލިޙްގެ އިރުޝާދުގެ ދަށުން ކަމަށާއި، މިއަދުގެ ރައީސް ބޭނުންފުޅުވަނީ އަވަސް ތަރައްޤީ ގެންނަން ކަމަށެވެ. އެމްޓީސީސީގެ ޒިންމާއަކީ ހަވާލުކުރެވޭ މަސައްކަތް ވަގުތަށް ނިންމުން ކަމަށާއި، ރައްޔިތުންގެ ބައިތުލްމާލުން ޚަރަދު ކޮށްގެން ހިންގާ މަޝްރޫއުތައް ހަވާލުކުރުމުން ގަޑިއަށް ފަރުވާތެރިކަމާއެކު ނިންމުމަކީ ކުންފުނީގެ ޒިންމާއެއް ކަމަށެވެ.

އެގޮތުން އެމްޓީސީސީގެ އަމާޒަކީ ހދ. ހަނިމާދޫ މަގުހެދުމުގެ މަޝްރޫޢުއާއި ހަނިމާދޫ ބަނދަރު ތަރައްޤީކުރުމުގެ މަޝްރޫޢު މި ހިނގާ އަހަރުގެ ޑިސެމްބަރު މަހުގެ ތެރޭ ނިންމުން ކަމަށް ވިދާޅުވިއެވެ.

އެމްޓީސީސީއަކީ ކުރިން އަހަރެއްގެތެރޭ 20 މަޝްރޫޢު ހިންގަމުން އައި ކުންފުންޏެއް ކަމަށާއި، ނަމަވެސް މިވަގުތު ވެސް 62 މަޝްރޫޢުއެއްގެ އަމަލީ މަސައްކަތް ކުރަމުން އަންނަ ކަމުގައި ފާހަގަކުރެއްވިއެވެ.

ހަނިމާދޫއަކީ މިހާރުވެސް ތަރައްގީގެ އެކި މަޝްރޫއުތައް ހިންގަމުން އަންނަ ރަށެކެވެ. އެގޮތުން މިހާރުވެސް 14 މަޝްރޫއެއް އެ ރަށަށްވަނީ ޕްލޭން ކުރެވިފައެވެ.