އުމުރުން އެންމެ 6 އަހަރުގައި ކީރިތި ޤުރުއާން ހިތުދަސްކުރި އަމަން އަޙްމަދު ޢާޠިފާ ރައީސުލްޖުމްހޫރިއްޔާގެ ދެކަނބަލުން ބައްދަލުކުރައްވައި، އޭނާއަށް މަރުޙަބާ ވިދާޅުވެއްޖެއެވެ.

ރައީސް އޮފީހުން ބުނީ ކީރިތި ގުރުއާން ހިތުދަސްކުރި އެކްސެލް އިންޓަރނޭޝަނަލް ސްކޫލްގެ ދަރިވަރު ބ.ހިތާދޫ، ޑެއިޒީމާގެ، އަމަން އަހުމަދު އާތިފްއާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި އެމަނިކުފާނުގެ އަނބިކަނބަލުން ފަޒުނާ އަހުމަދު ބައްދަލުކުރެއްވީ އެކަމައްޓަކާ ބުރާސްފަތި ދުވަހުގެ މެންދުރު ރައީސް އޮފީހުގައި ބޭއްވި ބައްދަލުވުމެއްގައި ކަމަށެވެ.

ރައީސް އޮފީހުން ބުނީ އެ ބައްދަލުވުމުގައި އަމަން އަޙްމަދު އާތިފް، ކީރިތި ޤުރުއާން ހިތުދަސްކުރުމާގުޅިގެން، އެކްސެލް އިންޓަރނޭޝަނަލް ސްކޫލްގެ ފަރާތުން ދިން ތަށްޓާއި ހަނދާނީ ލިޔުން ރައީސް އަމާންއާ ހަވާލުކޮށްދެއްވި ކަމަށެވެ. އަދި އަމަންގެ މަސައްކަތަށް ހިތްވަރުދެއްވުމުގެ ގޮތުން ހާއްސަ އިނާމެއް އޭނާއަށް ރައީސުލްޖުމްހޫރިއްޔާ ދެއްވި ކަމަށް ވެސް ބުނެފައިވެއެވެ.

ޅަ އުމުރެއްގައި އަމަން، ކީރިތި ގުރްއާން ހިތުދަސްކުރީތީ އެކަމަށް ތައުރީފް ކުރައްވައި، އެކަމާ ވަރަށް ބޮޑަށް އުފާފުޅު ކުރައްވާ ކަމަށްވެސް ރައީސުލްޖުމްހޫރިއްޔާ ވިދާޅުވެފައިވާ ކަމަށެވެ. އަދި އަމަންގެ މައިންބަފައިން އެކަމަށްޓަކައި ކުރެއްވި މަސައްކަތްތައް ފާހަގަކުރައްވާ، އަމަންގެ މަންމަ، ލުބާނާ މުހައްމަދަށާއި ބައްޕަ އަހުމަދު އާތިފަށްވެސް، ރައީސް ޝުކުރު އަދާކުރެއްވި ކަމަށް އެ އޮފީހުން ބުނެފައިވެއެވެ. އަދި އަމަން ގުރުއާން ހިތުދަސްކުރުމަށް ޝައުގިވެރިވި ގޮތް އޮޅުން ފިލުވައި އެކަމަށް ރައީސްގެ ދެ ކަނބަލުން މަރުހަބާވިދާޅުވި ކަމަށް ވެސް އެ އޮފީހުން ބުނެއެވެ.

އަމަންގެ މަންމަ ލުބާނާ މުޙައްމަދާއި، ބައްޕަ އަޙްމަދު އާޠިފް ދެއްކެވި ވާހަކައިގައި، އަމަންއަކީ ވަރަށް ކުޑައިރުއްސުރެ ކީރިތި ޤުރުއާން އަޑުއެހުމަށް ވަރަށް ބޮޑު ޝައުގުވެރިކަމެއް ބަހައްޓަމުން ގެންދިޔަ ކުއްޖެއްކަން ފާހަގަކޮށްފައިވާ ކަމަށް ބުންޏެވެ. އަދި އަމަންއާ ބައްދަލުކުރައްވައި އެކަމުގެ އަގު ވަޒަންކުރެއްވި ކަމަށްޓަކައި ރައީސުލްޖުމްހޫރިއްޔާގެ ދެކަނބަލުންނަށް ޝުކުރު އަދާ ކުރެއްވި ކަމަށް ވެސް ބުނެފައިވެއެވެ.

އަމަން، ކީރިތި ޤުރްއާން ހިތުދަސްކުރި ޙާފިޡެއްގެ ގޮތުގައި ރަޖިސްޓްރީކުރުމަށްޓަކައި ޙާފިޡު ކަމުގެ އިމްތިހާނުގައި ބައިވެރިކުރެއްވުމަށް އެކްސެލް އިންޓަރނޭޝަނަލް ސްކޫލުން މިހާރުވަނީ ކީރިތި ގުރްއާނާބެހޭ ގައުމީ މަރުކަޒަށް ހުށަހަޅުއްވާފައެވެ.